ໃນວັນທີ 28-31 ມີນາ 2025 ທ່ານ ນາງ ພູທອນ ແກ້ວພູວົງ ຮອງປະທານສະພາປະຊາຊົນແຂວງສະຫວັນນະເຂດ, ມີບັນດາທ່ານຮອງປະທານຄະນະກໍາມະການ ເສດຖະກິດ, ແຜນການ ແລະ ການເງິນ, ບັນດາທ່ານສະມາຊິກສະພາປະຊາຊົນແຂວງ ປະຈຳເຂດເລືອກຕັ້ງເມືອງ, ຕາງໜ້າພະແນກກະສິກຳ ແລະ ປ່າໄມ້ແຂວງ, ພະແນກໂຍທາທິການ ແລະ ຂົນສົ່ງແຂວງ, ພ້ອມດ້ວຍຄະນະລົງເຄື່ອນໄຫວ ຕິດຕາມກວດກາ ແລະ ຊຸກຍູ້ການຈັດຕັ້ງປະຕິບັດ ແຜນພັດທະນາເສດຖະກິດ-ສັງຄົມ, ແຜນງົບປະມານແຫ່ງລັດ ແລະ ແຜນການລົງທຶນຂອງລັດ ຕາມມະຕິສະພາປະຊາຊົນແຂວງຮັບຮອງເອົາໃນໄລຍະຜ່ານມາ ຢູ່ເມືອງສອງຄອນ, ເມືອງໄຊພູທອງ ແລະ ເມືອງຈຳພອນ, ໃຫ້ກຽດຕ້ອນຮັບໂດຍທ່ານເຈົ້າເມືອງ; ຮອງເຈົ້າເມືອງ, ຄະນະນຳຂອງເມືອງ ແລະ ບັນດາຫົວໜ້າຫ້ອງການ ເຂົ້າຮ່ວມໃນການເຄື່ອນໄຫວ.
ຜ່ານການຮັບຟັງການລາຍງານໂດຍສັງເຂບ ຂອງທ່ານ ເລຂາພັກເມືອງແຕ່ລະເມືອງ ແລະ ລົງສຳຫຼວດພາກສະໝາມຕົວຈິງ ກ່ຽວກັບການຈັດຕັ້ງປະຕິບັດໂຄງການລົງທຶນຂອງລັດຢູ່ຂັ້ນເມືອງ ມີໂຄງການບຸກເບີກ-ສ້ອມແປງເສັ້ນທາງ ເລກທີ RR6690 ແຕ່ບ້ານສິງທ່າ ຫາ ບ້ານ ດອນມ່ວງ ເມືອງສອງຄອນ ລວງຍາວ 16,6 ກິໂລແມັດ, ກວ້າງ 6 ແມັດ, ການຈັດຕັ້ງປະຕິບັດໂຄງການດັ່ງກ່າວນີ້ ແມ່ນໄດ້ຈັດຕັ້ງປະຕິບັດມາໄດ້ໄລຍະໜຶ່ງແລ້ວ ຄະນະກຳມະການຄຸ້ມຄອງໂຄງການຂັ້ນເມືອງໄດ້ລົງຕິດຕາມ ກວດກາພາກສະໜາມ 2 ຄັ້ງ ຄື: ຄັ້ງທີ 1 ກວດກາປົກກະຕິ, ຄັ້ງທີ2 ກວດກາຕາມການແຈ້ງເຊີນຂອງເຈົ້າຂອງໂຄງການ(ກວດ 100%) ພາຍຫຼັງລົງກວດກາ ແມ່ນບໍ່ໄດ້ຕາມການສະເໜີ ແລະ ພົບເຫັນຫຼາຍບັນຫາ ເຊິ່ງບໍ່ສາມາດ ເຊັນຜ່ານໄດ້; ຕ້ອງໃຫ້ບໍລິສັດຜູ້ຮັບເໝົາເຂົ້າໄປປັບປຸງ ແລະ ແກ້ໄຂຄືນໃໝ່ ເປັນຕົ້ນ: ໃຫ້ຖົມດິນຫຼັງທໍ່ ແຕ່ລະຈຸດຄືນໃໝ່ພ້ອມອັດແໜ້ນ, ໃຫ້ຖົມດິນຍົກລະດັບພ້ອມອັດແໜ້ນຈຸດທີ່ຍັງຕ່ຳ 2 ຈຸດ, ໃຫ້ຖົມດິນ ໜ້າທາງຈຸດທີ່ຍັງບວມພ້ອມອັດແໜ້ນ ແລະ ຖົມດິນ ແຕ່ຂອບທາງຫາໃຈກາງທາງເບື້ອງລະ 2 ແມັດ, ອະນາໄມປາກທໍ່ ແລະ ທ້າຍທໍ່ໃນທຸກຈຸດທີ່ໄດ້ວາງທໍ່ ຫຼັງຈາກນັ້ນກໍ່ໄດ້ຢ້ຽມຢາມຟາມລ້ຽງໄກ່ ຢູ່ບ້ານມະໄລທອງ ເມືອງສອງຄອນຕື່ມອີກ, ໃນວັນຕໍ່ມາຄະນະກໍ່ໄດ້ລົງສຳຫຼວດ ໂຄງການສົມທົບທຶນ 50% ຂອງແຂວງ ກັບ ກະຊວງ ຍທຂ ກໍ່ສ້າງຂົວ 4 ແຫ່ງ ຕາມທາງຫຼວງແຫ່ງຊາດ ເລກທີ 11 E ແຕ່ເຮືອນຫີນ ຫາ ທ່າປະຊຸມ ເມືອງໄຊພູທອງ, ມູນຄ່າ ລວມ 61,735.99 ລ້ານກີບ, ຕໍ່ຈາກນັ້ນ ກໍ່ໄດ້ ສຳຫຼວດໂຄງການກໍ່ສ້າງຂົວເບຕົງຫ້ວຍຊຽງບານ, ລວງຍາວ 50 ແມັດ, ເສັ້ນທາງເລກທີ RR 6303 ແຕ່ທາງແຍກທີ 13 ໃຕ້ (ບ້ານ ຫຼັກ 35) ຫາ ເທສະບານເມືອງ ຈຳພອນ, ເປັນໂຄງການສະເໜີໃໝ່ ປີ 2025 ງົບປະມານ 100% ຂອງໂຄງການປົກກະຕິ, ໄລຍະປະຕິບັດ 2025-2027, ໄລຍະການຊໍາລະ 2025-2029, ມູນຄ່າສະພາແຫ່ງຊາດຮັບຮອງ 28,913.22 ລ້ານກີບ, ແຜນການປີ 2025 ຈັດງົບປະມານໃສ່ 500.00 ລ້ານກີບແລະ ສຳຫຼວດໂຄງການສ້ອມແປງຄັນຝາຍສຸຍ ເມືອງຈໍາພອນ, ເປັນໂຄງການສຶບຕໍ່, ໄລຍະປະຕິບັດ 2024-2026, ໄລຍະການຊໍາລະ 2024-2028, ມູນຄ່າສັນຍາຮັບເໝົາໂຄງການ 6,247.64 ລ້ານກີບ, ໃນວັນດຽວກັນນັ້ນທາງຄະນະກໍ່ໄດ້ໄປຢ້ຽມຢາມຟາມລ້ຽງໝູພັນ ເມືອງໄຊພູທອງ ແລະ ຢ້ຽມຢາມໂຮງງານປຸງແຕ່ງຜະລິດຕະພັນຢາພື້ນເມືອງ ທ່ານ ໝໍ ສີທຸຍ ສີຈັນທອນ ບ້ານແກ້ງກອກທົ່ງ ເມືອງຈຳພອນ ອີກດ້ວຍ