(ສພຊ) – ກອງປະຊຸມປຶກສາຫາລື ແລະ ປະກອບຄໍາເຫັນໃສ່ຮ່າງມະຕິວ່າດ້ວຍການປະຕິບັດນະໂຍບາຍໃຫ້ແກ່ພະນັກງານ-ລັດຖະກອນພາຍໃນສະພາແຫ່ງຊາດ (ສພຊ) ໄດ້ຈັດຂຶ້ນໃນວັນທີ 28-29 ທັນວາ 2024 ທີ່ເມືອງວັງວຽງ ແຂວງວຽງຈັນ ໂດຍການເປັນປະທານຂອງທ່ານ ນາງ ອໍາໄພວອນ ລ້ອມບຸນແພງ ກຳມະການສຳຮອງສູນກາງພັກ, ເລຂາທິການສະພາແຫ່ງຊາດ; ມີທ່ານ ສິງຄໍາ ວົງພະຈັນ ຮອງເລຂາທິການສະພາແຫ່ງຊາດ, ບັນດາຄະນະກົມ, ຄະ ນະພະແນກ ແລະ ລັດຖະກອນວິຊາການຈາກພາກສ່ວນທີ່ກ່ຽວຂ້ອງຂອງ ສພຊ ເຂົ້າຮ່ວມ 30 ກວ່າທ່ານ.

ທ່ານ ນາງ ອໍາໄພວອນ ລ້ອມບຸນແພງ ມີຄໍາເຫັນວ່າ: ການປຶກສາຫາລື ແລະ ປະກອບຄຳເຫັນໃສ່ຮ່າງມະຕິວ່າດ້ວຍການປະຕິບັດນະໂຍບາຍໃຫ້ແກ່ພະນັກງານ-ລັດຖະກອນພາຍໃນສະພາແຫ່ງຊາດ ເປັນວຽກງານທີ່ມີຄວາມສໍາຄັນ, ລະອຽດອ່ອນ ຕິດພັນເຖິງສິດຜົນປະໂຫຍດຂອງພະ ນັກງານ-ລັດຖະກອນພາຍໃນສະພາແຫ່ງຊາດ ແລະ ຍາດພີ່ນ້ອງ ໂດຍສະເພາະແມ່ນນະໂຍບາຍດ້ານຕ່າງໆ ບໍ່ວ່າຈະເປັນນະໂຍບາຍເຈັບເປັນ ຫຼື ເສຍຊິວິດ; ພ້ອມກັນນີ້, ຍັງເປັນນະໂຍບາຍລວມຂອງພັກ-ລັດ ກໍານົດອອກໃນແຕ່ລະໄລຍະ.

ບັນດາຜູ້ເຂົ້າຮ່ວມໄດ້ເປັນເຈົ້າການລົງເລິກຄົ້ນຄວ້າ, ປະກອບຄຳຄິດຄຳເຫັນຢ່າງກົງໄປກົງມາ ພ້ອມທັງສົມທຽບ ໃສ່ລະບຽບການປະຕິບັດນະໂຍບາຍຂອງ 3 ອົງການຈັດ ຕັ້ງມະຫາຊົນ ສພຊ ທີ່ມີນິຕິກໍາສະເພາະຂອງແຕ່ລະອົງການ.

ກອງປະຊຸມຄັ້ງນີ້ ໄດ້ຮັບການສະໜັບສະໜູນຊ່ວຍ ເຫຼືອທາງດ້ານງົບປະມານຈາກໂຄງການສ້າງຄວາມເຂັ້ມແຂງໃຫ້ແກ່ສະພາແຫ່ງຊາດ ແລະ ສະພາປະຊາຊົນຂັ້ນແຂວງ ຫຼື ສະເຕັບສ໌ (STEPS) ໂດຍຜ່ານກອງເລຂາຄຸ້ມ ຄອງແຫຼ່ງທຶນຊ່ວຍເຫຼືອລ້າໃຫ້ແກ່ສະພາແຫ່ງຊາດ ສົມທົບກັບງົບປະມານຂອງຄະນະເລຂາທິການສະພາແຫ່ງຊາດ.

(ນາງ ອານິຕາ ມ່ວນສະຫວັດ)