​(ສພຊ) ເນື່ອງໃນໂອກາດວັນສ້າງຕັ້ງກອງທັບປະຊາຊົນລາວ ຄົບຮອບ 73 ປີ (20/01/1949-20/01/ 2022) ໃນວັນທີ 20 ມັງກອນ 2022, ທີ່ສະພາແຫ່ງຊາດ ອົງການຈັດຕັ້ງມະຫາຊົນຂອງສະພາແຫ່ງຊາດ ໄດ້ເຂົ້າອວຍພອນສະຫາຍ ພົທ. ສຸວອນ ເລືອງບຸນມີ ຮອງປະທານສະພາແຫ່ງຊາດຜູ້ຊີ້ນຳວຽກງານປ້ອງກັນຊາດ-ປ້ອງກັນຄວາມສະຫງົບ ສະພາແຫ່ງຊາດ. ຕາງໜ້າຄະນະປະຈຳສະພາແຫ່ງຊາດໂດຍແມ່ນສະຫາຍ ນາງ ທຸມມາລີ ວົງພະຈັນ ປະທານກຳມາທິການວັດທະນະທຳ-ສັງຄົມ ພ້ອມດ້ວຍ 3 ອົງການຈັດຕັ້ງມະຫາຊົນ ຄື: ຕາງໜ້າສະຫະພັນກຳມະບານສະພາແຫ່ງຊາດ ສະຫາຍ ອຳໄພ ຈິດມານົນ ປະທານສະຫະພັນກຳມະບານສະພາແຫ່ງຊາດ, ຕາງໜ້າສະຫະພັນແມ່ຍິງສະພາແຫ່ງຊາດ ສະຫາຍ ນາງ ມະນີວັນ ເຍຍປາວເຮີ ປະທານສະຫະແມ່ຍິງສະພາແຫ່ງຊາດ, ຕາງໜ້າຄະນະບໍລິຫານງານຊາວໜຸ່ມສະພາແຫ່ງຊາດ ສະຫາຍ ໄກມະນິນ ເທບບົວລີ ຮອງເລຂາຄະນະບໍລິຫານງານຊາວໜຸ່ມສະພາແຫ່ງຊາດ ແລະ ຕາງໜ້າຄະນະເລຂາທິການສະພາແຫ່ງຊາດ ສະຫາຍ ບຸນທັນ ບຸນວິໄລ ຮອງເລຂາທິການສະພາແຫ່ງຊາດ.

​ທັງນີ້, ເພື່ອເປັນການສະແດງຄວາມຮູ້ບຸນຄຸນຕໍ່ກຳລັງປ້ອງກັນຊາດກໍຄືນາຍ ແລະ ພົນທະຫານທີ່ໄດ້ສະຫຼະເລືອດເນື້ອເພື່ອຊາດ ເພື່ອປະຊາຊົນທີ່ຍາມໃດກໍເສຍສະຫຼະຄວາມສຸກສ່ວນໂຕ ເພື່ອຄວາມສຸກສະບາຍຂອງພີ່ນ້ອງປະຊາຊົນລາວບັນດາເຜົ່າ ທັງເປັນການສ້າງຂວັນ ແລະ ກຳລັງໃຈໃຫ້ແກ່ກຳລັງປ້ອງກັນຊາດ-ປ້ອງກັນຄວາມສະຫງົບ ກໍຄືພະນັກງານ–ລັດຖະກອນ ທົ່ວສະພາແຫ່ງຊາດ.​

ໃນໂອກາດດັ່ງກ່າວ, ສະຫາຍຮອງປະທານສະພາແຫ່ງຊາດ ໄດ້ກ່າວສະແດງຄວາມຂອບໃຈຕໍ່ຄະນະປະຈໍາສະພາແຫ່ງຊາດ ພ້ອມດ້ວຍຄະນະ ທີ່ໄດ້ອວຍພອນເນື່ອງໃນວັນສຳຄັນດັ່ງກ່າວ; ພ້ອມນັ້ນ, ສະຫາຍຍັງໄດ້ອວຍພອນໃຫ້ການນໍາ, ຄະນະປະຈໍາສະພາແຫ່ງຊາດ ກໍຄືພະນັກງານ-ລັດຖະກອນ ທົ່ວສະພາແຫ່ງຊາດ ຈົ່ງປະສົບຜົນສໍາເລັດໃນໜ້າທີ່ວຽກງານ.

(ພາບ ແລະ ຂ່າວ: ນິດຕາ ຄຸນປາກດີ)