ໃນລະຫວ່າງວັນທີ 2-4 ມີນາ 2022 ທີ່ຜ່ານມານີ້ ທ່ານ ພົຈວ ປອ ມາລາ ວິລະຈິດ ຮອງປະທານກໍາມາທິການປ້ອງກັນຊາດ-ປ້ອງກັນຄວາມສະຫງົບ ສະພາແຫ່ງຊາດ ພ້ອມຄະນະ ເຄື່ອນໄຫວຕິດຕາມກວດກາ ເຮັດວຽກຢູ່ແຂວງຈໍາປາສັກ ໃນການເຄື່ອໄຫວ, ຄະນະດັ່ງກ່າວໄດ້ ພົບປະກັບ ທ່ານ ສາຍທອງ ໄຊຍະວົງ ຮອງເລຂາພັກແຂວງ ປະທານສະພາປະຊາຊົນແຂວງ ຢູ່ຫ້ອງຮັບຮອງຂອງສະພາປະຊາຊົນແຂວງຈໍາປາສັກ, ໄດ້ເປີດກອງປະຊຸມເຮັດວຽກຮ່ວມກັບ ຄະນະກໍາມະການຍຸຕິທໍາ ແລະ ປ້ອງກັນຊາດ-ປ້ອງກັນຄວາມສະຫງົບ ສະພາປະຊາຊົນແຂວງ, ຄະນະກອງບັນຊາການທະຫານແຂວງ, ຄະນະກອງບັນຊາການປ້ອງກັນຄວາມສະຫງົບແຂວງ, ຄະນະສະຫະພັນນັກຮົບເກົ່າແຂວງ, ຂະແໜງນິຕິກໍາ-ຍຸຕິທໍາ, ຂະແໜງ ປ້ອງກັນຊາດ-ປ້ອງກັນຄວາມສະຫງົບ ຢູ່ທີ່ຫ້ອງປະຊຸມຂອງສະພາປະຊາຊົນແຂວງ ໂດຍໄດ້ຮັບຟັັງການລາຍງານຈາກພາກສ່ວນທີ່ກ່ຽວຂອງ ເຊິ່ງເຫັນໄດ້ສະພາບລວມຈຸດພິເສດຂໍ້ສະດວກ ແລະ ຄວາມຫຍຸ້ງຍາກ ໃນການຈັດຕັ້ງປະຕິບັດວຽກງານຂອງແຕ່ລພາກສ່ວນ ທີ່ຈະຕ້ອງໄດ້ສຸມໃສ່ໃນການຈັດຕັ້ງປະຕິບັດໃຫ້ສໍາເລັດໃນຕໍ່ໜ້າ. ຈາກນັ້ນ, ໄດ້ເຄື່ອນໄຫວເຮັດວຽກຮ່ວມກັບຄະນະກອງພົນທະຫານລາບທີ 5, ລົງພື້ນທີ່ຕົວຈິງຄ້າຍຄຸມຂັງ-ດັດສ້າງ ແຂວງຈໍາປາສັກ, ຄ້າຍຄຸມຂັງ-ດັດສ້າງ ພາກໃຕ້, ເຮັດວຽກຮ່ວມກັບກອງບັນຊາການທະຫານເມືອງໂພນທອງ ແລະ ດ່ານສາກົນວັງເຕົ່າ

ໃນການລົງມາເຄື່ອນໄຫວຄັ້ງນີ້, ທ່ານ ພົຈວ.ປອ ມາລາ ວິລະຈິດ ຮອງປະທານກໍາມາທິການປ້ອງກັນຊາດ-ປ້ອງກັນຄວາມສະຫງົບ ສະພາແຫ່ງຊາດ ໄດ້ຕີລາຄາສູງຕໍ່ໝາກຜົນຜົນງານທີ່ທຸກພາກສ່ວນຍາດມາໄດ້ ພ້ອມທັງຮຽກຮ້ອງໃຫ້ທຸກພາກສ່ວນ ຈົ່ງສືບຕໍ່ເພີ່ມທະວີໃນການຈັດຕັ້ງປະຕິບັດວຽກງານຕາມສິດພາລະບົດບາດຂອງຕົນ, ໂດຍສະເພາະການຈັດຕັ້ງປະຕິບັດ 2 ວາລະແຫ່ງຊາດ ໃຫ້ໄດ້ຮັບຜົນສໍາເລັດ.  ຕໍ່ກັບການລົງເຄື່ອນໄຫວຕິດຕາມກວດກາ ຂອງກໍາມາທິການປ້ອງກັນຊາດ-ປ້ອງກັນຄວາມສະຫງົບ ໃນຄັ້ງນີ້, ເປັນການລົງເກັບຂໍ້ມູນອັນສໍາຄັນໃນການນໍາໄປຄົ້ນຄວ້າປຶກສາຫາລື ແລະ ນໍາສະເໜີຕໍ່ຄະນະປະຈໍາສະພາແຫ່ງຊາດ ເພື່ອກະກຽມເນື້ອໃນໃນການດໍາເນີນກອງປະຊຸມສະໄໝສາມັນເທື່ອທີ 3

(ພາບ-ຂ່າວ: ສົມວິຈິດ ໄຊມົນຕີ)