ວັນທີ 6 ມິຖຸນາ 2022 ທີ່ຫ້ອງປະຊຸມສະພາປະຊາຊົນແຂວງ (ຊັ້ນ1 ຫ້ອງ ½) ອົງການກວດກາແຫ່ງລັດລົງຕິດຕາມກວດກາໂຄງການກໍ່ສ້າງກັ້ນເຈື່ອນອ້ອມຕອນດິນຕືກອາຄານສະພາປະຊາຊົນແຂວງຜົ້ງສາລີ ໂດຍການເປັນປະທານ ຂອງທ່ານ ຫຸມເພັງ ຈອມວິສານ ຮອງປະທານຄະນະປະຈໍາສະພາປະຊາຊົນແຂວງ, ທັງເປັນຫົວໜ້າຄະນະຮັບຜິດຊອບກວດກາໂຄງການກໍ່ສ້າງອາຄານສະພາປະຊາຊົນແຂວງຜົ້ງສາລີ ມີ ທ່ານ ພອນແກ້ວ ສີຫອມວົງ ຫົວໜ້າພະແນກ ກົມກວດກາລັດ ອົງການກວດກາແຫ່ງລັດ, ມີຕາງໜ້າຈາກ ກວດກາລັດແຂວງ, ພະແນກແຜນການ ແລະ ການລົງທຶນແຂວງ, ພະແນກໂຍທາທິການ ແລະ ຂົນສົງແຂວງ, ຕາງໜ້າຈາກ ບໍລິສັດ ຈິດຈະເລີນກໍ່ສ້າງຈໍາກັດ, ແລະ ພະນັກງານວິຊາການຄະນະຮັບຜິດຊອບທີ່ກ່ຽວຂ້ອງເຂົ້າຮ່ວມ.

ທັງນີ້ກໍເພື່ອ ຕິດຕາມ, ກວດກາ ໂຄງການລົງທຶນຂອງລັດແຕ່ຫົວທີ ແລະ ຢັ້ງຢືນຄືນບັນຫາຕ່າງໆ ໃຫ້ມີຄວາມລະອຽດຈະແຈ້ງ ຕາມຜົນຂອງການກວດສອບ ທີ່ໄດ້ສະຫຼຸບຂາດຕົວ ປີ 2018 ແລະ 2019; ທັງເປັນການຊຸກຍູ້ການຈັດຕັ້ງປະຕິບັດໂຄງການດັ່ງກ່າວ ໃຫ້ຖືກຕ້ອງຕາມຂັ້ນຕອນ, ຕາມສັນຍາ, ມາດຖານເຕັກນິກການກໍ່ສ້າງ ໃນການຈັດຕັ້ງປະຕິບັດໂຄງການ.

ໃນວາລະດັ່ງກ່າວໄດ້ຮັບຟັງ ທ່ານ ຄໍາຕຸ່ນ ວົງສາ ຮອງເລຂາທິການສະພາປະຊາຊົນແຂວງ, ຄະນະຮັບຜິດຊອບກວດກາໂຄງການກໍ່ສ້າງອາຄານສະພາປະຊາຊົນແຂວງຜົ້ງສາລີ ລາຍງານສະພາບການໂຄງການກໍ່ສ້າງກັ້ນເຈື່ອນອ້ອມຕອນດິນຕືກອາຄານສະພາປະຊາຊົນແຂວງຜົ້ງສາລີ ຊິ່ງທ່ານກໍໄດ້ຍົກໃຫ້ເຫັນເຖິງຄວາມເປັນມາ ແລະ ຂັ້ນຕອນການດໍາເນີນກໍ່ສ້າງໂຄງການດັ່ງກ່າວ. ຈາກນັ້ນ, ຜູ້ເຂົ້າຮ່ວມກອງປະຊຸມກໍແລກປ່ຽນຄວາມເຫັນ ກ່ຽວກັບການໂຄງການກໍ່ສ້າງດັ່ງກ່າວ ໃຫ້ມີຄວາມເປັນເອກະພາບ ທາງດ້ານກົດໝາຍ ພ້ອມທັງລົງຕິດຕາມກວດກາໂຄງການກໍ່ສ້າງຕົວຈິງ ເປັນຕົ້ນ: ດ້ານມາດຖານເຕັກນິກການກໍ່ສ້າງ ແລະ ພື້ນທີ່ໃນການກໍ່ສ້າງໂຄງການດັ່ງກ່າວ.