….ໃນລະຫວ່າງວັນທີ 5-8 ກຸມພາ 2024, ທ່ານ ສົມຈິດ ຫັບລະກອນ ກໍາມະການຄະນະປະຈໍາພັກແຂວງ, ຮອງປະທານສະພາປະຊາຊົນແຂວງ, ສະມາຊິກສະພາແຫ່ງຊາດ ປະຈໍາເຂດເລືອກຕັ້ງທີ 2 (ສສຊ) ພ້ອມດ້ວຍຄະນະທີມງານສະມາຊິກສະພາປະຊາຊົນແຂວງ (ສສຂ) ປະຈໍາເມືອງຍອດອູ ມີ ທ່ານ ທອງສີ ອິນຈັກ ຮອງເລຂາພັກເມືອງ, ປະທານກວດກາພັກ-ລັດເມືອງ, ຫົວໜ້າຄະນະ ສສຂ ປະຈໍາເມືອງຍອດອູ ແລະ ທ່ານ ນາງ ສີວັນ ລາວເຊີງ ຮອງປະທານສະຫະພັນກໍາມະບານເມືອງ, ສສຂ ປະຈໍາເມືອງຍອດອູ ໄດ້ສໍາເລັດການລົງເຜີຍແຜ່ເນື້ອໃນຜົນສໍາເລັດ ກອງປະຊຸມສະໄໝສາມັນ ເທື່ອທີ 6 ຂອງສະພາແຫ່ງຊາດ ຊຸດທີ IX ແລະ ສະພາປະຊາຊົນແຂວງ ຊຸດທີ II ທີ່ເມືອງຍອດອູ ແຂວງຜົ້ງສາລີ, ເຊິ່ງປະກອບມີ 11 ຈຸດ: 1 ຈຸດເທດສະບານ; 8 ບ້ານ (ບ. ສຸລິນ, ບ. ງ້ອງ, ບ. ແກ່ງ, ບ. ເປີລາວວູ, ບ. ຫ້ວຍຍູມ, ບ. ແຊວໂຮແປນ, ບ. ນໍ້າມ່ານ້ອຍ, ບ. ນໍ້າມ່າໃຫຍ່); 2 ກອງຮ້ອຍ (ກອງຮ້ອຍ 111, ກອງຮ້ອຍ 118); ທີ່ຈຸດເທດສະບານແມ່ນໄດ້ຮ່ວມກັນເປັນປະທານກອງປະຊຸມຂອງ ສສຊ ແລະ ບັນດາທ່ານ ສສຂ ເປັນກຽດເຂົ້າຮ່ວມຮັບຟັງມີ ທ່ານ ສົມຫວັງ ສຸມວິໄລ ກໍາມະການພັກແຂວງ, ເລຂາພັກເມືອງ ເຈົ້າເມືອງຍອດອູ, ມີບັນດາທ່ານກໍາມະການປະຈໍາພັກເມືອງ, ກໍາມະການພັກເມືອງ, ຫົວໜ້າ-ຮອງຫົວໜ້າຫ້ອງການ, ອົງການທຽບເທົ່າ, ພະນັກງານ-ລັດຖະກອນ, ນາຍ ແລະ ພົນທະຫານ, ນາຍ ແລະ ພົນຕໍາຫຼວດ, ລັດວິສາຫະກິດ, ໂຮງຮຽນ, ໂຮງໝໍ ຕະຫຼອດຮອດເລຂາພັກນາຍບ້ານ ສະເພາະຢູ່ເທດສະບານເມືອງຍອດອູ ມີຜູ້ເຂົ້າຮ່ວມ 189 ທ່ານ, ຍິງ 83 ທ່ານ. ບັນດາບ້ານ, ກອງຮ້ອຍ ທີ່ຢູ່ເຂດຫ່າງໄກສອກຫຼີກຈາກເທດສະບານ ແມ່ນໄດ້ແບ່ງອອກເປັນ 2 ທີມງານ ເພື່ອລົງພົບປະກັບປະຊາຊົນຜູ້ມີສິດເລືອກຕັ້ງ, ການເຄື່ອນໄຫວໃນແຕ່ລະຈຸດມີເລຂາຄະນະພັກຮາກຖານກຸ່ມ, ນາຍບ້ານ, ອໍານາດການປົກຄອງບ້ານທີ່ກ່ຽວຂ້ອງ ພ້ອມດ້ວຍພໍ່ແມ່ປະຊາຊົນຜູ້ມີສິດເລືອກຕັ້ງໃນແຕ່ລະຈຸດ ເຂົ້າຮ່ວມ 823 ທ່ານ, ຍິງ 197 ທ່ານ.

….ການລົງພົບປະກັບປະຊາຊົນຜູ້ມີສິດເລືອກຕັ້ງໃນຄັ້ງນີ້, ແມ່ນເພື່ອນໍາເອົາເນື້ອໃນຈິດໃຈຜົນສໍາເລັດກອງປະຊຸມສະໄໝສາມັນ ເທື່ອທີ 6 ຂອງສະພາແຫ່ງຊາດ ຊຸດທີ IX ແລະ ສະພາປະຊາຊົນແຂວງ ຊຸດທີ II ຕິດພັນກັບ 2 ວາລະແຫ່ງຊາດ, ບົດຊີ້ແຈງຂອງບັນດາທ່ານລັດຖະມົນຕີ ຕໍ່ກອງປະຊຸມສະພາແຫ່ງຊາດ, ເອກະສານມູນເຊື້ອກອງທັບປະຊາຊົນລາວ ຄົບຮອບ 75 ປີ ແລະ ເອກະສານລະນຶກວັນເກີດຂອງ ປະທານ ຄໍາໄຕ ສີພັນດອນ ຄົບຮອບ 100 ປີ ເພື່ອໄປຈັດຕັ້ງຜັນຂະຫຍາຍຕາມພາລະບົດບາດ, ສິດ ແລະ ໜ້າທີ່ ໃນການເປັນຕົວແທນແຫ່ງສິດ ແລະ ຜົນປະໂຫຍດອັນຊອບທຳຂອງປະຊາຊົນບັນດາເຜົ່າ ທັງເປັນການຫັນລົງຮາກຖານ, ເກັບກໍາບັນດາສະພາບການ, ຄໍາຄິດຄໍາເຫັນ, ຄໍາສະເໜີຕ່າງໆ ຂອງຜູ້ມີສິດເລືອກຕັ້ງ ແລະ ທັງເປັນການຢ້ຽມຢາມຖາມຂ່າວປະຊາຊົນເຂດຫ່າງໄກສອກຫຼີກ. ໃນການລົງເຜີຍແຜ່ຄັ້ງນີ້, ໄດ້ຮັບຟັງການລາຍງານສະພາບການພັດທະນາເສດຖະກິດ-ສັງຄົມ, ຂໍ້ສະດວກ, ຂໍ້ຫຍຸ້ງຍາກ ຈາກນາຍບ້ານ ຂອງແຕ່ລະບ້ານໂດຍຫຍໍ້ ແລະ ຄໍາສະເໜີຕ່າງໆຈາກປະຊາຊົນ. ພ້ອມດຽວກັນນັ້ນ, ທ່ານ ຮອງປະທານສະພາປະຊາຊົນແຂວງ ແລະ ສສຂ ກໍໄດ້ຊີ້ແຈງອະທິບາຍຕໍ່ບາງຄຳສະເໜີດັ່ງກ່າວໃຫ້ປະຊາຊົນຮັບຮູ້ເຂົ້າໃຈ ແລະ ຍັງໄດ້ເກັບກໍາ, ນໍາເອົາບາງຄຳສະເໜີ ຂອງປະຊາຊົນທີ່ຍັງເຫັນວ່າມີຄວາມຫຍຸ້ງຍາກໃນແຕ່ລະບ້ານ ໂດຍສະເພາະແມ່ນກ່ຽວກັບພື້ນຖານໂຄງລ່າງ ເພື່ອນໍາມາຄົ້ນຄວ້າ, ພິຈາລະນາ ແລະ ສັງລວມສົ່ງໃຫ້ພາກສ່ວນກ່ຽວຂ້ອງ ໃຫ້ຮີບຮ້ອນແກ້ໄຂຕາມຄວາມເໝາະສົມ ແລະ ທັນຕາມກຳນົດເວລາ.

….ນອກຈາກນີ້, ທ່ານຮອງປະທານສະພາປະຊາຊົນແຂວງ ພ້ອມດ້ວຍຄະນະທີມງານ ສສຂ ປະຈໍາເມືອງ ຍັງໄດ້ນໍາເອົາເຄື່ອງອຸປະໂພກ-ບໍລິໂພກ, ອຸປະກອນກິລາປະເພດບານຕີ ແລະວັດຖຸປັດໄຈ ຈໍານວນໜຶ່ງ ມອບໃຫ້ນາຍ ແລະ ພົນທະຫານ ຂອງກອງຮ້ອຍ 111, ກອງຮ້ອຍ 118 ແລະ ອໍານາດການປົກຄອງບ້ານໃນແຕ່ລະບ້ານ; ການລົງພົບປະເຄື່ອນໄຫວໃນຄັ້ງນີ້ ໄດ້ໃຊ້ເວລາ 4 ວັນ ແລະ ສໍາເລັດຜົນຕາມຄາດໝາຍທີ່ວາງໄວ້.