(ສພຊ) – ວັນທີ 18 ຕຸລານີ້ ທີ່ສະພາແຫ່ງຊາດ, ທ່ານ ປອ. ໄຊສົມພອນ ພົມວິຫານ ປະທານສະພາແຫ່ງຊາດ ໄດ້ຕ້ອນຮັບການຢ້ຽມຂ່ຳນັບຂອງທ່ານ ໂຊລບັນ ກາຣາ-ໂອລ (Sholban Kara-ool) ຮອງປະທານສະພາດູມາ (ສະພາຕໍ່າ) ແຫ່ງ ສະຫະພັນລັດເຊຍ ພ້ອມດ້ວຍຄະນະ ໃນໂອກາດເດີນທາງມາເຂົ້າຮ່ວມກອງປະຊຸມສະມັດຊາໃຫຍ່ລັດຖະສະພາລະຫວ່າງຊາດອາຊຽນ ຫຼື ໄອປາ (AIPA) ຄັ້ງທີ 45 ໃນຖານະເປັນລັດຖະສະພາສັງເກດການໄອປາ.

ທ່ານ ປອ. ໄຊສົມພອນ ພົມວິຫານ ສະແດງຄວາມປິຕິຍິນດີເປັນຢ່າງຍິ່ງທີ່ໄດ້ຕ້ອນຮັບ ພ້ອມທັງຕີລາຄາສູງຕໍ່ການເດີນທາງມາເຂົ້າຮ່ວມກອງປະຊຸມໄອປາ ຄັ້ງທີ 45 ເຊິ່ງເປັນການປະກອບສ່ວນສໍາຄັນເຂົ້າໃນການເສີມຂະຫຍາຍສາຍພົວພັນມິດຕະພາບອັນເປັນມູນເຊື້ອທີ່ດີງາມລະຫວ່າງສອງປະເທດ ກໍຄືສອງອົງການນິຕິບັດຍັດ ລາວ-ລັດເຊຍ ໃຫ້ນັບມື້ເຂົ້າສູ່ລວງເລິກ ແລະ ເປັນຮູບປະທຳຂຶ້ນເລື້ອຍໆ ໂດຍສະເພາະແມ່ນການຮ່ວມມື ແລະ ການສະໜັບສະໜູນເຊິ່ງກັນແລະກັນ ໃນເວທີລັດຖະສະພາພາກພື້ນ ແລະ ສາກົນ.

ທ່ານ ໂຊລບັນ ກາຣາ-ໂອລ ໄດ້ສະແດງຄວາມຂອບໃຈຕໍ່ທ່ານປະທານສະພາແຫ່ງຊາດ ທີ່ໃຫ້ການຕ້ອນຮັບຢ່າງອົບອຸ່ນ ແລະ ແຈ້ງສະພາບການພົ້ນເດັ່ນໂດຍຫຍໍ້ໃນການພັດທະນາເສດຖະກິດ-ສັງຄົມໃນໄລຍະທ້າຍຂອງສະຫະພັນລັດເຊຍ.

ວັນດຽວກັນ, ທ່ານ ພົທ. ສຸວອນ ເລືອງບຸນມີ ຮອງປະທານສະພາແຫ່ງຊາດ, ປະທານຄະນະມິດຕະພາບລັດຖະສະພາລາວ-ລັດເຊຍ ກໍໄດ້ພົບປະກັບທ່ານຮອງປະທານສະພາດູມາ. ໃນການພົບປະ, ສອງຝ່າຍໄດ້ສະເໜີໃຫ້ສືບຕໍ່ແລກປ່ຽນການຢ້ຽມຢາມລະຫວ່າງຄະນະຜູ້ແທນຂັ້ນສູງ, ຂັ້ນກໍາມາທິການ ແລະ ຄະນະມິດຕະພາບລັດຖະສະພາ ຢ່າງປົກກະຕິ ທີ່ຕິດພັນກັບການແລກປ່ຽນບົດຮຽນການປະຕິບັດພາລະບົດບາດຂອງອົງການນິຕິບັນຍັດ; ສະເໜີໃຫ້ສອງລັດຖະບານສືບຕໍ່ຈັດຕັ້ງປະຕິບັດບັນດາສັນຍາ, ສົນທິສັນຍາ ແລະ ຂໍ້ຕົກລົງ ທີ່ລັດຖະບານຂອງສອງປະເທດໄດ້ລົງນາມຮ່ວມກັນ ໃຫ້ເປັນຮູບປະທຳຂຶ້ນກວ່າເກົ່າ ແລະ ສືບຕໍ່ຊຸກຍູ້ການຈັດຕັ້ງປະຕິບັດບັນດາໂຄງການຕ່າງໆຂອງລັດເຊຍທີ່ມາລົງທຶນຢູ່ ສປປລາວ ໃຫ້ສໍາເລັດຕາມແຜນການ ແລະ ນໍາເອົາຜົນປະໂຫຍດມາສູ່ປະຊາຊົນສອງຊາດຢ່າງແທ້ຈິງ; ສືບຕໍ່ຮ່ວມມື ແລະ ສະໜັບສະໜູນເຊິ່ງກັນແລະກັນໃນເວທີລັດຖະສະພາພາກພື້ນ ແລະ ສາກົນ.

(ນາງ ອາລິນ ສຸພິມມະປະດິດ)