ທ່ານ ສົມດີ ດວງດີ ຮອງນາຍົກລັດຖະມົນຕີ ລັດຖະມົນ ຕີກະຊວງການເງິນ ໄດ້ຂຶ້ນຊີ້ ແຈງກ່ຽວກັບນະໂຍບາຍ, ມາດຕະການທາງດ້ານການເງິນ – ງົບປະມານ ໃນ 6 ເດືອນທ້າຍປີ 2020 ແນໃສ່ເພີ່ມທະວີການຈັດເກັບລາຍຮັບ ໄປພ້ອມກັບການຈໍາກັດ ແລະ ປະຢັດລາຍຈ່າຍ, ລະດົມທຶນຈາກພາຍໃນ ແລະ ຕ່າງປະເທດ ເພື່ອມາດຸ່ນດ່ຽງງົບປະມານ ແລະ ການປະຕິບັດພັນທະຊໍາລະໜີ້ເງິນກູ້ຢືມພາຍໃນ ແລະ ຕ່າງປະເທດ ຕໍ່ກອງປະຊຸມສະໄໝສາມັນເທື່ອທີ 9 ຂອງສະພາແຫ່ງຊາດຊຸດທີ VIII ໃນວັນທີ 25 ມິຖຸນາ 2020 ພາຍໃຕ້ການເປັນປະທານຂອງທ່ານ ນາງ ປານີ ຢາທໍ່ຕູ້ ປະທານສະພາແຫ່ງຊາດ.
ທ່ານ ສົມດີ ດວງດີ ກ່າວວ່າ: ການເພີ່ມທະວີການຈັດເກັບລາຍຮັບ ໄດ້ມີນະໂຍບາຍ ແລະ ມາດຕະການຄື: ສຸມໃສ່ຄົ້ນຄວ້າ ແລະ ຂຸດຄົ້ນແຫຼ່ງລາຍຮັບທີ່ຍັງບົ່ມຊ້ອນ ເພື່ອທົດແທນແຫຼ່ງລາຍຮັບທີ່ສູນເສຍໄປ, ສືບຕໍ່ເລັ່ງ ຂະຫຍາຍການຄຸ້ມຄອງຈັດເກັບລາຍຮັບ ຜ່ານລະບົບຄຸ້ມຄອງທີ່ທັນສະໄໝ ໃຫ້ກວ້າງຂວາງກວ່າເກົ່າ ເພື່ອຍົກສູງປະສິດທິພາບໃນການຈັດເກັບ ທັງເປັນການສ້າງສິ່ງອໍານວຍຄວາມສະດວກໃຫ້ແກ່ຜູ້ປະກອບການໃນການມອບພັນທະໃຫ້ຫຼາຍຂຶ້ນ, ພ້ອມນັ້ນ ຕ້ອງໄດ້ເອົາໃຈໃສ່ຄຸ້ມຄອງຖານລາຍຮັບທີ່ມີແລ້ວ ໂດຍສຸມໃສ່ຫົວໜ່ວຍທຸລະກິດທີ່ສາມາດສ້າງລາຍຮັບໄດ້ດີ ແລະ ບໍ່ໄດ້ຮັບຜົນ ຈາກການແຜ່ລະບາດຂອງພະຍາດ Covid-19 ໃນໄລຍະດໍາເນີນມາດຕະການ ຕາມຄໍາສັ່ງເລກທີ 06/ນຍ ເພື່ອໃຫ້ມອບລາຍຮັບເຂົ້າງົບປະມານຢ່າງຄົບຖ້ວນ, ໄປຄຽງຄູ່ກັບການຂະຫຍາຍຖານລາຍຮັບໃໝ່ໃຫ້ກວ້າງອອກ, ພ້ອມທັງສັງລວມຄືນຜົນກະທົບຕໍ່ລາຍຮັບຕົວຈິງ ແລະ ຕີລາຄາຜົນການນໍາໃຊ້ມາດຕະການດ້ານລາຍຮັບຜ່ານມາ ໂດຍສ່ອງແສງໃຫ້ເຫັນຄວາມຄືບໜ້າ ຂອງການຂະຫຍາຍລະບົບຄຸ້ມຄອງດັ່ງກ່າວ ແລະ ປະສິດທິພາບຂອງການຫັນເປັນທັນສະໄໝ ທີ່ສາມາດຍູ້ດັນການເກັບລາຍຮັບເພື່ອຮັບຮອງລາຍຈ່າຍພື້ນຖານທີ່ສໍາຄັນ.
ສືບຕໍ່ປະສານສົມທົບກັບພາກສ່ວນທີ່ກ່ຽວຂ້ອງ ເພື່ອຄົ້ນຄ້ວາປັບປຸງ ລັດຖະບັນຍັດຂອງປະທານປະເທດ ເລກທີ 03/ປປທ ວ່າດ້ວຍອັດຕາການເກັບຄ່າທໍານຽມ ແລະ ຄ່າບໍລິການ ເພື່ອເປັນພື້ນຖານທ່າແຮງໃນການຈັດເກັບລາຍຮັບ; ສືບຕໍ່ຊຸກຍູ້ໃຫ້ຜູ້ເສຍອາກອນແຈ້ງ-ມອບອາກອນດ້ວຍຕົນເອງຜ່ານລະບົບອີເລັກໂຕຣນິກ ແລະ ຜ່ານເວັບໄຊ ຫຼາຍຂຶ້ນ ແລະ ຂະຫຍາຍຖານລາຍຮັບ ດ້ວຍການຫັນບັນດາຫົວໜ່ວຍທຸລະກິດ ເຂົ້າສູ່ລະບົບອາກອນມູນຄ່າເພີ່ມ ໃຫ້ຖືກຕ້ອງ ແລະ ໂປ່ງໃສ ໂດຍເລີ່ມຈາກນະຄອນຫຼວງວຽງຈັນ ແລະ ບັນດາແຂວງໃຫຍ່ ທີ່ມີເງື່ອນໄຂ; ສືບຕໍ່ສຸມໃສ່ຄຸ້ມຄອງເກັບອາກອນປະເພດຕ່າງໆ ເປັນຕົ້ນ ອາກອນມູນຄ່າເພີ່ມ ແລະ ອາກອນຊົມໃຊ້ ຈາກການສະໜອງບໍລິການຊົມໃຊ້ໄຟຟ້າ, ໂທລະສັບ, ອິນເຕີເນັດ ແລະ ຢາສູບ; ເພີ່ມທະວີການຄຸ້ມຄອງຈັດເກັບລາຍຮັບ ຈາກຖານໃໝ່ ເປັນຕົ້ນ ໂຮງງານຊີມັງ ແຂວງຫຼວງພະບາງ ແລະ ແຂວງ ອຸດົມໄຊ, ໂຄງການທາງດ່ວນວຽງຈັນ-ວັງວຽງ ແລະ ໂຄງການຂະໜາດໃຫຍ່ອື່ນໆຂອງລັດ; ປັບປຸງແບບແຜນການເຄື່ອນໄຫວວິສາຫະກິດລັດລົງທຶນທີ່ມີປະສິດທິຜົນຕໍ່າ, ປັບປຸງໂຄງສ້າງທຶນ ແລະ ການບໍລິຫານ ເຮັດໃຫ້ວິສາຫະກິດລັດລົງທຶນມີປະສິດທິຜົນກວ່າເກົ່າ; ສືບຕໍ່ກໍານົດຖານຂໍ້ມູນລາຄາແຈ້ງພາສີຂອງສິນຄ້າທີ່ມີຄວາມສ່ຽງ ເພື່ອໃຫ້ນໍາໃຊ້ເປັນເອກະພາບໃນຂອບເຂດທົ່ວ ປະເທດ ໂດຍນໍາໃຊ້ເຄື່ອງມືໃນການຄຸ້ມຄອງ ແລະ ກວດສອບລາຄາແຈ້ງພາສີ ພ້ອມທັງ ເພີ່ມທະວີວຽກງານ ກວດສອບຄືນການແຈ້ງພາສີ ໂດຍສຸມໃສ່ບັນດາບໍລິສັດ ແລະ ໝວດສິນຄ້າ ທີ່ມີຄວາມສ່ຽງໃນການລັກລອບ, ໂດຍສະເພາະນໍ້າມັນເຊື້ອໄຟ, ສິນຄ້າອຸປະໂພກບໍລິໂພກ ແລະ ເຄື່ອງໃຊ້ໄຟຟ້າ; ສືບຕໍ່ຫັນເອົາຫົວໜ່ວຍທຸລະກິດທີ່ມີລາຍຮັບເກີນ 400 ລ້ານກີບ ແຕ່ຍັງບໍ່ທັນໄດ້ເຂົ້າໃນລະບົບອາກອນມູນຄ່າເພີ່ມ ເພື່ອເປັນເປົ້າໝາຍຂະຫຍາຍຖານ ການເກັບອາກອນມູນຄ່າເພີ່ມໃນທ້າຍປີຕ້ອງບັນລຸໃຫ້ໄດ້ 10% ຕາມເປົ້າໝາຍຂະຫຍາຍອາກອນມູນຄ່າເພີ່ມ (VAT), ໂດຍຈະໄດ້ສົມທົບແໜ້ນກັບຂະແໜງການກ່ຽວ ຂ້ອງດໍາເນີນມາດຕະການທີ່ຈໍາເປັນ. ພ້ອມກັນນັ້ນ, ກໍຈະໄດ້ຄົ້ນຄວ້າໃຫ້ພາກເອກະຊົນມີສ່ວນຮ່ວມໃນການຂະຫຍາຍຖານລາຍຮັບອາກອນມູນຄ່າເພີ່ມ; ສືບຕໍ່ປະຕິບັດການນໍາເອົາລາຍຮັບຈາກຊັບສິນ ແລະ ການຂາຍເຄື່ອງຮິບທີ່ສານຕັດສິນເປັນຂອງລັດໃຫ້ຄົບຖ້ວນ ແລະ ຖືກຕ້ອງຕາມກົດໝາຍ; ຄຸ້ມຄອງ ແລະ ຕິດຕາມການເຄື່ອນໄຫວຂອງສະພາບໍລິຫານ ແລະ ຄະນະອໍານວຍການຂອງບັນດາວິສາຫະກິດ ລັດລົງທຶນ ຢ່າງໃກ້ຊິດເພື່ອຊຸກຍູ້ການປະຕິບັດໜ້າທີ່ຂອງເຂົາເຈົ້າໃຫ້ມີປະສິດທິພາບ ແລະ ສອດຄ່ອງກັບລະບຽບກົດໝາຍ; ເລັ່ງທວງບັນດາໜີ້ຄ້າງມອບຂອງບັນດາວິສາຫະກິດລັດລົງທຶນຕ່າງໆ; ຄົ້ນຄວ້າ ແລະ ດໍາເນີນການປັບປຸງວິສາຫະກິດຂອງລັດລົງທຶນ ທີ່ມີປະສິດທິພາບຕໍ່າ ໃຫ້ມີປະສິດທິຜົນດີຂຶ້ນກວ່າເກົ່າ; ສືບຕໍ່ປະສານສົມທົບກັບຂະແໜງການ ແລະ ທ້ອງຖິ່ນ ຄົ້ນຄວ້າກົນໄກ, ມີມາດຕະການຕໍ່ກັບການແກ້ໄຂຜົນການກວດສອບ ໂດຍສະເພາະແມ່ນລາຍຮັບ-ລາຍຈ່າຍ ທີ່ຍັງບໍ່ທັນສາມາດລວມສູນເຂົ້າງົບ ປະມານໄດ້ຢ່າງຄົບຖ້ວນ ໃຫ້ມີທ່າອ່ຽງທີ່ຫຼຸດລົງ ພ້ອມທັງກໍານົດພາກສ່ວນຮັບຜິດຊອບໃນການແກ້ໄຂຜົນການກວດຢ່າງຈະແຈ້ງ ເພື່ອແກ້ໄຂບັນຫາດັ່ງກ່າວ.
ນະໂຍບາຍ ແລະ ມາດຕະການໃນການຈໍາກັດ ແລະ ປະຢັດລາຍຈ່າຍມີຄື: ຄົ້ນຄວ້າຫຼຸດລາຍຈ່າຍບໍລິຫານປົກກະຕິ, ລາຍຈ່າຍດັດສົມສົ່ງເສີມ ແລະ ລາຍຈ່າຍລົງທຶນພາຍໃນ ຂອງຂະແໜງ ການຂັ້ນສູນກາງ ແລະ ທ້ອງຖິ່ນ ເພື່ອຫຼຸດຜ່ອນການຂາດດຸນງົບປະມານ, ຄົ້ນຄວ້າກົນໄກການຄຸ້ມຄອງການເບີກຈ່າຍ ບໍລິຫານ ເພື່ອໃຫ້ກົງຈັກການຈັດຕັ້ງພັກ-ລັດ ສາມາດເຄື່ອນໄຫວໄດ້ເປັນປົກກະຕິ ໄປຄຽງຄູ່ກັບການເບີກຈ່າຍເງິນລົງທຶນຂອງລັດ ໃນລະດັບໃດໜຶ່ງ ເພື່ອຫຼຸດຜ່ອນຄວາມເຄັ່ງຕຶງທາງດ້ານການເງິນຂອງຫົວໜ່ວຍທຸລະກິດ ທັງເປັນການກະຕຸ້ນໃຫ້ເສດຖະກິດມີທ່ວງທ່າດີຂຶ້ນ; ເພີ່ມທະວີການປະຕິບັດນະໂຍບາຍປະຢັດລາຍຈ່າຍງົບປະມານ ເປັນຕົ້ນແມ່ນ ການກວດກາຫຼັງຈ່າຍງົບປະມານ, ການກວດກາຍອດເຫຼືອສົ່ງຄືນ, ການແກ້ໄຂຜົນການກວດສອບ ແລະ ອື່ນໆ.
ທ່ານຮອງນາຍົກລັດຖະ ມົນຕີ ກ່າວອີກວ່າ: ສືບຕໍ່ລະດົມທຶນຈາກຕ່າງປະເທດ ທີ່ເປັນໄປໄດ້ ເພື່ອຮັບປະກັນການຊໍາລະໜີ້ສິນຕ່າງປະເທດ ເພື່ອບໍ່ໃຫ້ຜິດ ສັນຍາທີ່ໄດ້ເຊັນກັບເຈົ້າໜີ້, ສຸມໃສ່ການລະດົມແຫຼ່ງທຶນພາຍໃນດ້ວຍຫຼາຍຮູບການ ເພື່ອໃຫ້ມີແຫຼ່ງທຶນຮັບປະກັນສາມາດຕອບສະໜອງແຜນລາຍຈ່າຍງົບປະມານ; ຄົ້ນຄວ້າກົນໄກການດຸ່ນດ່ຽງງົບປະມານໃຫ້ທ້ອງຖິ່ນ ບົນພື້ນຖານຄວາມຈໍາເປັນຂອງລາຍຈ່າຍ ໂດຍສະເພາະ ລາຍຈ່າຍເງິນເດືອນ, ເງິນນະໂຍບາຍຕ່າງໆ ແລະ ລາຍຈ່າຍທີ່ຈໍາເປັນອື່ນໆ ໃຫ້ພຽງພໍ ໂດຍມີການໄລ່ລຽງເຖິງ ສະພາບຄ່ອງທາງດ້ານການເງິນຂອງແຕ່ລະທ້ອງຖິ່ນ.
ຮອງນາຍົກລັດຖະມົນຕີຊີ້ແຈງ ມາດຕະການ ຈັດເກັບລາຍຮັບ-ຈຳກັດລາຍຈ່າຍ
