ໃນຕອນເຊົ້າ ຂອງວັນທີ 6 ມີນາ 2023 ຄະນະສະມາຊິກສະພາປະຊາຊົນແຂວງ ປະຈຳເຂດເລືອກຕັ້ງເມືອງນານ ໄດ້ຈັດກອງປະຊຸມສະຫຼຸບການຈັດຕັ້ງປະຕິບັດວຽກງານ ປີ 2022 ແລະທິດທາງແຜນການ ປີ 2023 ຂອງຄະນະສະມາຊິກສະພາປະຊາຊົນແຂວງ ປະຈຳເຂດເລືອກຕັ້ງເມືອງນານ, ໂດຍໃຫ້ກຽດເປັນປະທານຮ່ວມຂອງ ທ່ານ ສົມພອນ ສີອຸດົມພັນ ກຳມະການພັກແຂວງ, ຮອງປະທານສະພາປະຊາຊົນແຂວງ ແລະ ທ່ານ ບຸນມີ ບຸນທັນແສງງາມ ຄະນະປະຈຳພັກເມືອງ, ຫົວໜ້າຄະນະສະມາຊິກສະພາປະຊາຊົນແຂວງ ປະຈຳເຂດເລືອກຕັ້ງເມືອງນານ, ໃຫ້ກຽດເຂົ້າຮ່ວມໂດຍ ທ່ານ ຄໍາເກັ່ງ ຈັນທະວີສຸກກຳມະການພັກແຂວງ, ເລຂາຄະນະບໍລິຫານງານພັກເມືອງ, ເຈົ້າເມືອງນານ, ມີຮອງເຈົ້າເມືອງ, ສະມາຊິກສະພາປະຊາຊົນແຂວງ,ຫົວໜ້າ ແລະ ຮອງຫົວໜ້າຫ້ອງການ–ອົງການທຽບເທົ່າຂັ້ນເມືອງ ເຂົ້າຮ່ວມທັງໝົດ 45 ທ່ານ, ຍິງ 8 ທ່ານ; ກອງປະຊຸມໄດ້ຮັບຟັງການລາຍງານ ຈາກ ທ່ານ ອຸ່ນ ດວງມະນີ ສະມາຊິກສະພາປະຊາຊົນແຂວງ ກ່ຽວກັບການຈັດຕັ້ງປະຕິບັດວຽກງານ ປີ 2022 ແລະ

ທິດທາງແຜນການ ປີ 2023 ຂອງຄະນະສະມາຊິກສະພາປະຊາຊົນແຂວງ ປະຈຳເຂດເລືອກຕັ້ງເມືອງນານ ເຊິ່ງໄດ້ຍົກໃຫ້ເຫັນການຈັດຕັ້ງປະຕິບັດພາລະບົດບາດຂອງສະພາປະຊາຊົນແຂວງຢູ່ຂັ້ນເມືອງ, ການພົບປະ ແລະ ໃຫ້ຄໍາປຶກສາແກ່ຜູ້ມີສິດເລືອກຕັ້ງ; ຫຼັງຈາກນັ້ນ ທ່ານ ນາງ ແກ້ວລາ ມະນີຈິດ ຄະນະປະຈຳສະພາ, ເລຂາທິການສະພາປະຊາຊົນແຂວງ ກໍໄດ້ຂຶ້ນຜ່ານມະຕິຂອງຄະນະປະຈຳສະພາປະຊາຊົນແຂວງ ເລກທີ 89 /ຄປຈ, ລົງວັນທີ 6 ຕຸລາ 2022 ວ່າດ້ວຍການຈັດຕັ້ງ ແລະ ການເຄື່ອນໄຫວວຽກງານ ຂອງຄະນະສະມາຊິກສະພາປະຊາຊົນແຂວງ ປະຈຳເຂດເລືອກຕັ້ງເມືອງ–ນະຄອນ; ໃນຕອນທ້າຍກອງປະຊຸມ ທ່ານ ສົມພອນ ສີອຸດົມພັນ ໄດ້ໂອ້ລົມ ເພື່ອເນັ້ນໜັກໃນການຍົກສູງຄວາມຮັບຜິດຊອບທາງດ້ານການເມືອງ ເພື່ອຈັດຕັ້ງປະຕິບັດພາລະບົດບາດ, ສິດ ແລະ ໜ້າທີ່ ຂອງສະພາປະຊາຊົນແຂວງ ທີ່ກຳນົດໄວ້ໃນກົດໝາຍ ໃຫ້ມີປະສິດທິພາບສູງ.

ໃນຕອນແລງຂອງວັນດຽວກັນ, ທ່ານ ສົມພອນ ສີອຸດົມພັນພ້ອມດ້ວຍສະມາຊິກສະພາປະຊາຊົນແຂວງ 3 ທ່ານ, ໄດ້ໄປຢ້ຽມຢາມໂຮງງານຜະລິດແປ້ງມັນຕົ້ນ ຢູ່ບ້ານຫ້ວຍຫຼາ ແລະໂຄງການກໍ່ສ້າງຄອງເໝືອງຊົນລະປະທານນໍ້າແຊງ ຢູ່ເມືອງນານເພື່ອເປັນການຕິດຕາມກວດກາ ແລະ ຊຸກຍູ້ ການຈັດຕັ້ງປະຕິບັດວຽກງານໂຄງການດັ່ງກ່າວອີກດ້ວຍ.

                         ພາບ ແລະ ຂ່າວ: ສາຍເຄນ ປານວິໄລ