ໃນວັນທີ 22 ສິງຫາ 2024 ນີ້ ທ່ານ ແກ້ວລັດຕະນະ ສີຫາວົງ ຮອງປະທານສະພາປະຊາຊົນແຂວງຈໍາປາສັກ, ຮອງປະທານຄະນະສະມາຊິກສະພາແຫ່ງຊາດ ປະຈຳເຂດເລືອກຕັ້ງທີ 15 ແຂວງຈຳປາສັກ ສົມທົບກັບທ່ານ ດຣ ວຽງສີ ສຸພັກດີ ສະມາຊິກສະພາປະຊາຊົນແຂວງ ປະຈຳເຂດເລືອກຕັ້ງເມືອງໂຂງ, ທ່ານໄກສອນ ລາດຊະວົງ ສະມາຊິກສະພາປະຊາຊົນແຂວງ ປະຈຳເຂດເລືອກຕັ້ງເມືອງໂຂງ ແລະ ທ່ານ ປອ ສິດທິພອນ ບຸດຕິວົງ ສະມາຊິກສະພາປະຊາຊົນແຂວງ ປະຈຳເຂດເລືອກຕັ້ງເມືອງໂຂງ ໄດ້ສືບຕໍ່ເຄື່ອນໄຫວພົບຢ້ຽມຢາມປະຊາຊົນ ຢູ່ຈຸດບ້ານເວີຍຂ່າວ ແລະ ບ້ານໂສ້ມໂຮງ ເມືອງໂຂງ

ໃນໂອກາດລົງພົບປະຢ້ຽມຢາມພໍ່ແມ່ປະຊາຊົນໃນຄັ້ງນີ້ ບັນດາທ່ານສະມາຊິກສະພາແຫ່ງຊາດ ແລະ ສະມາຊິກສະພາປະຊາຊົນແຂວງ ໄດ້ນໍາເອົາບັນດາເນື້ອໃນສໍາຄັນ ທີ່ໄດ້ຮັບຮອງໃນກອງປະຊຸມສະໄໝສາມັນເທື່ອທີ 07 ຂອງສະພາແຫ່ງຊາດຊຸດທີ 9 ແລະ ສະພາປະຊາຊົນແຂວງຈໍາປາສັກ ລວມທັງແນວທາງນະໂຍບາຍຂອງພັກ, ລະບຽບກົດໝາຍຂອງລັດ ເຜີຍແຜ່ໃຫ້ອໍານາດການປົກຄອງ ແລະ ພໍ່ແມ່ປະຊາຊົນມີຄວາມຮັບຮູ້, ເຊື່ອມຊຶມຢ່າງເລິກເຊິ່ງ ຕິດພັນກັບການເກັບກໍາຄໍາຄິດເຫັນ, ຄໍາສະເໜີຂອງຜູ້ມີສິດເລືອກຕັ້ງໃນເຂດດັ່ງກ່າວ ເພື່ອນໍາໄປຊຸກຍູ້ອົງການປົກຄອງ ກໍ່ຄືຂະແໜງການທີ່ກ່ຽວຂ້ອງຂັ້ນຕ່າງໆແກ້ໄຂ.