ເພື່ອເປັນບ່ອນອີງໃຫ້ແກ່ການກໍານົດໜ້າວຽກທີ່ສໍາຄັນ ພາຍໃນຄະນະບໍລິຫງານງານສະມາຄົມມິດຕະພາບ ລາວ-ຈີນ ແຂວງສາລະວັນ ທັງເອກະພາບຮ່ວມກັນ ໃນຈັດຕັ້ງປະຕິບັດ ແລະ ເຄື່ອນໄຫວວຽກງານໃຫ້ມີປະສິດທິພາບ ແລະ ປະສິດທິຜົນ; ໃນຕອນເຊົ້າຂອງວັນທີ 10 ກັນຍາ 2024 ນີ້, ທີ່ຫ້ອງປະຊຸມສະພາປະຊາຊົນແຂວງສາລະວັນ ໄດ້ຈັດກອງປະຊຸມປຶກສາຫາລືວຽກງານຮອບດ້ານຂອງຄະນະບໍລິຫານງານສະມາຄົມມິດຕະພາບ ລາວ-ຈີນ ແຂວງສາລະວັນ ຄັ້ງທີ I, ໂດຍໃຫ້ກຽດເປັນປະທານກອງປະຊຸມຂອງທ່ານ ສີເຮັງ ຫອມສົມບັດ ຮອງເລຂາພັກແຂວງ ປະທານສະພາປະຊາຊົນແຂວງ ທັງເປັນປະທານຄະນະບໍລິຫານງານສະມາຄົມມິດຕະພາບ ລາວ-ຈີນ ແຂວງສາລະວັນ; ເຂົ້າຮ່ວມມີບັນດາທ່ານພາຍໃນຄະນະບໍລິຫານງານສະມາຄົມມິດຕະພາບ ລາວ-ຈີນ ແຂວງສາລະວັນ ແລະ ຄະນະເລຂາທິການ ສະພາປະຊາຊົນແຂວງ.

ທ່ານ ໜູຕຽມ ຄໍາປະເສີດ ຫົວໜ້າພະແນກການຕ່າງປະເທດແຂວງ ໄດ້ຜ່ານຂໍ້ຕົກລົງ ຂອງສະມາຄົມມິດຕະພາບ ລາວ-ຈີນ ຂັ້ນສູນກາງ ສະບັບເລກທີ 04/ສມຈ-ລ ລົງວັນທີ 10 ກຸມພາ 2022, ວ່າດ້ວຍການແຕ່ງຕັ້ງຄະນະບໍລິຫານງານສະມາຄົມມິດຕະພາບ ລາວ-ຈີນ ແຂວງສາລະວັນ ແລະ ລາຍງານການເກັບກໍາຂໍ້ມູນສະພາບລວມທັງໝົດຂອງນັກທຸລະກິດ ຂອງຄົນຈີນທີ່ມາສ້າງຕັ້ງໂຮງງານຢູ່ພາຍໃນແຂວງສາລະວັນ. ຈາກນັ້ນ, ໃນທີ່ປະຊຸມແຕ່ລະທ່ານໄດ້ປຶກສາຫາລື ແລະ ແລກປ່ຽນປະກອບຄໍາຄິດຄໍາເຫັນຢ່າງເປັນເຈົ້າການໃນວຽກງານຕ່າງໆໃຫ້ມີຄວາມກົມກຽວ ແລະ ໄປໃນທິດດຽວກັນ.

ກອງປະຊຸມໄດ້ເຫັນດີຕົກລົງເປັນເອກະພາບ ກໍານົດ 3 ໜ້າວຽກຫຼັກສໍາຄັນ ປະກອບມີ: 1. ສະເໜີປັບປຸງກົງຈັກການຈັດຕັ້ງ ຂໍ້ຕົກລົງ ວ່າດ້ວຍ ການແຕ່ງຕັ້ງຄະນະບໍລິຫານງານສະມາຄົມມິດຕະພາບ ລາວ-ຈີນ ແຂວງສາລະວັນ ຄືນໃໝ່ໃຫ້ມີຄວາມຖືກຕ້ອງ ແລະ ແທດເໝາະກັບສະພາບຄວາມເປັນຈິງ ແລະ ຕ້ອງແຕ່ງຕັ້ງກອງເລຂາເພີ່ມເຕີມ; 2. ເກັບກໍາຂໍ້ມູນສະຖິຕິ ບັນຊີຈໍານວນ ຄົນຈີນ ທີ່ເຂົ້າມາດໍາເນີນທຸລະກິດ ແລະ ອາໄສຢູ່ພາຍໃນແຂວງ ມີຈໍານວນໜ້ອຍຫຼາຍປານໃດ; 3.ສົມທົບກັບພາກສ່ວນທີ່ກ່ຽວຂ້ອງ ເພື່ອຄົ້ນຄວ້າ ກ່ຽວກັບແນວຄວາມຄິດລິເລີ່ມໃນການພົວພັນຮ່ວມມືລະຫວ່າງ ແຂວງສາສະວັນ ກັບບັນດາແຂວງ-ເມືອງ ຂອງ ສປ ຈີນ ເພື່ອຍາດແຍ່ງການຊ່ວຍເຫຼືອ ແລະ ດຶງດູດເອົານັກລົງທຶນມາພັດທະນາແຂວງ ຫຼື ມີການແຮກສ່ຽວ ກັບບັນດາເມືອງຂອງແຂວງ ທີ່ມີນັກທຸລະກິດຄົນຈີນ ຫຼື ສະມາຄົມຂອງຄົນຈີນ ຢູ່ພາຍໃນແຂວງສາລະວັນ.

ພາບ-ຂ່າວ: ດີລໍາພົນ ພົມມະຈັນ