(ສພຊ) – ຕອນເຊົ້າວັນທີ 17 ຕຸລາຜ່ານມາ ທີ່ສະພາແຫ່ງຊາດ ໄດ້ມີພິທີມອບ-ຮັບເງິນສະໜັບສະໜູນການເປັນເຈົ້າພາບກອງປະຊຸມສະມັດຊາໃຫຍ່ລັດຖະສະພາລະຫວ່າງຊາດອາຊຽນ ຫຼື ໄອປາ (AIPA) ຄັ້ງທີ 45 ຈາກທະນາຄານພົງສະຫວັນ 300 ລ້ານກີບ, ບໍລິສັດທີ່ປຶກສາ ໄຂ່ມຸກຕາເວັນອອກ ຈໍາກັດ 200 ລ້ານກີບ, ທະນາຄານການຄ້າຕ່າງປະເທດລາວ ມະຫາຊົນ 10 ລ້ານກີບ ແລະ ນໍ້າດື່ມ 100 ແກັດ ມູນຄ່າ 3.4 ລ້ານກີບ ໂດຍການກ່າວຮັບຂອງທ່ານ ດຣ. ນາງ ວິພາວັນ ພົມວິຫານ ປະທານກອງທຶນຊ່ວຍເຫຼືອສັງຄົມຂອງສະພາແຫ່ງຊາດ ເຊິ່ງກ່າວມອບມີທ່ານ ສີວິໄລ ພົມມະຈັກ ຜູ້ອໍານວຍການໃຫຍ່ທະນາຄານພົງສະຫວັນ, ທ່ານ ຄອນປະເສີດ ຫຼວງສຸວັນນະວົງ ຫົວໜ້າພະແນກການຕະຫຼາດ ແລະ ບໍລິການລູກຄ້າລາຍໃຫຍ່ ທະນາຄານການຄ້າຕ່າງປະເທດລາວ ມະຫາຊົນ, ທ່ານ ນາງ ຈຽງຄໍາ ເທຍໄກສອນ ຕາງໜ້າປະທານບໍລິສັດທີ່ປຶກສາ ໄຂ່ມຸກຕາເວັນອອກ ຈໍາກັດ; ທ່ານ ດຣ. ນາງ ວິພາວັນ ພົມວິຫານ ໄດ້ສະແດງຄວາມຂອບໃຈ ແລະ ມອບໃບຍ້ອງຍໍຂອງຄະນະປະຈຳສະພາແຫ່ງຊາດ ເພື່ອເປັນການຍ້ອງຍໍຜົນງານດີເດັ່ນໃນການປະກອບສ່ວນຊຸກຍູ້ ແລະ ອຸປະຖຳໃນຄັ້ງນີ້.

ຕອນເຊົ້າວັນດຽວກັນ, ທ່ານ ສຸບັນ ສະວະບຸດ ປະທານກໍາມາທິການວຽກງານສະມາຊິກສະພາແຫ່ງຊາດ ກໍໄດ້ຮັບເງິນສະໜັບສະໜູນກອງປະຊຸມໄອປາ 5 ແສນບາດ ຈາກບໍລິສັດ GULF Energy Development Public Company Limited, ທ່ານ ສຸບັນ ສະວະບຸດ ໄດ້ສະແດງຄວາມຂອບໃຈ ແລະ ມອບໃບຍ້ອງຍໍຂອງຄະນະປະຈຳສະພາແຫ່ງຊາດ ເພື່ອເປັນການຍ້ອງຍໍຜົນງານດີເດັ່ນໃນການປະກອບສ່ວນຊຸກຍູ້ ແລະ ອຸປະຖຳໃນຄັ້ງນີ້.

ຕອນບ່າຍວັນທີ 18 ຕຸລາຜ່ານມາ ກໍໄດ້ມີພິທີມອບ-ຮັບເຄື່ອງສິນຄ້າໂອດັອບຄື: ຊາ 5 ແກັດ ແລະ ກາເຟ 3 ແກັດ ມູນຄ່າ 14.8 ລ້ານກີບ ເພື່ອຮັບໃຊ້ກອງປະຊຸມ AIPA-45 ເຊິ່ງກ່າວມອບໂດຍທ່ານ ວິລະກອນ ອິນດາວົງ ຕາງໜ້າສະພາປະຊາຊົນແຂວງ ສາລະວັນ, ກ່າວຮັບໂດຍທ່ານ ປອ. ອາຄົມ ປຣະເສີດ ຮອງເລຂາທິການສະພາແຫ່ງຊາດ ພ້ອມດ້ວຍພະນັກງານທັງສອງຝ່າຍເຂົ້າຮ່ວມ; ທ່ານ ອາຄົມ ປຣະເສີດ ໄດ້ກ່າວຄຳຂອບໃຈຕໍ່ສະພາປະຊາຊົນແຂວງສາລະວັນ ທີ່ໄດ້ປະກອບສ່ວນສຳຄັນ ແລະ ສະໜັບສະໜູນຜະລິດຕະພັນທີ່ມີຄວາມເປັນເອກະລັກສະເພາະ ແລະ ຜະລິດຢູ່ພາຍໃນແຂວງສາລະວັນ ທີ່ສາມາດຈັດເປັນເຄື່ອງຕ້ອນຂອງຝາກໃຫ້ແກ່ຜູ້ແທນຕ່າງປະເທດທີ່ເຂົ້າຮ່ວມກອງປະຊຸມຄັ້ງນີ້ ພ້ອມທັງມອບໃບຍ້ອງຍໍຂອງຄະນະປະຈຳສະພາແຫ່ງຊາດ ເພື່ອເປັນການຍ້ອງຍໍຜົນງານດີເດັ່ນໃນການປະກອບສ່ວນຊຸກຍູ້ ແລະ ອຸປະຖຳ.

(ສອນສັກ ວັນວິໄຊ)