ໃນຕອນເຊົ້າວັນທີ 31 ມັງກອນ 2022 ທີ່ຫ້ອງປະຊຸມສະພາປະຊາຊົນແຂວງສະຫວັນນະເຂດ, ທ່ານ ຄໍາປະສົງ ລາດຊະຈັກ ຮອງປະທານກຳມາທິການຍຸຕິທຳ ສະພາແຫ່ງຊາດ ພ້ອມດ້ວຍຄະນະ ໄດ້ເຄື່ອນໄຫວຕິດຕາມ, ກວດກາ ຢູ່ແຂວງສະຫວັນນະເຂດ ໂດຍການຕ້ອນຮັບ ແລະ ເຂົ້າຮ່ວມເຮັດວຽກໃນຄັ້ງນີ້ມີ ທ່ານ ກົງແກ້ວ ມີວໍລະຈັກ ຮອງເລຂາພັກແຂວງ ປະທານສະພາປະຊາຊົນແຂວງ ມີບັນດາທ່ານ ຄະນະປະຈໍາສະພາປະຊາຊົນແຂວງ, ສະມາຊິກສະພາແຫ່ງຊາດປະຈໍາເຂດເລືອກຕັ້ງທີ 13 ແຂວງສະຫວັນນະເຂດ, ຄະນະກຳມະການ ຍຸຕິທຳ ແລະ ປກຊ-ປກສ ສະພາປະຊາຊົນແຂວງ, ອົງການກວດກາລັດແຂວງ, ອົງການໄອຍະການປະຊາຊົນແຂວງ, ສານປະຊາຊົນແຂວງ, ພະແນກຍຸຕິທຳແຂວງ ແລະ ປກສ ແຂວງ.

ຈຸດສົງຂອງການເຄື່ອນໄຫວຄັ້ງນີ້ ແມ່ນເພື່ອຕິດຕາມກວດກາ ການຈັດຕັ້ງປະຕິບັດກົດໝາຍ ແລະ ມະຕິ ກອງປະຊຸມສະພາແຫ່ງຊາດ ໃນຂົງເຂດວຽກງານຍຸຕິທຳ ປະຈໍາປີ 2022 ຂອງກຳມາທິການຍຸຕິທຳ ສະພາແຫ່ງຊາດ ເພື່ອສັງລວມລາຍງານ ຕໍ່ຄະນະປະຈໍາສະພາແຫ່ງຊາດ.