(ສພຊ) – ເພື່ອຊຸກຍູ້ເພີ່ມທະວີສາຍພົວພັນມິດຕະພາບ ແລະ ການຮ່ວມມືອັນດີງາມລະຫວ່າງ ສປປລາວ-ການາດາ ກໍຄືສອງອົງການນິຕິບັນຍັດຂອງສອງປະເທດ ໃຫ້ນັບມື້ນັບຂະຫຍາຍຕົວຍິ່ງໆຂຶ້ນ; ວັນທີ 18 ຕຸລານີ້ ທີ່ຫໍປະຊຸມແຫ່ງຊາດ, ທ່ານ ປອ. ລີເບີ ລີບົວປາວ ປະທານກໍາມາທິການແຜນການ, ການເງິນ ແລະ ການກວດສອບ, ປະທານຄະນະມິດຕະພາບລັດຖະສະພາ ລາວ-ການາດາ ພ້ອມດ້ວຍຄະນະ ໄດ້ພົບປະ ແລະ ເຮັດວຽກຮ່ວມກັບທ່ານ Yeua Pua woo ສະມາຊິກວຸດທິສະພາ ແຫ່ງລັດຖະສະພາການາດາ ພ້ອມດ້ວຍຄະນະ ໃນໂອກາດທີ່ມາເຂົ້າຮ່ວມກອງປະຊຸມໄອປາ ຄັ້ງທີ 45.

ໃນການພົບປະ, ສອງຝ່າຍໄດ້ພ້ອມກັນຕີລາຄາຄືນການພົວພັນ ແລະ ຮ່ວມມືທີ່ດີນໍາກັນລະຫວ່າງສະພາແຫ່ງຊາດລາວ ແລະ ລັດຖະສະພາການາດາ ເຊິ່ງມີການແລກປ່ຽນຂໍ້ມູນຂ່າວສານ, ສົ່ງສານອວຍພອນ, ສານຊົມເຊີຍໃນໂອກາດວັນສຳຄັນຕ່າງໆ ພ້ອມທັງມີການຮ່ວມມື ແລະ ສະໜັບສະໜູນເຊິ່ງກັນແລະກັນໃນເວທີລັດຖະສະພາພາກພື້ນ ແລະ ສາກົນ ເປັນຕົ້ນ AIPA, IPU, APPF ແລະ ອົງການອື່ນໆ. ພ້ອມກັນນັ້ນ, ກໍສະເໜີໃຫ້ສອງອົງການນິຕິບັນຍັດ ມີການແລກປ່ຽນຄະນະຜູ້ແທນນຳກັນ ທີ່ຕິດພັນກັບການແລກປ່ຽນປະສົບການທີ່ດີໃນການປະຕິບັດພາລະບົດບາດຂອງອົງການນິຕິບັນຍັດ ແລະ ບັນຫາອື່ນໆທີ່ມີຄວາມສົນໃຈຮ່ວມກັນ; ໃຫ້ປະເທດການາດາ ສືບຕໍ່ໃຫ້ການຊ່ວຍເຫຼືອແກ່ ສປປລາວ ເປັນຕົ້ນແມ່ນວຽກງານການເກັບກູ້ລະ​ເບີດ​ບໍ່​ທັນ​ແຕກ (UXO), ການພັດທະນາຊັບພະຍາກອນມະນຸດ, ສາ ທາລະນະສຸກ ແລະ ຂົງເຂດອື່ນໆ; ສືບຕໍ່ໃຫ້ການສະໜັບສະໜູນເຊິ່ງກັນແລະກັນໃນເວທີລັດຖະສະພາພາກພື້ນ ແລະ ສາກົນ.

(ນາງ ອາລິນ ສຸພິມມະປະດິດ)