ໂດຍ ປະຕິບັດຕາມຄຳແນະນຳຂອງຄະນະປະຈຳສະພາແຫ່ງຊາດ,ເລກທີ 05/ຄປຈ, ລົງວັນທີ 28 ກໍລະກົດ 2022 ກ່ຽວກັບການຈັດຕັ້ງຜັນຂະຫຍາຍ ແລະ ໂຄສະນາເຜີຍແຜ່ຜົນສຳເລັດກອງປະຊຸມສະໄໝສາມັນເທື່ອທີ 3 ຂອງສະພາແຫ່ງຊາດ ຊຸດທີ IX, ໃນຕອນເຊົ້າຂອງວັນທີ 2 ພະຈິກ 2022 ນີ້, ຢູ່ທີ່ຫ້ອງປະຊຸມ ພະແນກກະສິກໍາ ແລະ ປ່າໄມ້ແຂວງ, ທ່ານ ສົມພອນ ສີອຸດົມພັນ ກຳມະການພັກແຂວງ, ຮອງປະທານຄະນະສະມາຊິກສາພາແຫ່ງຊາດ ປະຈຳເຂດເລືອກຕັ້ງທີ 6, ຮອງປະທານສະພາປະຊາຊົນແຂວງ, ປະທານຄະນະກຳມະການເສດຖະກິດ,ແຜນການ ແລະ ການເງິນ
ໄດ້ລົງໂຄສະນາເຜີຍແຜ່ຜົນສຳເລັດກອງປະຊຸມສະໄໝສາມັນເທື່ອທີ 3 ຂອງສະພາແຫ່ງຊາດ ຊຸດທີ IX ຕິດພັນກັບຜົນສຳເລັດກອງປະຊຸມສະໄໝສາມັນເທື່ອທີ 3 ຂອງສະພາປະຊາຊົນແຂວງ ຊຸດທີ II ທີ່ໄດ້ພິຈາລະນາ ແລະ ຮັບຮອງເອົາຫຼາຍບັນຫາທີ່ສຳຄັນຂອງສູນກາງ ແລະ ຂອງທ້ອງຖິ່ນ, ເພື່ອເຮັດໃຫ້ຖັນແຖວພະນັກງານ-ລັດຖະກອນ ໄດ້ຮັບຮູ້ເນື້ອໃນຈິດໃຈຜົນສຳເລັດຂອງກອງປະຊຸມ ຢ່າງກ້ວາງຂວາງ, ພ້ອມດຽວກັນນີ້ຍັງໄດ້ລົງນາມເຊັນ ບົດບັນທຶກການປະສານງານ ລະຫວ່າງ ປະທານຄະນະກຳມະການເສດຖະກິດ,ແຜນການ ແລະ ການເງິນ ກັບ ຫົວໜ້າພະແນກກະສິກໍາ ແລະ ປ່າໄມ້ແຂວງ, ມີບັນດາຄະນະປະຈໍາ, ຫົວໜ້າໜ້າ, ຮອງຫົວໜ້າຂະແໜງພ້ອມດ້ວຍພະນັກງານ-ລັດຖະກອນ ຂອງສອງພາກສ່ວນ ເຂົ້າຮ່ວມເປັນສັກຂີ່ພະຍານໃນຄັ້ງນີ້ດ້ວຍ.
ໃນການລົງນາມເຊັນບົດບັນທຶກການປະສານງານໃນຄັ້ງນີ້ເພື່ອເປັນພື້ນຖານ, ບ່ອນອີງ ແລະ ເປັນໃຈກາງໃນການປະສານງານອໍານວຍຄວາມສະດວກໃນການເຄື່ອນໄຫວວຽກງານ ຂອງຄະນະກໍາມະການເສດຖະກິດ, ແຜນການ ແລະ ການເງິນ ກັບ ພະແນກກະສິກໍາ ແລະ ປ່າໄມ້ແຂວງ ໃນການຈັດຕັ້ງປະຕິບັດ ພາລະບົດບາດ, ສິດ ແລະ ໜ້າທີ່ ຂອງຕົນໃຫ້ມີປະສິດທິພາບ, ປະສິດທິຜົນ, ວ່ອງໄວ ແລະ ຮັດກຸມ ພ້ອມທັງເພີ່ມທະວີ ພາລະບົດບາດໃນການຕິດຕາມກວດກາການຈັດຕັ້ງປະຕິບັດ ລັດຖະທໍາມະນູນ, ກົດໝາຍ ແລະ ນິຕິກໍາໃຕ້ກົດໝາຍ, ນອກຈາກນັ້ນທ່ານຍັງໄດ້ເນັ້ນໜັກໃຫ້ບັນດາ ຄະນະປະຈໍາ, ພະນັກງານ-ລັດຖະກອນ ພາຍໃນພະແນກຈົ່ງຍົກສູງຄວາມເປັນເຈົ້າການໃນການປະຕິບັດໜ້າທີ່ວຽກງານວິຊາສະເພາະຂອງຕົນໃຫ້ ບັນລຸຕາມຄາດໝາຍທີ່ວ່າງໄວ້.
ຂ່າວ ນາງ ຄໍາຫຼ້າ ພອນພິລາ