ໃນຄັ້ງວັນທີ 21-22 ສິງຫາ 2024 ທີ່ຜ່ານມາ ທ່ານ ສົມສີ ມະນີນິນ ກໍາມະການພັກແຂວງ, ຮອງປະທານສະພາປະຊາຊົນແຂວງ ສົມທົບກັບ ທ່ານ ນາງ ສົມຫວັງ ມູນສິງໂຄດ ຮອງເລຂາພັກເມືອງ, ຫົວໜ້າຄະນະ ສສຂ ປະຈຳເຂດເລືອກຕັ້ງເມືອງມຸນລະປະໂມກ ພ້ອມຄະນະ ສສຂ ປະຈຳເຂດເລືອກຕັ້ງເມືອງ ລົງພົບປະຢ້ຽມຢາມ ຜູ້ມີສິດເລືອກຕັ້ງ ຢູ່ຫຼາຍຈຸດຄື: ບ້ານດອນນາງລອຍ(ຄຸ້ມບ້ານໃຫຍ່), ບ້ານນາ ແລະ ບ້ານໃໝ່ ໂດຍການໄດ້ຮັບການຕ້ອນຮັບຈາກຄະນະພັກຮາກຖານກຸ່ມ I ເວີນແຄນ, ອົງການປົກຄອງບ້ານ ພ້ອມດ້ວຍພໍ່ແມ່ປະຊາຊົນຢ່າງອົບອຸ່ນ.

ການເຄື່ອນໄຫວຂອງ ທ່ານ ສົມສີມະນີນິນ ຮອງປະທານສະພາປະຊາຊົນແຂວງຈໍາປາສັກ ພ້ອມຄະນະ ໄດ້ຮັບຟັງການລາຍງານ ຫຍໍ່ກ່ຽວກັບສະພາບລວມ ແລະ ການຈັດຕັ້ງປະຕິບັດວຽກງານໃນໄລຍະຜ່ານມາ ຈາກຕາງໜ້າອົງການປົກຄອງຂອງບັນດາບ້ານທີ່ລົງເຄື່ອນໄຫວ ໃນໂອກາດດັ່ງກ່າວນີ້, ທ່ານຮອງປະທານສະພາປະຊາຊົນແຂວງຈໍາປາສັກ ພ້ອມດ້ວຍບັນດາທ່ານສະມາຊິກສະພາແຫ່ງຊາດ ແລະ ສະມາຊິກສະພາປະຊາຊົນແຂວງ ໄດ້ພົບປະໂອ້ລົມໂດຍນໍາເອົາເນື້ອໃນສຳຄັນຕ່າງໆ ທີ່ຮັບຮອງໃນກອງປະຊຸມສະໄໝສາມັນ ເທື່ອທີ 7 ຂອງສະພາແຫ່ງຊາດ ຊຸດທີ IX ແລະ ສະພາປະຊາຊົນແຂວງຈໍາປາສັກ ຊຸດທີ II, ຕິດພັນກັບແນວທາງນະໂຍບາຍຂອງພັກ, ລະ ບຽບກົດໝາຍຂອງລັດ ມາເຜີຍແຜ່, ເຊື່ອມຊຶມ ໃຫ້ພໍ່ແມ່ປະຊາຊົນຜູ້ມີສິດເລືອກຕັ້ງຮັບຮູ້ເຂົ້າໃຈ. ພ້ອມດຽວກັນ, ອົງການປົກຄອງ ແລະ ພໍ່ແມ່ປະຊາຊົນທີ່ເຂົ່າຮ່ວມໃນການພົບປະຍັງໄດ້ໃຊ້ສິດປະຊາທິປະໄຕຂອງຕົນໃນການປະກອບຄໍາຄິດເຫັນ, ຄໍາສະເໜີ ຍົກໃຫ້ເຫັນຫຼາຍບັນຫາສໍາຄັນ ທີ່ເປັນບັນຫາຕິດພັນກັບຊີວິດການເປັນຢູ່ ແລະ ການພັດທະນາເສດຖະກິດ-ສັງຄົມ ຂອງທ້ອງຖິ່ນ ຕໍ່ກັບຄໍາສະເໜີຂອງປະຊາຊົນ ບັນດາທ່ານສະມາຊິກສະພາປະຊາຊົນແຂວງ ໄດ້ຊີ້ແຈງອະທິບາຍຕໍ່ບາງຄໍາສະເໜີໃຫ້ປະຊາຊົນໄດ້ເຂົ້າໃຈເຖິງສາເຫດ ແລະ ຄວາມຈໍາເປັນ ແລະ ຮັບເອົາຄໍາສະເໜີທີ່ເປັນບັນຫາໃຫຍ່ຕິດພັນກັບການຈັດຕັ້ງປະຕິບັດວຽກງານຂອງຂະແໜງການຕ່າງໆ ເຊິ່ງກອງເລຂາໄດ້ບັນທຶກຂໍ່ມູນຢ່າງລະອຽດ ເພື່ອນໍາໄປສັງລວມລາຍງານຕໍ່ຄະນະປະຈໍາສະພາປະຊາຊົນແຂວງຈໍາປາສັກ ພິຈາລະນາຊຸກຍູ້ໃຫ້ພາກສ່ວນກ່ຽວຂ້ອງແກ້ໄຂໃນຂັ້ນຕອນຕໍ່ໄປ. ຄະນະຂອງທ່ານຮອງປະທານສະພາປະຊາຊົນແຂວງຈໍາປາສັກ ຈະໄດ້ສຶບຕໍ່ລົງເຄື່ອນໄຫວອີກຫຼາຍຈຸດຂອງເຂດເລືອກຕັ້ງເມືອງມຸນລະປາໂມກ ຈິ່ງຈະສໍາເລັດຕາມຄາດໝາຍທີ່ວາງໄວ້.

ຂ່າວ-ພາບ: ສຸລິຍາ ເພັງສະຫວັດ