ກອງປະຊຸມສະໄໝສາມັນ ເທື່ອທີ 7 ຂອງສະພາປະຊາຊົນແຂວງອັດຕະປື ຊຸດທີ II ອັດລົງດ້ວຍຜົນສຳເລັດຢ່າງຈົບງາມ ໃນວັນທີ 1 ສີງຫາ 2024. ພາຍຫຼັງທີ່ໄດ້ດໍາເນີນມາເປັນເວລາ 3 ວັນ. ຢູ່ທີ່ຫ້ອງປະຊຸມສະພາປະຊາຊົນແຂວງ ພາຍໃຕ້ການເປັນປະທານຂອງທ່ານ ນາງ ມີນາພອນ ໄຊສົມພູ ປະທານສະພາປະຊາຊົນແຂວງອັດຕະປື, ເຂົ້າຮ່ວມມີທ່ານ ພົທ ວັນທອງ ກອງມະນີ ເຈົ້າແຂວງອັດຕະປື ມີບັນດາທ່ານການນຳພັກ-ລັດຂັ້ນແຂວງ, ສະມາຊິກສະພາແຫ່ງຊາດ ປະຈໍາເຂດເລືອກຕັ້ງທີ 17, ສະມາຊິກສະພາປະຊາຊົນແຂວງ, ບັນດາພະແນກການ, ອົງການທຽບເທົ່າ, ອົງການຈັດຕັ້ງແນວລາວສ້າງຊາດແຂວງ, ອົງການຈັດຕັ້ງມະຫາຊົນ ແລະ ພາກສ່ວນຕ່າງໆເຂົ້າຮ່ວມ 100 ກວ່າທ່ານ.
ທ່ານ ນາງ ມີນາພອນ ໄຊສົມພູ ໄດ້ກ່າວສູນທອນພົດອັດກອງປະຊຸມວ່າ: ກອງປະຊຸມໄດ້ຕີລາຄາສູງ ຕໍ່ສະມາຊິກສະພາປະຊາຊົນແຂວງ ໄດ້ພ້ອມກັນສຸມໃສ່ການພິຈາລະນາບັນຫາສໍາຄັນພື້ນຖານຂອງທ້ອງຖິ່ນ ລະອຽດດັ່ງນີ້: 1.). ໄດ້ພິຈາລະນາ ແລະ ຮັບຮອງເອົາບົດລາຍງານຂອງອົງການປົກຄອງແຂວງ ກ່ຽວກັບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ, ແຜນງົບປະມານແຫ່ງລັດ ຕິດພັນການຈັດຕັ້ງປະຕິບັດວາລະແຫ່ງຊາດ ໄລຍະ 6 ເດືອນຕົ້ນປີ ແລະ ທິດທາງ 6 ເດືອນທ້າຍປີ 2024. ກອງປະຊຸມສະແດງຄວາມຊົມເຊີຍ ຕໍ່ຄວາມພະຍາຍາມ ຂອງອົງການປົກຄອງແຂວງ ໃນການສູ້ຊົນຜ່ານຜ່າຄວາມຫຍຸ້ງຍາກ ແລະ ສິ່ງທ້າທາຍຈາກປັດໃຈພາຍໃນ ແລະ ພາຍນອກເຮັດໃຫ້ອັດຕາການເຕີບໂຕທາງດ້ານເສດຖະກິດ ໃນ 6 ເດືອນ ຕົ້ນປີ ບັນລຸໄດ້ 5,23 % ການເກັບລາຍຮັບງົບປະມານແຫ່ງລັດມີທ່າອ່ຽງດີຂື້ນ. ກອງປະຊຸມສະເໜີໃຫ້ອົງການປົກຄອງແຂວງ ເອົາໃຈໃສ່ແກ້ໄຂບັນຫາທີ່ເຄັ່ງຮ້ອນທີ່ແຂວງພວກເຮົາກໍາລັງປະເຊີນຢູ່ໃນປັດຈຸບັນ ເປັນຕົ້ນ: ບັນຫາເງິນເຟີ້, ລາຄາສິນຄ້າ, ນໍ້າມັນເຊື້ອໄຟ, ການຄຸ້ມຄອງລາຄາສີນຄ້າ ເຊິ່ງໄດ້ສົ່ງຜົນກະທົບໂດຍກົງຕໍ່ຊີວິດການເປັນຢູ່ຂອງພະນັກງານ, ທະຫານ, ຕໍາຫຼວດ ກໍ່ຄືປະຊາຊົນລາວບັນດາເຜົ່າ, ເພີ່ມທະວີຜັນຂະຫຍາຍມະຕິວ່າດ້ວຍການສ້າງເສດຖະກິດເອກະລາດເປັນເຈົ້າຕົນເອງ ໃນໄລຍະໃໝ່.ໃນການສົ່ງເສີມການຜະລິດກະສິກໍາ ເພື່ອຊົມໃຊ້ພາຍໃນ ແລະ ເປັນສິນຄ້າສົ່ງອອກໂດຍຕິດພັນກັບການຜະລິດເປັນກຸ່ມຕາມທ່າແຮງ ແລະ ຕາມແລວເສດຖະກິດ, ສືບຕໍ່ປະເມີນຄືນບັນດາໂຄງການລົງທຶນຂອງລັດ ເພື່ອແກ້ໄຂຂໍ້ຂັດແຍ່ງທີ່ເກີດຂື້ນລະຫວ່າງຜູ້ປະກອບການກັບປະຊາຊົນ; ສືບຕໍ່ຂະຫຍາຍຖານລາຍຮັບຂອງແຂວງ, ການຄຸ້ມຄອງການນໍາໃຊ້ເງີນລື່ນແຜນ, ຄຸ້ມຄອງເງີນພັດທະນາຊຸມຊົນ ໃຫ້ສອດຄ່ອງຕາມລະບຽບການ; ສູ້ຊົນປະຕິບັດບັນດາຄາດໝາຍໃນຂົງເຂດວັດທະນະທໍາ-ສັງຄົມ ທີ່ບໍ່ບັນລຸໂດຍສະເພາະແມ່ນວຽກງານສືກສາ ແລະ ສາທາລະນະສຸກ; ສຶືບຕໍ່ແບ່ງຂັ້ນຄຸ້ມຄອງ; ເອົາໃຈໃສ່ແກ້ໄຂບັນຫາລາຍການທີ6; ສືບຕໍ່ແກ້ໄຂບັນຫາການບຸກລຸກເນື້ອທີ່ດີນ ແລະ ປ່າໄມ້; ສືບຕໍ່ເອົາໃຈໃສ່ປະຕິບັດວາລະແຫ່ງຊາດກ່ຽວກັບການແກ້ໄຂບັນຫາຢາເສບຕິດ ແລະ ປະກົດການຫຍໍ້ທໍ້ຕ່າງໆ ໃຫ້ຫຼຸດລົງເທື່ອລະກ້າວ.
2.). ພິຈາລະນາ ແລະ ຮັບຮອງເອົາບົດລາຍງານຂອງອົງການປົກຄອງແຂວງ ຈໍານວນ 2 ສະບັບ:ກອງປະຊຸມມອບໃຫ້ຄະນະຮັບຜິດຊອບ ນຳໄປປັບປຸງຄືນດ້ານເນື້ອໃນໃຫ້ຖືກຕ້ອງສອດຄ່ອງກັບ ກົດໝາຍ ແລະ ນິຕິກໍາໃຕ້ກົດໝາຍ ທີ່ໄດ້ປະກາດໃຊ້ໃນປັດຈຸບັນ ແລະ ສອດຄ່ອງກັບສະພາບ ເສດຖະກິດ-ສັງຄົມໃນປັດຈຸບັນ;
3.). ພິຈາລະນາ ແລະ ຮັບຮອງເອົາບົດລາຍງານ ກ່ຽວກັບການເຄື່ອນໄຫວວຽກງານປະຈໍາ 6 ເດືອນຕົ້ນປີ ແລະ ທິດທາງ 6 ເດືອນທ້າຍປີ 2024 ຂອງສະພາປະຊາຊົນແຂວງ ຊຸດທີ II. ກອງປະຊຸມສະແດງຄວາມຊົມເຊີຍຕໍ່ການເອົາໃຈໃສ່ ນໍາພາ-ຊີ້ນໍາຂອງອົງການປົກຄອງແຂວງ, ຄະນະປະຈໍາສະພາປະຊາຊົນແຂວງ, ຄວາມເປັນເຈົ້າການຂອງກົງຈັກເສນາທິການຂອງສະພາປະຊາຊົນແຂວງ ກໍ່ຄືບັນດາທ່ານສະມາຊິກສະພາປະຊາຊົນແຂວງ ໃນການເຄື່ອນໄຫວປະຕິບັດພາລະບົດບາດ, ສິດ ແລະ ໜ້າທີ່ ຂອງສະພາປະຊາຊົນແຂວງ ຕາມທີ່ໄດ້ກໍານົດໄວ້ໃນລັດຖະທໍາມະນູນ ແລະ ກົດໝາຍ ໄດ້ຮັບຜົນສໍາເລັດຫຼາຍດ້ານ ເຮັດໃຫ້ບົດບາດຂອງສະພາປະຊາຊົນແຂວງນັບມື້ສູງຂື້ນ, ໄດ້ຮັບຄວາມເຊື່ອໝັ້ນຈາກອົງການຈັດຕັ້ງພັກ-ລັດຂັ້ນຕ່າງໆ ແລະ ປະຊາຊົນຜູ້ມີສິດເລືອກຕັ້ງ ນັບມື້ນັບກວ້າງຂວາງ.
ຕະຫຼອດໄລຍະການດໍາເນີນກອງປະຊຸມໄດ້ມີໂທລະສັບສາຍດ່ວນຈາກຜູ້ມີສິດເລືອກຕັ້ງ ໂທເຂົ້າມາທັງໝົດ 6 ສາຍ, ຕໍ່ກັບບັນຫາທີ່ສົ່ງມາທາງໂທລະສັບສາຍດ່ວນດັ່ງກ່າວນັ້ນ, ກອງເລຂາກອງປະຊຸມໄດ້ສັງລວມ ແລະ ມອບໃຫ້ຄະນະກຳມະການ ຂອງສະພາປະຊາຊົນແຂວງ ປະສານສົມທົບພາກສ່ວນກ່ຽວຂ້ອງ ເພື່ອຄົ້ນຄວ້າ ແລະ ຊີ້ແຈງເປັນລາຍລັກອັກສອນ, ຮັບປະກັນໄດ້ຄວາມຖືກຕ້ອງສອດຄ່ອງຕາມກົດໝາຍ ແລະ ລະບຽບການ.
(ວິນັດ)