ໃນວັນທີ 29 ຫາ 31 ກໍລະກົດ 2024 ຄະນະປະຈໍາສະພາປະຊາຊົນແຂວງ ນໍາໂດຍທ່ານ ຫຸມເພັງ ຈອມວິສານ ຮອງປະທານຄະນະປະຈຳສະພາປະຊາຊົນແຂວງ, ພ້ອມດ້ວຍທີມງານ ໄດ້ລົງເຄື່ອນໄຫວພົບປະຜູ້ມີສິດເລືອກຕັ້ງ ແລະ ຕິດຕາມກວດກາ ການຈັດຕັ້ງປະຕິບັດວຽກງານການເປັນເສນາທິການ ໃຫ້ແກ່ຄະນະປະຈໍາສະພາປະຊາຊົນແຂວງ ຂອງຄະນະສະມາຊິກສະພາປະຊາຊົນແຂວງ ປະຈໍາເມືອງ, ພ້ອມທັງຈັດຕັ້ງຜັນຂະຫຍາຍ ແລະ ໂຄສະນາເຜີຍແຜ່ເນື້ອໃນຜົນສໍາເລັດກອງປະຊຸມສະໄໝສາມັນ ເທື່ອທີ 7 ຂອງສະພາແຫ່ງຊາດ ຊຸດທີ IX ແລະ ຂອງສະພາປະຊາຊົນຂັ້ນແຂວງ ຊຸດທີ II, ມີບັນດາທ່ານ ເລຂາພັກເມືອງ, ຮອງເລຂາພັກເມືອງ, ຄະນະປະຈໍາພັກເມືອງ, ກໍາມະການພັກເມືອງ, ຫົວໜ້າ, ຮອງຫົວໜ້າຫ້ອງການເມືອງ, ພະນັກງານບໍານານ, ອົງການທຽບເທົ່າຫ້ອງການຂັ້ນເມືອງ, ກອງບັນຊາການ ປກຊ-ປກສ ເມືອງ, ອົງການແນວລາວສ້າງຊາດ, ສະຫະພັນນັກຮົບເກົ່າ, ອົງການຈັດຕັ້ງມະຫາຊົນຂັ້ນເມືອງ ແລະ ອົງການຈັດຕັ້ງບ້ານ, ພໍ່ແມ່ປະຊາຊົນ ເຂົ້າຮ່ວມຮັບຟັງທັງໝົດຢ່າງພ້ອມພຽງ.

ໃນການລົງເຄື່ອນໄຫວວຽກງານຢູ່ສອງເມືອງ ໃນຄັ້ງ ເພື່ອເປັນການຈັດຕັ້ງປະຕິບັດຕາມພະລະບົດບາດ, ສິດ ແລະ ໜ້າທີ່ ຂອງສະພາປະຊາຊົນແຂວງ ຕາມທີ່ກົດໝາຍໄດ້ກໍານົດໄວ້, ໂດຍສະເພາະແມ່ນ ຕິດຕາມກວດກາ ແລະ ຊຸກຍູ້ການຈັດຕັ້ງປະຕິບັດໜ້າທີ່ວຽກງານ ຂອງຄະນະສະມາຊິກສະພາປະຊາຊົນແຂວງ ປະຈໍາເມືອງ ໃນການເປັນເສນາທິການໃຫ້ແກ່ຄະນະປະຈໍາສະພາປະຊາຊົນແຂວງ, ການຈັດຕັ້ງປະຕິບັດແຜນການເຄື່ອນໄຫວວຽກງານ ຂອງໜ່ວຍງານເສນາທິການຊ່ວຍວຽກຄະນະສະມາຊິກສະພາປະຊາຊົນແຂວງ ປະຈໍາເມືອງ; ຈັດຕັ້ງຜັນຂະຫຍາຍມະຕິ ວ່າດ້ວຍການພົບປະຜູ້ມີສິດເລືອກຕັ້ງ ແລະ ເນື້ອໃນມະຕີຜົນສຳເລັດກອງປະຊຸມສະໄໝສາມັນ ເທື່ອທີ 7 ຂອງສະພາແຫ່ງຊາດ ຊຸດທີ IX ແລະ ສະພາປະຊາຊົນແຂວງ ຊຸດທີ II ແລະ ຕິພັນກັບການຮັບຟັງຄໍາຄິດເຫັນ ແລະ ເກັບກໍາສະພາບການການຄຸ້ມຄອງລັດ, ຄຸ້ມຄອງເສດຖະກິດ-ສັງຄົມຂອງເມືອງ ແລະ ບັນຫາຕ່າງໆ ຂອງປະຊາຊົນບັນດາເຜົ່າ ແນໃສ່ເຮັດໃຫ້ບັນຫາພື້ນຖານຂອງຊາດ ກໍຄືຂອງທ້ອງຖິ່ນ ທີ່ສະພາແຫ່ງຊາດ ແລະ ສະພາປະຊາຊົນແຂວງຮັບຮອງເອົາ ໄດ້ຮັບການຈັດຕັ້ງຜັນຂະຫຍາຍເຂົ້າໃນວຽກງານຕົວຈິງ;

ເນື້ອໃນກອງປະຊຸມຄັ້ງນີ້ ໄດ້ຮັບຟັງການລາຍງານ ການຈັດຕັ້ງປະຕິບັດວຽກງານຮອບດ້ານ ປະຈໍາ 6 ເດືອນຕົ້ນປີ ແລະ ທິດທາງແຜນການປະຈໍາ 6 ເດືອນທ້າຍປີ 2024 ຂອງອົງການປົກຄອງເມືອງ, ການຈັດຕັ້ງປະຕິບັດແຜນການເຄື່ອນໄຫວວຽກງານ ປະຈໍາ 6 ເດືອນຕົ້ນປີ ແລະ ແຜນການເຄື່ອນໄຫວວຽກງານປະຈໍາ 6 ເດືອນທ້າຍປີ 2024 ຂອງຄະນະສະມາຊິກສະພາປະຊາຊົນແຂວງ ປະຈໍາເມືອງ, ການຈັດຕັ້ງປະຕິບັດແຜນການເຄື່ອນໄຫວວຽກງານ ປະຈໍາ 6 ເດືອນຕົ້ນປີ ແລະ ແຜນການເຄື່ອນໄຫວວຽກງານປະຈໍາ 6 ເດືອນທ້າຍປີ 2024 ຂອງໜ່ວຍງານເສນາທິການຊ່ວຍວຽກຄະນະສະມາຊິກສະພາປະຊາຊົນຂັ້ນແຂວງ ປະຈໍາເມືອງ; ພ້ອມກັນນັ້ນ ໄດ້ຮັບຟັງການເຜີຍແຜ່ມະຕິ ຂອງຄະນະປະຈຳສະພາປະຊາຊົນແຂວງຄື:​ມະຕິວ່າດ້ວຍການພົບປະ ປະຊາຊົນ ຂອງສະມາຊິກສະພາແຫ່ງຊາດ ແລະ ສະມາຊິກສະພາປະຊາຊົນແຂວງ ສະບັບເລກທີ 308/ຄປຈຂ,​ລົງວັນທີ 27 ທັນວາ 2021,​ມະຕິວ່າດ້ວຍການຮັບ ແລະ ຄົ້ນຄວ້າພິຈາລະນາ ຄຳຮ້ອງຂໍ້ຄວາມເປັນ ສະບັບເລກທີ 39/ຄປຈຂ,​ລົງວັນທີ 26 ມັງກອນ 2024 ແລະ ພ້ອມທັງນໍາເອົາເນື້ອໃນມະຕິຜົນສຳເລັດ ກອງປະຊຸມສະໄໝສາມັນ ເທື່ອທີ 7 ຂອງສະພາແຫ່ງຊາດ ຊຸດທີ IX ມີ 20 ສະບັບ. ໃນນີ້: ວຽກງານຂົງເຂດລັດຖະບານ ຈໍານວນ 04 ສະບັບ, ວຽກງານອົງການກວດສອບແຫ່ງລັດ ຈໍານວນ 01 ສະບັບ, ວຽກງານສະພາແຫ່ງຊາດ ຈໍານວນ 01 ສະບັບ, ວຽກງານສ້າງ ແລະ ປັບປຸງກົດໝາຍ ຈໍານວນ 13 ສະບັບ (ສ້າງໃໝ່ 02 ສະບັບ ແລະ ປັບປຸງ 11 ສະບັບ ແລະ ວຽກງານບຸກຄະລາກອນ ຈຳນວນ 01 ສະບັບ ແລະ ເນື້ອໃນມະຕິຜົນສຳເລັດກອງປະຊຸມສະໄໝສາມນັນ ເທື່ອທີ 7 ຂອງສະພາປະຊາຊົນແຂວງ ຊຸດທີ II ມີ 4 ສະບັບ. ໃນນີ້: ວຽກງານຂົງເຂດອົງການປົກຄອງແຂວງ ຈໍານວນ 03 ສະບັບ, ວຽກງານສະພາປະຊາຊົນແຂວງ ຈໍານວນ 01 ສະບັບ. ຈາກນັ້ນ, ຜູ້ເຂົ້າຮ່ວມກອງປະຊຸມ ກໍໄດ້ພັດປ່ຽນກັນປະກອບຄໍາຄິດຄໍາເຫັນ ຢ່າງກົງໄປກົງມາລັກສະນະສ້າງສັນ;

ໃນວາລະຕອນທ້າຍຂອງການລົງເຄື່ອນໄຫວວຽກງານໃນຄັ້ງນີ້ ທ່ານ ຫຸມເພັງ ຈອມວິສານ ຮອງປະທານຄະນະປະຈຳສະພາປະຊາຊົນແຂວງ ໄດ້ເໜັ້ນໜັກບາງບັນຫາ ໃຫ້ແກ່ອົງການປົກຄອງເມືອງ ແລະ ບັນດາທ່ານສະມາຊິກສະພາປະຊາຊົນແຂວງ ປະຈໍາເມືອງ ຕ້ອງເອົາໃຈໃສ່ໃນການ ເພີ່ມທະວີກຳແໜ້ນແນວທາງນະໂຍບາຍຂອງພັກ, ລະບຽບກົດ  ໝາຍຂອງລັດ, ມະຕິກອງປະຊຸມໃຫຍ່ຄັ້ງທີ XI ຂອງອົງຄະນະພັກແຂວງ ກໍ່ຄື ມະຕິກອງປະຊຸມໃຫຍ່ ຂອງອົງຄະນະພັກເມືອງວາງອອກໃຫ້ເລິກເຊິ່ງ ແລະ ຈັດຕັ້ງປະຕິບັດໃຫ້ຖືກຕາມລະບຽບກົດໝາຍວາງອອກຢ່າງເຂັ້ມງວດ ແລະ ພ້ອມກັນນີ້ກໍ່ໃຫ້ກຳແໜ້ນບັນດາເນື້ອໃນ ມະຕິກອງປະຊຸມສະໄໝສາມັນ ເທື່ອທີ 7 ຂອງສະພາແຫ່ງຊາດ ຊຸດທີ IX ແລະ ຂອງສະພາປະຊາຊົນຂັ້ນແຂວງ ຊຸດທີ II ໄດ້ຮັບຮອງ ເພື່ອເປັນບ່ອນອີງໃນການຈັດຕັ້ງປະຕິບັດໃຫ້ບັນລຸຕາມແຜນການທີ່ໄດ້ວາງໄວ້; ສະເໜີໃຫ້ຄະນະສະມາຊິກສະພາປະຊາຊົນແຂວງ ປະຈຳເມືອງ ສຶບຕໍ່ຍົກສູງຄວາມຮັບຜິດຊອບໜ້າທີ່ການເມືອງ ຕໍ່ວຽກງານການຕິດຕາມກວດກາ ເປັນຕົ້ນແມ່ນ ຂອດການປະສານສົມທົບ, ລວມທັງການຊຸກຍູ້ຈັດຕັ້ງປະຕິບັດຄໍາສະເໜີຂອງຜູ້ມີສິດເລືອກຕັ້ງຕາມຂອບເຂດຄວາມຮັບຜິດຊອບໃຫ້ສູງຂຶ້ນກ່ວາເກົ່າ ແລະ ສືບຕໍ່ເພີ່ມທະວີກົນໄກການປະສານງານ ລະຫວ່າງ ສະພາປະຊາຊົນແຂວງ ກັບ ຄະນະສະມາຊິກ ແລະ ໜ່ວຍງານເສນາທິການ ຊ່ວຍວຽກຄະນະສະມາຊິກສະພາປະຊາຊົນແຂວງ ປະຈໍາເມືອງ, ໃນການລົງເຜີຍແຜ່ແຕ່ລະຄັ້ງ ຫຼີກເວັ້ນປະກົດການໂຍນຄວາມຮັບຜິດຊອບ ລະຫວ່າງ ຂັ້ນແຂວງ ແລະ ຂັ້ນເມືອງ ພ້ອມທັງຈັດຕັ້ງປະຕິບັດດ້ວຍຄວາມຮັບຜິດຊອບ, ຄວາມຕັດສິນໃຈ ແລະ ຄວາມເປັນເອກະພາບສູງໃນຂອບເຂດທົ່ວແຂວງ, ສືບຕໍ່ເອົາໃຈໃສ່ຈັດຕັ້ງຜັນຂະຫຍາຍ ບັນດາຄາດໝາຍທີ່ວາງອອກ ທີ່ໄດ້ຫັນເປັນໂຄງການ, ແຜນງານອັນລະອຽດແລ້ວ ແລະ ໄດ້ມອບຄວາມຮັບຜິດຊອບໃຫ້ບັນດາຂະແໜງການທີ່ກ່ຽວຂ້ອງ ຈັດຕັ້ງປະຕິບັດຢ່າງຈະແຈ້ງ ເພື່ອໃຫ້ການຈັດຕັ້ງປະຕິບັດຕົວຈິງຂອງແຕ່ລະຂະແໜງການ ຕ້ອງລົງເລີກຢ່າງຈິງຈັງ ແລະ ໃຫ້ເປັນຮູບປະທໍາ.

ນອກຈາກນັ້ນ ຄະນະທີມງານສະພາປະຊາຊົນແຂວງ ແລະ ຂັ້ນເມືອງ ຍັງໄດ້ລົງພົບປະໂອ້ລົມພໍ່ແມ່ປະຊາຊົນຈຳນວນ 4 ບ້ານຂອງ 2 ເມືອງຄື: ບ້ານນາຫວາຍ, ບ້ານເພຍເຫຼັກ ເມືອງບຸນໃຕ້ ແລະ ບ້ານຫ້ວຍທອງ, ບ້ານຢາງເໜືອ ເມືອງສໍາພັນ. ການລົງພົບປະຜູ້ມີສິດເລືອກຕັ້ງ ແລະ ຕິດຕາມກວດກາ ການຈັດຕັ້ງປະຕິບັດວຽກງານການເປັນເສນາທິການ ຂອງຄະນະສະມາຊິກສະພາປະຊາຊົນແຂວງ ປະຈໍາເມືອງ ໃຫ້ແກ່ຄະນະປະຈໍາສະພາປະຊາຊົນແຂວງ ຄັ້ງນີ້ ໄດ້ຮັບການສະໜັບສະໜູນໂດຍ ໂຄງການສ້າງຄວາມເຂັ້ມແຂງໃຫ້ແກ່ ສະພາແຫ່ງຊາດ ແລະ ສະພາປະຊາຊົນແຂວງ (STEPS) ແລະ ການລົງເຄື່ອນໄຫວວຽກງານໃນຄັ້ງນີ້ ໄດ້ສໍາເລັດຕາມແຜນການທີ່ວາງໄວ້.

ພາບ-ຂ່າວ: ພຸດສະດີ ແສງຈອມຄູນ