(ສພຊ) – ວັນສຸກທີ 13 ທັນວານີ້ ທີ່ສະພາແຫ່ງຊາດ ໄດ້ມີກອງປະຊຸມປຶກສາຫາລືກ່ຽວກັບແຜນການສ້າງ ແລະ ປັບປຸງກົດໝາຍ ປະຈໍາປີ 2025 ໂດຍການເປັນປະທານຂອງທ່ານ ຄຳແພງ ວິລະພັນ ຄະນະປະຈຳສະພາແຫ່ງຊາດ (ຄປຈສພຊ), ປະທານກຳມາທິການກົດໝາຍ; ເຂົ້າຮ່ວມມີບັນດາທ່ານຮອງປະທານກຳມາທິການ ສພຊ, ຮອງລັດຖະມົນຕີ, ຮອງຫົວໜ້າອົງການ, ຄະນະກົມ ແລະ ພະນັກງານ-ລັດຖະກອນຈາກພາກສ່ວນທີ່ກ່ຽວຂ້ອງ.

ທ່ານ ຄຳແພງ ວິລະພັນ ກ່າວວ່າ: ປີ 2025 ເປັນປີສຸດ ທ້າຍຂອງສະພາແຫ່ງຊາດຊຸດທີ IX ແລະ ຍັງມີວາລະດຳ ເນີນກອງກອງປະຊຸມສະໄໝສາມັນເທື່ອທີ 9 ແລະ ເທື່ອທີ 10 ເຊິ່ງການຈັດຕັ້ງປະຕິບັດຕົວຈິງ ຈະມີການນຳເອົາຮ່າງກົດໝາຍເຂົ້າພິຈາລະນາຮັບຮອງເອົາໃນກອງປະຊຸມສະ ໄໝສາມັນເທື່ອທີ 9 ເທົ່ານັ້ນ ແລະ ຕາມແຜນການແລ້ວ ມີຮ່າງກົດໝາຍທີ່ຈະນຳເຂົ້າພິຈາລະນາຮັບຮອງເອົາທັງໝົດ 17 ສະບັບ (ສ້າງໃໝ່ 5, ປັບປຸງ 12) ເຫັນວ່າເປັນຈຳນວນທີ່ຫຼາຍ; ກອງປະຊຸມຄັ້ງນີ້ ຈະໄດ້ປຶກສາຫາລືກັນກ່ຽວກັບຄວາມພ້ອມຂອງບັນດາຮ່າງກົດໝາຍດັ່ງກ່າວ ເພື່ອຈັດບຸລິມະສິດໃນການນຳເອົາຮ່າງກົດໝາຍທີ່ມີຄວາມພ້ອມເຂົ້າກອງປະຊຸມສະໄໝວິສາມັນເທື່ອທີ 2 ແລະ ສະໄໝສາມັນເທື່ອທີ 9 ຂອງສະພາແຫ່ງຊາດຊຸດທີ IX.

ໃນກອງປະຊຸມ, ທ່ານ ປອ. ພູທອນ ວໍລະເພັດ ຮອງປະທານກຳມາທິການກົດໝາຍ ໄດ້ສະເໜີຮ່າງແຜນການສ້າງ ແລະ ປັບປຸງກົດໝາຍຂອງຄະນະປະຈຳສະພາແຫ່ງຊາດ ປະຈຳປີ 2025; ຈາກນັ້ນ, ກໍມີການປະກອບຄຳເຫັນຕໍ່ຮ່າງແຜນການດັ່ງກ່າວ ຈາກກະຊວງພາຍໃນ, ກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ, ກະຊວງພະລັງງານ ແລະ ບໍ່ແຮ່, ກະຊວງປ້ອງກັນປະເທດ, ກະຊວງສາທາລະນະສຸກ, ກະຊວງການເງິນ, ອົງການໄອຍະການປະຊາຊົນສູງສຸດ, ກະຊວງແຮງງານ ແລະ ສະຫວັດດີການສັງຄົມ, ກະຊວງແຜນການ ແລະ ການລົງທຶນ, ກະ ຊວງເຕັກໂນໂລຊີ ແລະ ການສື່ສານ, ກະຊວງສຶກສາທິການ ແລະ ກິລາ, ກະຊວງຍຸຕິທຳ, ແລະ ຫ້ອງວ່າການສຳນັກງານນາຍົກລັດຖະມົນຕີ ຕາມລຳດັບ.

(ນາງ ອາລິນ ສຸພິມມະປະດິດ)