ເພື່ອຮັບປະກັນການຈັດຕັ້ງປະຕິບັດວຽກງານພັດທະນາຊົນນະບົດ ແລະ ແກ້ໄຂຄວາມທຸກຍາກ ໃຫ້ມີປະສິດທິພາບ ແລະ ບັນລຸຕາມຄາດໝາຍ ໃນລະຫວ່າງວັນທີ 16-17 ພຶດສະພາ 2024 ທ່ານ ນາງ ທັດສະດາພອນ ຈັນທະມາດ ຮອງປະທານກໍາມາທິການບັນດາເຜົ່າ​ ສະພາແຫ່ງຊາດ ພ້ອມຄະນະ ໄດ້ລົງເຄື່ອນໄຫວຕິດຕາມກວດກາ ແລະ ຊຸກຍູ້ວຽກງານພັດທະນາຊົນນະບົດ ແລະ ແກ້ໄຂຄວາມທຸກຍາກ ເຊິ່ງໄດ້ຈັດກອງປະຊຸມຂື້ນທີ່ຫ້ອງປະຊຸມສະພາປະຊາຊົນແຂວງ, ໂດຍມີບັນດາທ່ານຮອງປະທານສະພາປະຊາຊົນແຂວງ, ບັນດາຄະນະກໍາມະການ, ຄະນະເລຂາທິການ, ຕາງໜ້າພະແນກການ, ກອງບັນຊາການທະຫານ, ຕໍາຫຼວດ ພ້ອມດ້ວຍພະນັກງານ-ລັດຖະກອນ ທີ່ກ່ຽວຂ້ອງເຂົ້າຮ່ວມ.

ທັງນີ້, ກໍເພື່ອຕິດຕາມກວດກາ ແລະ ຊຸກຍູ້ການຈັດຕັ້ງປະຕິບັດກົດໝາຍ, ນິຕິກຳໃຕ້ກົດໝາຍຂອງບັນດາຂະແໜງການ ແລະ ອົງການທີ່ກ່ຽວຂ້ອງ ໂດຍສະເພາະດຳລັດ 348/ລບ, ລົງວັນທີ 16/11/2017 ວ່າດ້ວຍມາດຕະຖານພົ້ນທຸກ ແລະ ມາດຕະຖານພັດທະນາ; ເພື່ອເປັນຂໍ້ມູນພື້ນຖານກະກຽມລາຍງານຕໍ່ກອງປະຊຸມຄະນະປະຈຳສະພາແຫ່ງຊາດ ກໍຄືກອງປະຊຸມສະໄໝສາມັນເທື່ອທີ 7 ຂອງສະພາແຫ່ງຊາດຊຸດທີ IX ທັງເປັນບ່ອນອີງໃນການປຶກສາຫາລື ແລະ ສະເໜີພາກສ່ວນທີ່ກ່ຽວຂ້ອງ ຄົ້ນຄວ້າມາດຕະການແກ້ໄຂ.
ກອງປະຊຸມ ໄດ້ຮັບຟັງການລາຍງານຈາກພາກສ່ວນທີ່ກ່ຽວຂ້ອງເປັນຕົ້ນ: ກ່ຽວກັບການຈັດຕັ້ງປະຕິບັດບັນດາຄາດໝາຍຂອງວຽກງານພັດທະນາຊົນນະບົດ ແລະ ແກ້ໄຂຄວາມທຸກຍາກ ພາຍໃນແຂວງ; ການຈັດຕັ້ງປະຕິບັດບັນດາມາດຖານ ຂອງຄາດໝາຍທີ່ຢູ່ໃນຄວາມຮັບຜິດຊອບຂອງຕົນ ໂດຍເນັ້ນຜົນປະເມີນຕາມດໍາລັດ 348/ລບ, ມະຕິ 82/ສພຊ ລົງວັນທີ 30 ທັນວາ 2022 ແລະ ການແກ້ໄຂປະກົດການຫຍໍ້ທໍ້ທາງສາສະໜາ.
ໃນກອງປະຊຸມ, ທ່ານ ນາງ ທັດສະດາພອນ ຈັນທະມາດ ໄດ້ຕັ້ງຄຳຖາມເຈາະຈີ້ມ ເພື່ອໃຫ້ພາກສ່ວນກ່ຽວຂ້ອງ ອະທິບາຍໃຫ້ຂໍ້ມູນເພີ່ມຕື່ມ, ປະກອບຄວາມຄິດຄວາມເຫັນ ແລະ ຄຳສະເໜີຕ່າງໆຢ່າງກົງໄປກົງມາ ພ້ອມທັງມີຄຳເຫັນໂອ້ລົມເພື່ອເປັນທິດທາງໃນການປະຕິບັດວຽກງານພັດທະນາຊົນນະບົດ ແລະ ລົບລ້າງຄວາມທຸກຍາກ ໃຫ້ມີຄວາມສະດວກ,ມີປະສິດທິພາບ ແລະ ປະສິດທິຜົນ.
ການເຄື່ອນໄຫວຄັ້ງນີ້, ຮອງປະທານກໍາມາທິການບັນດາເຜົ່າ ພ້ອມຄະນະ ແລະ ຄະນະຈາກສະພາປະຊາຊົນແຂວງ ຍັງໄດ້ເຄື່ອນໄຫວຢ້ຽມເບິ່ງຈຸດສຸມພັດທະນາ ບ້ານສະແຄະ ເມືອງໄຊເສດຖາ ແລະ ບ້ານສົ້ມປ່ອຍ ເມືອງສະໜາມໄຊ.
(ພາບ-ຂ່າວ: ວິນັດ ສີສຸລາດ)