ໃນຕອນເຊົ້າຂອງວັນທີ 26 ສິງຫາ 2024 ນີ້ ທີ່ຫ້ອງປະຊຸມສະພາປະຊາຊົນແຂວງຫຼວງພະບາງ ໄດ້ມີກອງປະຊຸມຮັບຟັງການລາຍງານຜົນການຈັດຕັ້ງປະຕິບັດ ບັນດາໂຄງການລົງທຶນ ແລະ ພັດທະນາເຂື່ອນໄຟຟ້າພະລັງນໍ້າ ທີ່ໄດ້ຮັບການອະນຸຍາດລົງທຶນ ຢູ່ແຂວງຫຼວງພະບາງ ພາຍໃຕ້ການເປັນປະທານຂອງ ທ່ານ ຄຳມ່ວນ ຊົມສີຫາປັນຍາ  ຮອງປະທານກຳມາທິການເສດຖະກິດ, ເຕັກໂນໂລຊີ ແລະ ສິ່ງແວດລ້ອມ ສະພາແຫ່ງຊາດ, ເຂົ້າຮ່ວມມີຮອງປະທານສະພາປະຊາຊົນແຂວງ, ຫົວໜ້າ ແລະ ຮອງຫົວໜ້າພະແນກການ ທີ່ກ່ຽວຂ້ອງຂອງແຂວງເຂົ້າຮ່ວມ.

ກອງປະຊຸມໄດ້ຮັບຟັງການລາຍງານຕາມຄຳຖາມເຈາະຈີ້ມ ຂອງປະທານກອງປະຊຸມ ຕາມແຕ່ລະຂົງເຂດ ເປັນຕົ້ນແມ່ນ ການອະນຸມັດໂຄງການລົງທຶນດ້ານພະລັງງານໄຟຟ້າໃນໄລຍະຜ່ານມາ,ສູນກາງອະນຸມັດຈັກໂຄງການ ຂັ້ນແຂວງອະນຸມັດຈັກໂຄງການ, ຜ່ານການຈັດຕັ້ງປະຕິບັດ ໃນໄລຍະຜ່ານມາ, ການເກັບລາຍຮັບຈາກໂຄງການເຊົ່າ ແລະ ສຳປະທານ ທີ່ດິນຈາກໂຄງການພັດທະນາພະລັງງານໄຟຟ້າ, ມາຮອດປັດຈຸບັນ ສາມາດຈັດເກັບລາຍຮັບຈາກໂຄງການດັ່ງກ່າວຈໍານວນໜຶ່ງ ແລະ ມີຜົນປະໂຫຍດທີ່ລັດຖະບານ ແລະ ທ້ອງຖິ່ນ ໄດ້ຮັບຈາກໂຄງການພັດທະນາພະລັງງານໄຟຟ້າ ທີ່ໄດ້ສະເໜີຂໍຫັນປ່ຽນເນື້ອທີ່ດິນປ່າໄມ້ທຳມະຊາດ,(ປ່າສະຫງວນ, ປ່າປ້ອງກັນ ແລະ ປ່າຜະລິດ) ໄປເປັນທີ່ດິນປະເພດອື່ນ, ການຈັດຕັ້ງປະຕິບັດໃນໄລຍະຜ່ານມາຂອງຂະແໜງການທີ່ກ່ຽວຂ້ອງ ໄດ້ມີການຕິດຕາມກວດກາ ແລະ ປະເມີນຄືນ ຕໍ່ກັບການອະນຸມັດໃຫ້ເຊົ່າ ແລະ ສຳປະທານທີ່ດິນ ເພື່ອພັດທະນາໂຄງການພະລັງງານໄຟຟ້າ ໄດ້ມີວິທີການ ແລະ ມາດຕະການແກ້ໄຂການຈັດສັນຍົກຍ້າຍ,

ການຟື້ນຟູຊີວິດການເປັນຢູ່ຂອງປະຊາຊົນ ທີ່ຖືກຜົນກະທົບໂດຍກົງ ແລະ ຢູ່ເຂດໃກ້ຄຽງຂອງໂຄງການທີ່ກ່ຽວຂ້ອງໄດ້ມີມາດຕະການ, ວິທີການແກ້ໄຂຄືນ. ພາຍຫຼັງທີ່ໄດ້ຮັບຟັງການລາຍງານຈາກພາກສ່ວນທີ່ກ່ຽວຂ້ອງແລ້ວ ທ່ານກໍໄດ້ລົງໄປຢ້ຽມຢາມເຂື່ອນໄຟຟ້ານໍ້າອູ 1 ຂອງບໍລິສັດຜະລິດໄຟຟ້ານໍ້າອູ ແລະ ຮັບຟັງການລາຍງານການຈັດຕັ້ງປະຕິບັດວຽກງານຂອງໂຄງການເຂື່ອນໄຟຟ້ານໍ້າຂອງ ເພື່ອຈະໄດ້ຮັບຮູ້ພື້ນທີ່ໄດ້ຮັບຜົນກະທົບ ທາງດ້ານສິ່ງແວດລ້ອມ ແລະ ທຳມະຊາດຂອງໂຄງການ.

                         ຂ່າວໂດຍ: ຄໍາຫຼ້າ ພອນພິລາ