ເພື່ອຕິດຕາມ ແລະ ຊຸກຍູ້ການຈັດຕັ້ງປະຕິບັດລັດຖະທໍາມະນູນ, ກົດໝາຍ ຕາມພາລະບົດບາດ, ຂອບເຂດສິດ ແລະ ໜ້າທີ່ ຂອງຄະນະກໍາມະການຍຸຕິທໍາ ແລະ ປ້ອງກັນຊາດ-ປ້ອງກັນຄວາມສະຫງົບ ສະພາປະຊາຊົນແຂວງ ທີ່ໄດ້ກໍານົດໄວ້ໃນກົດໝາຍ ວ່າດ້ວຍ ການຕິດຕາມກວດກາ, ສະນັ້ນມາໃນລະຫວ່າງວັນທີ 4 ມິຖຸນາ 2024 ທ່ານ ວຽງໄຊ ສີວິໄລ ຮອງປະທານສະພາປະຊາຊົນແຂວງ ພ້ອມດ້ວຍພະນັກງານສະພາປະຊາຊົນແຂວງ ໄດ້ລົງຕິດຕາມກວດກາ ແລະ ຊຸກຍູ້ການຈັດຕັ້ງປະຕິບັດລັດຖະທໍາມະນູນ ແລະ ກົດໝາຍ ຢູ່ເມືອງໝອກ. ໂດຍການໃຫ້ກຽດເຂົ້າຮ່ວມຂອງທ່ານ ພັອ ມີສຸກ ຂັນທະຍົງທອງ ເລຂາພັກເມືອງ ເຈົ້າເມືອງໆໝອກ, ມີສະມາຊິກສະພາປະຊາຊົນແຂວງ ປະຈໍາເມືອງໝອກ, ບັນທ່ານຫົວໜ້າ-ຮອງຫົວໜ້າ ແລະ ພະນັກງານທີ່ທີ່ຢູ່ໃນຂົງເຂດຍຸຕິທໍາ ແລະ ປກຊ-ປກສ ເຂົ້າຮ່ວມ.

ໃນໂອກາດທີ່ໄດ້ລົງຕິດຕາມກວດກາໃນຄັ້ງນີ້, ທ່ານ ພັອ ມີສຸກ ຂັນທະຍົງທອງ ເລຂາພັກເມືອງ ເຈົ້າເມືອງໆໝອກ ໄດ້ລາຍງານສະພາບ ການເຄື່ອນໄຫວວຽກງານຂົງເຂດຍຸຕິທໍາ ແລະ ປກຊ-ປກສ ຢູ່ເມືອງໝອກໃນໄລຍະຜ່ານມາ, ຮັບຟັງບົດລາຍງານໂດຍຫຍໍ້ ການຈັດຕັ້ງປະຕິບັດລັດຖະທໍາມະນູນ ແລະ ກົດໝາຍ ການຈັດຕັ້ງປະຕິບັດວາລະແຫ່ງຊາດ ວ່າດ້ວຍ ການແກ້ໄຂບັນຫາຢາເສບຕິດ ຂອງກອງບັນຊາການປກສ ແລະ ປກຊ, ຮັບຟັງບົດລາຍງານໂດຍຫຍໍ້ ຂອງຫ້ອງການສະຫະພັນນັກຮົບເກົ່າເມືອງ, ຮັບຟັງບົດລາຍງານໂດຍຫຍໍ້ ການຈັດຕັ້ງປະຕິບັດລັດຖະທໍາມະນູນ ແລະ ກົດ ໝາຍ, ການຈັດຕັ້ງປະຕິບັດຄໍາຕັດສິນຂອງສານ ຂອງຫ້ອງການຍຸຕິທໍາເມືອງ ແລະ ຮັບຟັງບົດລາຍງານໂດຍຫຍໍ້ກ່ຽວກັບວຽກງານປ້ອງກັນຊາຍແດນ ແລະ ແກ້ໄຂບັນຫາຢາເສບຕິດ ທີ່ແລບຕາມຊາຍແດນໄລຍະຜ່ານມາເຊິ່ງຍົກໃຫ້ເຫັນເຖິ່ງ ຂໍ້ສະດວກ, ຂໍ້ຫຍຸ້ງຍາກ ແລະ ສະພາບຄວາມເປັນຈິງຂອງການເຄື່ອນໄຫວວຽກງານ, ພ້ອມນັ້ນຄະນະສະມາຊິກສະພາປະຊາຊົນແຂວງ ຍັງໄດ້ມີເຈາະຈິ້ມຄໍາຖາມເຈາະຈິ້ມທີ່ກ່ຽວພັນກັບບັນດາຫ້ອງການຂອງເມືອງເປັນຕົ້ນແມ່ນ: ການປະຕິບັດຄໍາຕັດສິນຂອງສານ, ບັນຫາຢາເສບຕິດ, ການກວດສຸຂະພາບຂອງກໍາລັງ, ການຄຸ້ມຄອງອາວຸດຕ່າງໆ, ການພົວພັນປະສານງານກັບພາກສ່ວນຕ່າງໆ,  ແລະ ອື່ນໆອີກ. ນອກນັ້ນບັນດາຜູ້ແທນກອງປະຊຸມໄດ້ມີຄໍາສະເໜີຕໍ່ສະພາປະຊາຊົນແຂວງ ໃຫ້ຂັ້ນເທິ່ງຄົ້ນຄວ້າ ແລະ ຂໍທິດຊີ້ນຳ ເພື່ອສະດວກໃນການຈັດຕັ້ງປະຕິບັດໜ້າ ທີ່ວຽກງານ ໃຫ້ມີຄວາມ ຖືກຕ້ອງ ແລະ ສອດຄ່ອງກັບສະພາບ ຄວາມເປັນຈິງ.

ນອກນັ້ນ ທ່ານ ວຽງໄຊ ສີວິໄລ ຍັງໄດ້ຊີ້ນໍາ ໃຫ້ຄະນະພັກ, ຄະນະນໍາອົງການປົກຄອງເມືອງ ຈົ່ງຈັດຕັ້ງປະຕິບັດໜ້າທີ່ວຽກງານຂອງຕົນ ໃຫ້ຖືກຕ້ອງ ແລະ ສອດຄ່ອງກັບສະພາບຄວາມເປັນຈິງ ບົນພື້ນຖານສອດຄອງກັບລັດຖະທຳມະນູນ, ກົດໝາຍ, ສືບຕໍ່ປະຕິບັດສິດ ແລະ ໜ້າທີ່ຂອງຕົນ, ເອົາໃຈໃສ່ພົວພັນປະສານງານກັບຂະແໜງການທີ່ກ່ຽວຂ້ອງ ໃຫ້ຈອດກັນ ເພື່ອໃຫ້ສະດວກໃນການຈັດຕັ້ງປະຕິບັດວຽກງານ.

ສະພາປະຊາຊົນແຂວງຊຽງຂວາງ

ຂ່າວໂດຍ: ນາງ ສຸກສະຫວັນ ອິນທະແສງ