(ສພຊ) – ລັດຖະມົນຕີກະຊວງສຶກສາທິການ ແລະ ກິລາ ທ່ານ ຮສ. ປອ. ພຸດ ສິມມາລາວົງ ໄດ້ສະເໜີປັບປຸງກົດໝາຍວ່າການສຶກສາ ຕໍ່ກອງປະຊຸມສະໄໝສາມັນເທື່ອທີ 8 ຂອງສະພາແຫ່ງຊາດຊຸດທີ IX ໃນຕອນບ່າຍວັນທີ 5 ທັນວານີ້ ໂດຍການເປັນປະທານຂອງທ່ານ ຄຳໃບ ດຳລັດ ຮອງປະທານສະພາແຫ່ງຊາດ, ເຊິ່ງທ່ານລັດຖະມົນຕີລາຍງານໃຫ້ຮູ້ວ່າ: ກົດໝາຍວ່າດ້ວຍການສຶກສາ ສະບັບປີ 2015 ເປັນກົດໝາຍແມ່ຂອງຂະແໜງການສຶກສາທິການ ແລະ ກິລາ ຖືກນຳໃຊ້ມາເປັນເວລາເກືອບ 9 ປີ ເຫັນວ່າຍັງບໍ່ທັນຕອບສະໜອງກັບຄວາມຮຽກຮ້ອງຕ້ອງການຂອງແຜນພັດທະນາເສດຖະກິດ-ສັງຄົມແຫ່ງຊາດ, ແຜນພັດທະ ນາຊັບພະຍາກອນມະນຸດແຫ່ງຊາດ ແລະ ແຜນພັດທະນາຂະແໜງການສຶກສາທິການ ແລະ ກິລາ; ຍັງມີບາງພາກ, ໝວດ ແລະ ມາດຕາ ຄວນໄດ້ຮັບການປັບປຸງຄືນໃໝ່ ເພື່ອໃຫ້ມີຄວາມກົມກຽວ ແລະ ສອດຄ່ອງກັບກົດໝາຍວ່າດ້ວຍອາຊີວະສຶກສາ, ກົດໝາຍວ່າດ້ວຍການສຶກສາຊັ້ນສູງ, ກົດໝາຍ ແລະ ນິຕິກໍາໃຕ້ກົດໝາຍອື່ນທີ່ກ່ຽວຂ້ອງ.

ພ້ອມນັ້ນ, ທ່ານຍັງລາຍງານໃຫ້ຮູ້ດ້ານອ່ອນ ແລະ ບາງຂໍ້ຄົງຄ້າງ ວ່າ: ການກຳນົດເອົາການສຶກສາພາກບັງຄັບ ເປັນການສຶກສາບໍ່ໄດ້ເສຍຄ່າໃນສະຖານການສຶກສາຂອງລັດ, ໃນພາກປະຕິບັດຕົວຈິງ ໂຮງຮຽນຂອງລັດຍັງຂາດເຂີນງົບປະມານ ແລະ ມີບາງໂຮງຮຽນ ມີຄວາມຈຳເປັນຕ້ອງໄດ້ລະດົມການປະກອບສ່ວນຈາກຜູ້ປົກຄອງ ເພື່ອມາຮັບໃຊ້ໃຫ້ແກ່ການຮຽນ-ການສອນ; ອັດຕາການປະລະຂອງຄູ ແລະ ນັກຮຽນ ໃນການສຶກສາພາກບັງຄັບ ເພີ່ມຂຶ້ນໃນປັດຈຸບັນ ສາເຫດຕົ້ນຕໍຈາກສະພາບເສດຖະກິດ, ຄວາມຮັບຜິດຊອບຂອງຄອບຄົວ ແລະ ສັງຄົມ; ງົບປະມານແຫ່ງລັດທີ່ກຳນົດໃຫ້ຂະແໜງສຶກສາທິການ ແລະ ກິລາ ຈົນບັນລຸ 18% ຂອງລາຍຈ່າຍງົບປະມານຂອງລັດຂຶ້ນໄປ, ການຈັດຕັ້ງປະຕິບັດຕົວຈິງຍັງບໍ່ທັນບັນລຸຕາມຄາດໝາຍທີ່ວາງໄວ້; ກອງທຶນສົ່ງເສີມການສຶກສາທີ່ໄດ້ກຳນົດໄວ້ໃນກົດໝາຍ ໃນມາດຕາ 59 ຍັງບໍ່ສາມາດຈັດຕັ້ງປະຕິບັດໄດ້; ສະພາທີ່ປຶກສາການສຶກສາ ຍັງບໍ່ທັນໄດ້ຮັບການຈັດຕັ້ງຢ່າງຄົບຖ້ວນ, ຈັດຕັ້ງໄດ້ພຽງບາງຂະແໜງການ; ການໂຄສະນາເຜີຍແຜ່ກົດໝາຍວ່າດ້ວຍການສຶກສາ ໃຫ້ແກ່ຂະແໜງການອື່ນຢູ່ຂັ້ນສູນກາງ ແລະ ທ້ອງຖິ່ນ ຍັງບໍ່ທັນໄດ້ຈັດຕັ້ງປະຕິບັດຢ່າງກວ້າງຂວາງ; ຄວາມຮັບຜິດຊອບຂອງພໍ່ແມ່ ຫຼື ຜູ້ປົກຄອງ ໃນມາດຕາ 69 ໃນການຊຸກຍູ້ ແລະ ສົ່ງເສີມໃຫ້ລູກຫຼານຂອງຕົນໄດ້ເຂົ້າຮຽນຕາມເກນອາຍຸ ຍັງບໍ່ທັນໄດ້ເອົາໃຈໃສ່ເທົ່າທີ່ຄວນ; ຄວາມຮັບຜິດຊອບຂອງບຸກຄະລາກອນ, ຄູ, ພະນັກງານວິຊາການ, ສະຖານການສຶກສາ, ການຈັດຕັ້ງ, ທ້ອງຖິ່ນ ແລະ ສັງຄົມ ຕໍ່ການຈັດຕັ້ງປະຕິບັດສິດ, ໜ້າທີ່ ແລະ ພັນທະຂອງຕົນ ຍັງບໍ່ທັນໄດ້ປະຕິບັດຢ່າງເຂັ້ມງວດເທົ່າທີ່ຄວນ.

ທ່ານ ຮສ. ປອ. ພຸດ ສິມມາລາວົງ ກ່າວຕື່ມອີກວ່າ: ເມື່ອກົດໝາຍວ່າດ້ວຍການສຶກສາສະບັບປັບປຸງ ຖືກຮັບຮອງ ແລະ ປະກາດໃຊ້ ຈະເປັນບ່ອນອີງໃຫ້ຂະແໜງການສຶກສາທິການ ແລະ ກິລາ ໃນການສ້າງນະໂຍບາຍ, ແຜນຍຸດສາດ, ແຜນການ, ແຜນງານ, ໂຄງການ ແລະ ບັນດານິຕິກໍາຕ່າງໆ ໃນການຄຸ້ມຄອງ ແລະ ຈັດຕັ້ງປະຕິບັດວຽກງານສຶກສາ ໃຫ້ມີປະສິດທິພາບ ແລະ ປະສິດທິຜົນສູງຂຶ້ນ; ຮັບປະກັນໃຫ້ພົນລະເມືອງລາວເຂົ້າເຖິງການສຶກສາທີ່ມີຄຸນນະພາບທຽບເທົ່າກັບພາກພື້ນ ແລະ ສາກົນ ແລະ ຍົກສູງຄວາມເຊື່ອໝັ້ນໃຫ້ແກ່ຊຸມຊົນ, ສັງຄົມ, ຄູ່ຮ່ວມພັດທະນາ ແລະ ອົງການຈັດຕັ້ງທັງພາຍໃນ ແລະ ຕ່າງປະເທດ ເຫັນໄດ້ເຖິງຄວາມສຳຄັນຂອງວຽກງານສຶກສາ ທັງຊຸກຍູ້ ແລະ ສົ່ງເສີມການລົງທຶນໃສ່ວຽກງານການສຶກສາໃຫ້ຫຼາຍຂຶ້ນ; ເພີ່ມທະວີຄວາມຮັບຜິດຊອບ, ຍົກສູງຄວາມຮູ້ຄວາມເຂົ້າໃຈ ແລະ ເປັນເຈົ້າການໃນການປະຕິບັດສິດ, ໜ້າທີ່ ແລະ ພັນທະຂອງພົນລະເມືອງທຸກຄົນ ເພື່ອປະກອບສ່ວນດ້ານທຶນຮອນ, ແຮງງານ ແລະ ວັດຖຸປະກອນ ເຂົ້າໃນວຽກງານສຶກສາຢ່າງຕັ້ງໜ້າ.