ລັດຖະບານ ຄວນກໍານົດການອອກໃບຕາດິນຕື່ມໃສ່ວຽກຈຸດສຸມດ້ານເສດຖະກິດ ເພາະເປັນຄາດໝາຍໜຶ່ງທີ່ຍັງບໍ່ທັນບັນລຸໄດ້ຕາມມະຕິສະພາແຫ່ງຊາດ ສະບັບເລກທີ 118/ສພຊ, ລົງວັນທີ 21 ພະຈິກ 2023 ວາງອອກວ່າ ປີ 2024 ອອກໃບຕາດິນໃຫ້ໄດ້ 300,000 ຕອນ ແຕ່ການຈັດຕັ້ງປະຕິບັດຕົວຈິງໄດ້ພຽງ 36,409 ຕອນ ເທົ່າກັບ 12% ຂອງແຜນການ, ເຊິ່ງເປົ້າໝາຍການອອກໃບຕາດິນ ຖ້າວ່າຈັດຕັ້ງປະຕິບັດໄດ້ຕາມແຜນ ຈະເປັນການຂະຫຍາຍຖານລາຍຮັບທີ່ສໍາຄັນ ແລະ ເປັນຖານເກັບລາຍຮັບເຂົ້າງົບປະມານແຫ່ງລັດທີ່ແນ່ນອນ.

ທະນາຄານແຫ່ງ ສປປລາວ ຄວນວິເຄາະວິໄຈທ່າອຽງອັດຕາເງິນເຟີ້ໃຫ້ຊັດເຈນຕື່ມເພື່ອກໍານົດຕົວເລກໃຫ້ແທດ ເໝາະກັບຕົວຈິງ ແລະ ສາມາດຈັດຕັ້ງປະຕິບັດໄດ້, ຖ້າກໍານົດອັດຕາເງິນເຟີ້ເປັນຕົວເລກດຽວຄື 9% ເຫັນວ່າຈະບໍ່ສາ ມາດປະຕິບັດໄດ້ ແລະ ການກໍານົດຕົວເລກດັ່ງກ່າວ ກໍບໍ່ພາວະວິໄສປານໃດ ເພາະເຫັນວ່າເງິນກີບຍັງມີທ່າອຽງສືບຕໍ່ອ່ອນຄ່າ; ຄວບຄຸມປະລິມານເງິນ M2 ບໍ່ໃຫ້ຂະຫຍາຍໃນອັດຕາສູງຂຶ້ນຫຼາຍ ເພາະຈະເປັນສາເຫດໜຶ່ງທີ່ເຮັດໃຫ້ເງິນກີບອ່ອນຄ່າ.

ທະນາຄານແຫ່ງ ສປປລາວ ຕ້ອງເປັນເຈົ້າການສືບຕໍ່ປະສານສົມທົບກັບກະຊວງອຸດສາຫະກໍາ ແລະ ການຄ້າ, ກະຊວງຊັບພະຍາກອນທໍາມະຊາດ ແລະ ສິ່ງແວດລ້ອມ ແລະ ພາກສ່ວນທີ່ກ່ຽວຂ້ອງ ເອົາໃຈໃສ່ຕິດຕາມກວດກາ ແລະ ແກ້ໄຂບັນຫາການນໍາໃຊ້ເງິນຕາເຂົ້າໃນການຊຳລະ ແລະ ຮັບຊຳລະ ລວມທັງການຊື້-ຂາຍຍານພາຫະນະ, ສິດນໍາໃຊ້ທີ່ດິນ ແລະ ສິ່ງປຸກສ້າງຢູ່ ສປປລາວ ໃຫ້ມີການຫັນປ່ຽນຢ່າງແຂງແຮງ ແລະ ຂາດຕົວ. ບັນຫາດັ່ງກ່າວນີ້ ໄດ້ມີຄໍາສັ່ງຂອງທ່ານນາຍົກລັດຖະມົນຕີ ສະບັບເລກທີ 10/ນຍ, ລົງວັນທີ 14 ກໍລະກົດ 2023 ວ່າດ້ວຍການຈັດຕັ້ງປະຕິບັດການຄຸ້ມຄອງເງິນຕາຕ່າງປະເທດ ກຳນົດຢ່າງຈະແຈ້ງແລ້ວ; ພ້ອມກັນນັ້ນ, ກະຊວງທີ່ກ່ຽວຂ້ອງກໍໄດ້ຜັນຂະຫຍາຍເປັນນິຕິກໍາອັນລະອຽດແລ້ວ, ແຕ່ການຈັດຕັ້ງປະຕິບັດເຫັນວ່າ ການຕິດຕາມກວດກາຍັງບໍ່ທັນເຂັ້ມງວດ ແລະ ເດັດຂາດເທົ່າທີ່ຄວນ.