(ສພຊ) ໃນວັນທີ 23 ສິງຫາ 2018, ທ່ານ ບຸນປອນ ບຸດຕະນະວົງ ກຳມະການສູນກາງພັກ ຮອງປະທານສະພາແຫ່ງຊາດ​ ທັງເປັນສະມາຊິກສະພາແຫ່ງຊາດ ເຂດເລືອກຕັ້ງທີ 12 ແຂວງຄໍາມ່ວນ ແລະ ທ່ານ ບຸນມີ ພິມມະສອນ ຮອງເລຂາພັກແຂວງ ຮອງເຈົ້າແຂວງໆຄໍາມ່ວນ ປະທານຄວບຄຸມໄຟພິບັດຂັ້ນແຂວງ ແລະ ວິຊາການຈໍານວນໜຶ່ງ ໄດ້ມອບເຄື່ອງຊ່ວຍເຫລືອປະຊາຊົນທີ່ຖືກຜົນກະທົບຈາກໄພນໍ້າຖ້ວມ ປະກອບມີ: ເຄື່ອງນຸ່ງຫົ່ມ, ຜ້າຫົ່ມ, ນໍ້າດື່ມ, ເຂົ້າສານ ແລະ ອາຫານແຫ້ງ ລວມມູນຄ່າ 45 ລ້ານກວ່າກີບ ເຊິ່ງມອບໂດຍ ທ່ານ ບຸນປອນ ບຸດຕະນະວົງ ກຳມະການສູນກາງພັກ ຮອງປະທານສະພາແຫ່ງຊາດ, ຕາງໜ້າອຳນາດການປົກຄອງເມືອງຍົມມະລາດ ຮັບໂດຍ ທ່ານ ຄູນສີ ແສງດາລາ ຄະນະປະຈໍາພັກເມືອງ ຮອງເຈົ້າເມືອງໆຍົມມະລາດ ແລະ ອຳນາດການປົກຄອງບ້ານ  ຕະຫລອດຮອດພໍ່ແມ່ປະຊາຊົນເຂົ້າຮ່ວມ, ເຊິ່ງມອບໃຫ້ປະຊາຊົນ 2 ບ້ານ ຄື: ໂພນແກ້ວ ແລະ ນາແຫວງ.

ໃນການເຄື່ອນໄຫວຢ້ຽມຢາມຄັ້ງນີ້, ໄດ້ຮັບຟັງການບົດລາຍງານ ຂອງທ່ານຮອງເຈົ້າເມືອງໆຍົມມະລາດ ກ່ຽວກັບຜົນກະທົບຈາກພະຍຸເຊິນຕິນ ເຮັດໃຫ້ເກີດໄພນໍ້າຖ້ວມ ສ້າງຄວາມເສຍຫາຍໃຫ້ບ້ານເຮືອນປະຊາຊົນ ຈໍານວນ 24 ບ້ານ, ບ້ານທີ່ຖືກນໍ້າຖ້ວມໝັກ ມີ 14 ບ້ານ , ມີຄອບຄົວທັງໝົດ 3.537 ຄອຍຄົວ, ມີພົນລະເມືອງ 15.889 ຄົນ, ຍິງ 8.123 ຄົນ, ຖືກຜົນກະທົບຕົວຈິງມີ 2.660 ຄອບຄົວ, ພົນລະເມືອງມີ 11.873 ຄົນ, ຍິງ 6.010 ຄົນ, ເນື້ອທີ່ທຳການຜະລິດເຂົ້າໃນ 24 ບ້ານ ມີທັງໝົດ 3.665 ເຮັກຕາ; ໃນນັ້ນ, ຖືກຖ້ວມມີ 2.550 ເຮັກຕາ ເສຍຫາຍ 1.897 ເຮັກຕາ ເນື້ອທີ່ສວນຖືກນໍ້າຖ້ວມເສຍຫາຍ 39 ເຮັກຕາ, ສັດລ້ຽງຕາຍ 1,351 ໂຕ; ໃນນັ້ນ, ຄວາຍ 6 ໂຕ, ງົວ 16 ໂຕ, ແບ້ 77 ໂຕ, ໝູ114 ໂຕ, ສັດປີກ 1.138 ໂຕ, ໜອງປາ 107 ໜອງ ແລະ ເສັ້ນທາງເລກທີ 12 E ຖືກເສຍຫາຍໝັກ ບໍ່ສາມາດສັນຈອນໄປມາໄດ້ ປະເມີນມູນຄ່າຄວາມເສຍຫາຍເບື້ອງຕົ້ນມີມູນຄ່າຫລາຍກວ່າ 1,5 ຕື້ກີບ; ໃນນັ້ນ,ໂຮງຮຽນຖືກນໍ້າຖ້ວມ 3 ແຫ່ງ ລວມມູນຄ່າຄວາມເສຍຫາຍຫລາຍກວ່າ 12.600.000 ກີບ, ສຸກສາລາເສຍຫາຍ 8 ແຫ່ງ ມູນຄ່າຫລາຍກວ່າ 33.172.900 ກີບ.

ທ່ານ ບຸນປອນ ບຸດຕະນະວົງ ໄດ້ມີຄໍາເຫັນໂອ້ລົມ ວ່າ:​ ອຳນາດການປົກຄອງຂັ້ນແຂວງ ແລະ ຂັ້ນເມືອງ ແມ່ນໄດ້ເອົາໃຈໃສ່ໃນການຕິດຕາມຜົນກະທົບໄຟນໍ້າຖ້ວມ ຢ່າງໃກ້ຊິດຕິດແທດ ກັບສະພາບການໂຕຈິງ ແຕ່ແນວໃດກໍ່ຕາມພາຍຫລັງນ້ຳລົງ ໃຫ້ອຳນາດການປົກຄອງຈົ່ງເອົາໃຈໃສ່ຊຸກຍູ້ໃຫ້ປະຊາຊົນທຳການຜະລິດຄືນ ທັງປູກພືດທົດແທນເພື່ອຫລຸດຜ່ອນການຂາດແຄນສະບຽງອາຫານໃນຕໍ່ໜ້າ ທ່ານຍັງໄດ້ເນັ້ນໜັກໃຫ້ການນຳຂັ້ນແຂວງ ແລະ ຂັ້ນເມືອງ ຈົ່ງຊອກຫາແນວພັນຕ່າງໆ ມາຊ່ວຍເຫລືອປະຊາຊົນ ເພື່ອນຳມາທຳການຜະລິດ.