ວັນທີ 06 ສິງຫາ 2024 ນີ້ ຄະນະອະນຸກຳມະການເນື້ອໃນຂັ້ນແຂວງ ໄດ້ລົງເຄື່ອນໄຫວຊຸກຍູ້ການກະກຽມກອງປະຊຸມໃຫຍ່ 3 ຂັ້ນຂອງພັກຂັ້ນແຂວງ ຢູ່ກອງບັນຊາການປ້ອງກັນຄວາມສະຫງົບແຂວງຈຳປາສັກ ໂດຍການເປັນປະທານ ສະຫາຍ ສາຍທອງ ໄຊຍະວົງ ຮອງເລຂາພັກແຂວງ, ປະທານສະພາປະຊາຊົນແຂວງ ທັງເປັນຫົວໜ້າອະນຸກໍາມະການເນື້ອໃນຂັ້ນແຂວງ ມີບັນດາສະຫາຍໃນອະນຸກຳມະການຂັ້ນແຂວງ, ເພື່ອຊຸກຍູ້ຄະນະພັກຂອງກອງບັນຊາການປ້ອງກັນຄວາມສະຫງົບແຂວງ ໃຫ້ມີຄວາມຮັບຮູ້ເຂົ້າໃຈ, ສາມາດຈັ້ງຕັ້ງຜັນຂະຫຍາຍ ແລະ ຈັດຕັ້ງປະຕິບັດຄໍາສັ່ງແນະນໍາຂອງຄະນະເລຂາທິການສູນກາງພັກ ສະບັບເລກທີ 411/ຄລສພ, ລົງວັນທີ 8 ສິງຫາ 2023 ແລະ ຄໍາສັ່ງແນະນໍາຂອງຄະນະຈັດຕັ້ງສູນກາງພັກ ສະບັບເລກທີ 211/ຄຈສພ, ລົງວັນທີ 16 ສິງຫາ 2023 ວ່າດ້ວຍການກະກຽມດໍາເນີນກອງປະຊຸມ 3 ຂັ້ນຂອງພັກ ໃຫ້ກວ້າງຂວາງ, ທົ່ວເຖິງ ແລະ ມີຄວາມເປັນເອກະພາບໃນທົ່ວອົງຄະນະພັກຂອງກອງບັນຊາການປ້ອງກັນຄວາມສະຫງົບແຂວງໃຫ້ມີຄວາມພ້ອມຮອບດ້ານ ແລະ ຮັບປະກັນການກະກຽມດ້ານຂະບວນການ, ດ້ານເນື້ອໃນ ແລະ ດ້ານບຸກຄະລາກອນ. ການເຄື່ອນໄຫວໄດ້ເປີດກອງປະຊຸມເຮັດວຽກຮ່ວມກັບຄະນະພັກຂອງກອງບັນຊາການປ້ອງກັນຄວາມສະຫງົບແຂວງ ໂດຍໄດ້ຮັບຟັງການລາຍງານກ່ຽວກັບການກະກຽມຄວາມພ້ອມໃນການກະກຽມ ຈາກ ທ່ານ ສີວິໄລ ແກ້ວປະເສີດ ຮອງເລຂາຄະນະພັກຮາກຖານ, ຮອງຫົວໜ້າກອງບັນຊາການປ້ອງກັນຄວາມສະຫງົບແຂວງ ທີ່ຈະດຳເນີນກອງປະຊຸມໃຫຍ່. ຈາກນັ້ນ, ອະນຸກໍາມະການເນື້ອໃນຂັ້ນແຂວງໄດ້ແນະນຳວິທີການກຳນົດເນື້ອໃນກອງປະຊຸມ ແລະ ບົດປີ່ນອ້ອມຕ່າງໆ ແລະ ກອງປະຊຸມໄດ້ມີການແລກປ່ຽນປະກອບຄຳເຫັນບົນພື້ນຖານຄວາມເປັນເອກະພາບ ແລະ ສອດຄ່ອງຕາມລະບຽບຂອງ ພັກ-ລັດ ທີ່ວາງໄວ້.

ຕອນທ້າຍ ສະຫາຍ ສາຍທອງ ໄຊຍະວົງ ຮອງເລຂາພັກແຂວງ, ປະທານສະພາປະຊາຊົນແຂວງ ຫົວໜ້າຄະນະອະນຸກຳມະການເນື້ອໃນຂັ້ນແຂວງ ຍັງໄດ້ໂອ້ລົມກອງປະຊຸມ ແລະ ເນັ້ນໜັກຄະນະປະຈໍາພັກ ຄະນະນຳ ລວມໄປເຖິງສະມາຊິກພັກທີ່ຂື້ນກັບກອງບັນຊາການປ້ອງກັນຄວາມສະຫງົບແຂວງ ຕ້ອງກໍາແໜ້ນບັນດາເນື້ອໃນ, ບາດກ້າວ, ຂັ້ນຕອນ, ວິທີການໃນການນໍາພາກະກຽມ ແລະ ດໍາເນີນກອງປະຊຸມໃຫຍ່ຂອງອົງຄະນະພັກຂັ້ນຂອງຕົນ, ປະຕິບັດໃຫ້ຖືກຕ້ອງ ຕາມທີ່ກໍານົດໄວ້ໃນນິຕິກໍາຂອງສູນກາງພັກ, ສາມາດສ້າງເປັນແຜນເຄື່ອນໄຫວອັນລະອຽດຂອງຄະນະພັກຂອງຕົນ, ເອົາໃຈໃສ່ນໍາພາ-ຊີ້ນໍາຈັດຕັ້ງປະຕິບັດໃຫ້ມີຜົນສຳເລັດຕາມລະດັບຄາດໝາຍທີ່ວາງໄວ້.

(ພາບ-ຂ່າວ: ສຸລິຍາ ເພັງສະຫວັດ)