(ສພຊ) ໃນວັນທີ 13 ພະຈິກ 2023 ທ່ານ ປອ. ນາງ ສູນທອນ ໄຊຍະຈັກ ເລຂາທິການສູນກາງພັກ, ຮອງປະທານສະພາແຫ່ງຊາດ ແຫ່ງ ສປປລາວ ໄດ້ຕ້ອນຮັບທ່ານ ເມິງຄ໌ບາທາຣ໌ ລັກຄະວາ (MUNKHBAATAR LKHAGVA) ຮອງປະທານສະພາຄູຣານໃຫຍ່ ແຫ່ງ ມົງໂກລີ ພ້ອມດ້ວຍຄະນະ ເຂົ້າຢ້ຽມພົບປະ ທີ່ສະພາແຫ່ງຊາດ ນະຄອນຫຼວງວຽງຈັນ, ໃນໂອກາດທີ່ ຄະນະຜູ້ແທນດັ່ງກ່າວ ເດີນທາງມາເຄື່ອນໄຫວຢ້ຽມຢາມ ແລະ ເຮັດວຽກ ຢູ່ ສປປລາວ.

ໃນໂອກາດດັ່ງກ່າວ ຮອງປະທານສະພາແຫ່ງຊາດລາວ ໄດ້ສະແດງຄວາມຕ້ອນຮັບ ແລະ ຕີລາຄາສູງ ຕໍ່ທ່ານ MUNKHBAATAR LKHAGVA ພ້ອມດ້ວຍຄະນະ ທີ່ເດີນທາງມາຢ້ຽມຢາມ ແລະ ເຮັດວຽກຢູ່ ສປປລາວ ຄັ້ງນີ້ ເຊິ່ງເປັນມິດໝາຍສຳຄັນເຂົ້າໃນການປະກອບສ່ວນເສີມສ້າງການພົວພັນຮ່ວມມື ແລະ ຊ່ວຍເຫຼືອ ເຊິ່ງກັນ ແລະ ກັນ ເວົ້າລວມ, ເວົ້າສະເພາະກໍຄື ສອງສະພາແຫ່ງຊາດລາວ-ສະພາຄູຣານໃຫຍ່ ມົງໂກລີ ທີ່ມີມາແຕ່ດົນນານແລ້ວນັ້ນ ໃຫ້ນັບມື້ແຕກດອກອອກຜົນຍິ່ງໆຂຶ້ນ. ທ່ານຮອງປະທາສະພາແຫ່ງຊາດລາວ ຍັງໄດ້ອວຍພອນ ໃຫ້ຄະນະຜູ້ແທນດັ່ງກ່າວ ຈົ່ງປະສົບຜົນສໍາເລັດໃນການມາຢ້ຽມຢາມ ແລະ ເຮັດວຽກຢູ່ ສປປລາວ ໃນຄັ້ງນີ້.

ທ່ານ MUNKHBAATAR LKHAGVA ກໍໄດ້ສະແດງຄວາມຂອບໃຈຕໍ່ທ່ານ ຮອງປະທານສະພາແຫ່ງຊາດລາວ ທີ່ໄດ້ໃຫ້ການຕ້ອນຮັບຢ່າງອົບອຸ່ນ ແລະ ໄດ້ແຈ້ງຈຸດປະສົງ ໃນການມາເຄື່ອນໄຫວຢ້ຽມຢາມ ແລະ ເຮັດວຽກຢູ່ ສປປລາວ ໃຫ້ທ່ານ ຮອງປະທານສະພາແຫ່ງຊາດ ໄດ້ຮັບຊາບຕື່ມອີກ.

ໃນໂອກາດດັ່ງກ່າວ ສະພາຄູຣານໃຫຍ່ ແຫ່ງ ມົງໂກລີ ໄດ້ມອບຜ້າພົມໃຫ້ແກ່ ສະພາແຫ່ງຊາດລາວ ເຊິ່ງແມ່ນ ທ່ານ ບັດບາທາຣ ເຊເວງຈາວ ຮອງເລຂາທິການສະພາຄູຣານໃຫຍ່ ແຫ່ງມົງໂກລີ ເປັນຜູ້ເຊັນມອບ ແລະ ທ່ານ ສິງຄຳ ວົງພະຈັນ ຮອງເລຂາທິການສະພາແຫ່ງຊາດ ແຫ່ງ ສປປລາວ ເປັນຜູ້ເຊັນຮັບ ໂດຍມີທ່ານ ປອ. ນາງ ສູນທອນ ໄຊຍະຈັກ ເລຂາທິການສູນກາງພັກ, ຮອງປະທານສະພາແຫ່ງຊາດ, ທ່ານ MUNKHBAATAR LKHAGVA ຮອງປະທານສະພາຄູຣານໃຫຍ່ ແຫ່ງ ມົງໂກລີ ພ້ອມພາກສ່ວນທີ່ກ່ຽວຂ້ອງທັງສອງພາກສ່ວນເຂົ້າຮ່ວມເປັນສັກຂີພິຍານ.