(ສພຊ) – ວັນສຸກທີ 18 ຕຸລາຜ່ານມາ ທີ່ຫໍປະຊຸມແຫ່ງຊາດ ໄດ້ມີການພົບປະສອງຝ່າຍລະຫວ່າງຄະນະຜູ້ແທນສະພາແຫ່ງຊາດ ສປປລາວ ແລະ ຄະນະຜູ້ແທນສະພາຜູ້ ແທນລາສະດອນ ແຫ່ງ ລາຊະອານາຈັກໄທ ເຊິ່ງຝ່າຍລາວນຳໂດຍທ່ານ ດຣ. ບຸນລ້ອມ ແກ້ວບົວໂຮມ ຮອງປະທານກຳມາທິການວັດທະນະທຳ-ສັງຄົມ, ຝ່າຍໄທນຳໂດຍທ່ານ ທາວພິພົບ ລິມຈິດຕຣາກອນ ຮອງປະທານກຳມາທິການທ່ອງທ່ຽວ.

ທ່ານ ດຣ. ບຸນລ້ອມ ແກ້ວບົວໂຮມ ໄດ້ຕີລາຄາສູງຕໍ່ການມາເຂົ້າຮ່ວມກອງປະຊຸມໃຫຍ່ສະມັດຊາລັດຖະສະພາລະຫວ່າງຊາດອາຊຽນ ຄັ້ງທີ 45 ຫຼື AIPA-45 ຂອງທ່ານປະທານກຳມາທິການທ່ອງທ່ຽວ ແລະ ຄະນະ ເຊິ່ງເປັນການປະກອບສ່ວນອັນສຳຄັນເຂົ້າໃນການເສີມຂະຫຍາຍສາຍພົວພັນມິດຕະພາບ ແລະ ການຮ່ວມມືຖານບ້ານໃກ້ເຮືອນຄຽງທີ່ດີທີ່ມີແຕ່ດົນນານ ບົນພື້ນຖານການເປັນຄູ່ຮ່ວມຍຸດທະສາດລະຫວ່າງສອງປະເທດ ລາວ-ໄທ ໃຫ້ສືບຕໍ່ຂະຫຍາຍຕົວ ແລະ ແຕກດອກອອກຜົນຍິ່ງໆຂຶ້ນ ທັງເປັນການສະໜັບສະໜູນ ແລະ ໃຫ້ກຳລັງໃຈແກ່ສະພາແຫ່ງຊາດລາວ ເຮັດສຳເລັດພັນທະສາກົນໃນການເປັນປະທານໄອປາ ກໍຄືເປັນເຈົ້າພາບຈັດກອງປະຊຸມ AIPA-45 ໃຫ້ໄດ້ຮັບຜົນສຳເລັດຢ່າງຈົບງາມ ແລະ ເປັນໂອກາດດີທີ່ຈະໄດ້ປຶກສາຫາລື ແລະ ແລກປ່ຽນບົດຮຽນກ່ຽວກັບວຽກງານໃນຂົງເຂດນິຕິບັນຍັດຮ່ວມກັນ ໂດຍສະເພາະວຽກງານການທ່ອງທ່ຽວ ແລະ ວຽກງານອື່ນທີປິ່ນອ້ອມ.

ສອງອົງການນິຕິບັນຍັດ ໄດ້ຈັດຕັ້ງປະຕິບັດບົດບັນທຶກຄວາມເຂົ້າໃຈວ່າດ້ວຍການຮ່ວມມືລະຫວ່າງ ສະພາແຫ່ງຊາດ ສປປລາວ ແລະ ລັດຖະສະພາລາຊະອານາຈັກໄທ ເປັນສະບັບທຳອິດທີ່ເຊັນໃນເດືອນຕຸລາ 2022 ເຊິ່ງມີໝາກຜົນສຳເລັດອັນຈົບງາມ ເປັນຕົ້ນ: ສອງຝ່າຍໄດ້ແລກປ່ຽນການຢ້ຽມຢາມຂອງຄະນະຜູ້ແທນຂັ້ນຕ່າງໆ; ແລກປ່ຽນບົດຮຽນ, ປະສົບການ ແລະ ຂໍ້ມູນຂ່າວສານ ໃນການຈັດຕັ້ງປະຕິບັດພາລະບົດບາດອົງການນິຕິບັນຍັດເປັນແຕ່ລະໄລຍະ; ຮ່ວມມື ແລະ ສະໜັບສະໜູນເຊິ່ງກັນແລະກັນ ໃນເວທີລັດຖະສະພາພາກພື້ນ ແລະ ສາກົນ; ຊຸກຍູ້ລັດຖະບານສອງປະເທດ ຈັດຕັ້ງປະຕິບັດບັນດາສັນຍາ, ສົນທິ ສັນຍາ, ຂໍ້ຕົກລົງທີ່ຮ່ວມກັນລົງນາມ ໃຫ້ເປັນຮູບປະທຳ ແລະ ມີປະສິດທິຜົນ.

ໃນການຮ່ວມມືໃນຕໍ່ໜ້າ, ສອງຝ່າຍໄດ້ສະເໜີບາງເນື້ອໃນຈິດໃຈເພື່ອນຳໄປຄົ້ນຄວ້າຜັນຂະຫຍາຍເຂົ້າສູ່ລວງເລິກໃນການພົວພັນຮ່ວມມືຕື່ມບາງດ້ານຄື: ແລກປ່ຽນການຢ້ຽມຢາມ, ເຮັດວຽກ ແລະ ຖອດຖອນບົດຮຽນນຳກັນໃຫ້ຫຼາຍຂຶ້ນ ກ່ຽວກັບວຽກງານການທ່ອງ ທ່ຽວ, ການພັດທະນາສີມືແຮງງານ ກໍຄືອາຊີວະສຶກສາ, ການປະກັນສຸຂະພາບ ໂດຍສະ ເພາະນະໂຍບາຍກ່ຽວກັບ 30 ບາດ ຮັກສາທຸກພະຍາດ.

(ນາງ ກຸກກິກ ບຸດດາໄຊ)