(ສພຊ) ໃນໂອກາດທີ່ທ່ານ ພົທ. ສຸວອນ ເລືອງບຸນມີ ຮອງປະທານສະພາແຫ່ງຊາດ ເຄື່ອນໄຫວຢ້ຽມຢາມແຂວງຫລວງພະບາງ ໃນຕົ້ນເດືອນເມສາຜ່ານມາ, ທ່ານ ນາງ ສິລິພອນ ສຸພັນທອງ ໄດ້ລາຍງານໃຫ້ຮູ້ວ່າ: ໂຄງການກໍ່ສ້າງທາງລົດໄຟລາວ-ຈີນ ມີໄລຍະທາງຜ່ານແຂວງຫລວງພະບາງທັງໝົດ 80 ກິໂລແມັດ (ກມ), ຜ່ານທັງໝົດ 28 ບ້ານ, ໃນນັ້ນ: ຜ່ານນະຄອ ຫລວງພະບາງ (11 ກມ, 5 ບ້ານ), ເມືອງຊຽງເງິນ (50 ກມ, 16 ບ້ານ) ແລະ ເມືອງຈອມເພັດ (19 ກມ, 7 ບ້ານ), ມີສະຖານີທັງໝົດ 6 ແຫ່ງ, ໃນນີ້: ສະຖານີໃຫຍ່ 1 ແຫ່ງ ຢູ່ນະຄອນຫລວງພະບາງ, ມີຂົວທັງໝົດ 33 ແຫ່ງ. ຄວາມຄືບໜ້າໃນການເບີກຈ່າຍຄ່າຊົດເຊີຍ: ມີຜູ້ຖືກຜົນກະທົບທັງໝົດ 869 ຄອບຄົວ, ໄດ້ຮັບງົບປະມານແລ້ວຈຳນວນ 10 ງວດ ລວມມູນຄ່າ 118.106.161.638 ກີບ ເທົ່າກັບ 98,4% ຂອງແຜນຄວາມຕ້ອງການທັງໝົດ, ຍັງຄ້າງ 1.924.676.000 ກີບ; ນອກນັ້ນ ຍັງມີຄວາມຕ້ອງການງົບປະມານເພີ່ມຕື່ມທັງໝົດ ຈໍານວນ 1.208.504.000 ກີບ.

            ສຳລັບການຈັດຕັ້ງປະຕິບັດວາລະແຫ່ງຊາດວ່າດ້ວຍການແກ້ໄຂບັນຫາຢາເສບຕິດ ໃນໄລຍະ 1 ປີຜ່ານມາ, ກຳລັງປ້ອງກັນຄວາມສະຫງົບ ໄດ້ນຳເອົາຢາເສບຕິດ ທີ່ສານຕັດສິນໃຊ້ໄດ້ຢ່າງເດັດຂາດແລ້ວມາຈູດທໍາລາຍ ມີຄື: ຢາບ້າ 894.325 ເມັດ, ຢາບ້າເປັນຝຸ່ນ (ສີແດງ, ສີຂຽວ ແລະ ສີບົວ) 129,64 ກິໂລກຣາມ, ຝຸ່ນສີຂາວຄ້າຍຄືເຮໂລອິນ 83.750 ກິໂລກຣາມ, ແກ່ນຝິ່ນ 177,9 ກິໂລກຣາມ, ຢາໄອ 2 ກິໂລກຣາມ ແລະ ອຸປະກອນເສບຢາຈຳນວນຫນຶ່ງ; ໄດ້ປະສານສົມທົບກັບພາກສ່ວນທີ່ກ່ຽວຂ້ອງ ສຳຫລວດ ແລະ ກຳນົດພື້ນທີ່ ລັກລອບປູກຝິ່ນຢູ່ບາງເມືອງ ເຊິ່ງພົບເຫັນພື້ນທີ່ລັກລອບປູກຝິ່ນ ກວມເອົາ 18 ບ້ານ ໃນຈຳນວນ 211 ຄອບຄົວ ມີ 189,11 ເຮັກຕາ; ໄດ້ເອົາໃຈໃສ່ປະຕິບັດມາດຕະການທາງດ້ານກົດໝາຍ ເພື່ອສະກັດກັ້ນ ແລະ ຕ້ານຢາເສບຕິດຢ່າງຕັ້ງໜ້າ ສະແດງອອກ ສາມາດມ້າງກຸ່ມແກ້ງຄ້າຂາຍຢາເສບຕິດໄດ້ 131 ລາຍ (ທຽບໃສ່ປີ 2020 ມ້າງໄດ້ເພີ່ມຂຶ້ນ 40 ລາຍ), ກັກຕົວ 195 ຄົນ, ຍິງ 20 ຄົນ, ຍຶດຂອງກາງຢາເສບຕິດໄດ້ 3.702.657 ເມັດ, ນ້ຳຫນັກ 98.052 ກຣາມ, ຢາຝິ່ນ 11.018 ກິໂລກຣາມ, ເຮໂຣອິນ 4.703 ກຣາມ, ລົດໃຫຍ່ 10 ຄັນ, ລົດຈັກ 37 ຄັນ; ສາມາດມ້າງກຸ່ມແກ້ງເຄືອຂ່າຍຄ້າຂາຍຢາເສບຕິດລາຍໃຫຍ່, ລາຍກາງ ແລະ ລາຍຍ່ອຍໄດ້ທັງຫມົດ 41 ລາຍ; ພ້ອມນັ້ນ, ກໍໄດ້ເອົາໃຈໃສ່ປິ່ນປົວຜູ້ຕິດຢາເສບຕິດໃຫ້ຖືກຕາມຫລັກການ ແລະ ຂັ້ນຕອນຂອງການປິ່ນປົວ.          ສຳລັບການແກ້ໄຂຄວາມຫຍຸ້ງຍາກທາງດ້ານເສດຖະກິດ-ການເງິນ ສາມາດບັນລຸບັນດາຄາດໝາຍທີ່ວາງໄວ້ຄື: 1). ໃນປີ 2021 ຈັງຫວະການຂະຫຍາຍຕົວທາງດ້ານເສດຖະກິດ-ສັງຄົມໃນລະດັບ 3,6%, ຫຼຸດຄາດໝາຍມະຕິສະພາ 0,9% (ຮັບຮອງ 4,5%); 2).ໄດ້ສຸມໃສ່ຂຸດຄົ້ນລາຍຮັບ, ຈັດເກັບພາສີ-ອາກອນ ແລະ ລາຍຮັບອື່ນໆຄົບຖ້ວນກວ່າເກົ່າ ອັດຊ່ອງຫວ່າງການຮົ່ວໄຫລໃນການເກັບລາຍຮັບ ແລະ ຄຸ້ມຄອງລາຍຈ່າຍ ຕິດພັນກັບການປະຢັດມັດທະຍັດ, ຕ້ານການຟຸມເຟືອຍທີ່ນຳໃຊ້ງົບປະມານຂອງລັດທີ່ບໍ່ຈຳເປັນ ແລະ ຂະຫຍາຍການນຳໃຊ້ເຄື່ອງມືທັນສະໄໝ ເຂົ້າໃນການເກັບລາຍຮັບຢູ່ບັນດາຫົວໜ່ວຍທຸລະກິດ, ສະຖານທີ່ທ່ອງທ່ຽວຕ່າງໆ ໄດ້ຮັບການຈັດຕັ້ງປະຕິບັດດີຂຶ້ນເປັນກ້າວໆ; 3. ເອົາໃຈໃສ່ຊຸກຍູ້, ສົ່ງເສີມການຜະລິດກະສິກຳເປັນສິນຄ້າ, ການຜະລິດສະບຽງອາຫານ, ປູກເຂົ້າລື່ນແຜນການ 2,88 %, ຜົນຜະລິດເຂົ້າລື່ນແຜນການ 3,52 %, ສາມາດກຸ້ມກິນໄດ້ 11 ເດືອນ; 4). ໄດ້ອໍານວຍຄວາມສະດວກໃນການເຂົ້າເຖິງແຫລ່ງທຶນ SME ດອກເບ້ຍຕໍ່າ ແຂວງຫລວງພະບາງ ໄດ້ຮັບອະນຸມັດສິນເຊື່ອ 16,10 ຕື້ກີບ, ລວມມີ 12 ຫົວໜ່ວຍ, 14 ສັນຍາ; 5). ໄດ້ຊຸກຍູ້, ຕິດຕາມ, ກວດກາການຈັດຕັ້ງປະຕິບັດບັນດາໂຄງການທາງຫລວງທ້ອງຖິ່ນ, ໂຄງການຍົກລະດັບເສັ້ນທາງພາຍໃນເທສະບານແຂວງ, ເສັ້ນທາງແຕ່ສະຖານີລົດໄຟລາວ-ຈີນ ເຂົ້າຫາເທສະບານນະຄອນຫລວງພະບາງ; 6). ສືບຕໍ່ການສໍາຫລວດ-ວັດແທກພິສູດຫລັກຖານເພື່ອຂຶ້ນທະບຽນອອກໃບຕາດິນ, ຂຶ້ນສຳມະໂນທີ່ດິນ, ສືບຕໍ່ການສ້າງນິຕິກໍາໃຕ້ກົດໝາຍ; 7). ການຈັດຕັ້ງປະຕິບັດ 15 ຄາດໝາຍຂອງວຽກງານສຶກສາ ແມ່ນບັນລຸໄດ້ 11 ຄາດໝາຍ, ຍັງ 4 ຄາດໝາຍ ບໍ່ທັນບັນລຸ ຄື: (1) ອັດຕານັກຮຽນເຂົ້າຮຽນໃໝ່ ປ.1, (2) ດັດສະນີຄວາມສະເໝີພາບ ຍິງ-ຊາຍ ອັດຕາການເລື່ອນຊັ້ນ ປ.5 ຫາ ມ.1, (3) ອັດຕາປະລະການຮຽນຂອງນັກຮຽນຊັ້ນມັດທະຍົມຕອນຕົ້ນ, (4) ນັກຮຽນທີ່ຈົບຊັ້ນມັດທະຍົມຕອນຕົ້ນໄດ້ເຂົ້າຮຽນຕໍ່ໃນສາຍອາຊີວະສຶກສາ ແລະ ເຝິກອົບຮົມວິຊາຊີບ; 8). ການຈັດຕັ້ງປະຕິບັດ 11 ຄາດໝາຍ ຂອງວຽກງານສາທາລະນະສຸກ ແມ່ນສາມາດບັນລຸໄດ້ 9 ຄາດໝາຍ, ສ່ວນອີກ 2 ຄາດໝາຍ ຍັງບໍ່ທັນບັນລຸຄື (ຄາດໝາຍທີ 9 ແລະ 11) ຈະຕ້ອງໄດ້ສືບຕໍ່ສູ້ຊົນ; 9). ໄດ້ສ້າງແຜນຮອງຮັບໃຫ້ແກ່ການເປີດຮັບນັກທ່ອງທ່ຽວໃນເຂດພື້ນທີ່ສີຂຽວ ຕາມນະໂຍບາຍຂອງລັດຖະບານ; 10). ພັດທະນາສີມືແຮງງານ ໄດ້ 1.923 ຄົນ, ຍິງ 688 ຄົນ, ລື່ນແຜນການ 92%; ເກັບກຳ ແລະ ຈັດຫາງານໄດ້ 1.673 ຄົນ, ລື່ນແຜນການ 1,7%; ມີຜູ້ຫວ່າງງານມາລົງທະບຽນສະໝັກງານທັງໝົດ 226 ຄົນ, ຍິງ 65 ຄົນ, ນອກນັ້ນ ຍັງໄດ້ສະໜອງເຄື່ອງອຸປະໂພກ, ບໍລິໂພກ ແລະ ອື່ນໆ ຊ່ວຍເຫລືອຄອບຄົວຜູ້ທີ່ໄດ້ຮັບຜົນກະທົບຈາກໄພພິບັດທາງທຳມະຊາດ, ພະຍາດລະບາດ ແລະ ອຸດໜູນຫວ່າງງານ; 11). ໄດ້ຈັດຕັ້ງການຄົ້ນຄວ້າປັບປຸງໂຄງປະກອບກົງຈັກການຈັດຕັ້ງ ຂອງບັນດາພະແນກການ, ອົງການຂັ້ນແຂວງ ຕາມຄໍາສັ່ງຂອງຄະນະເລຂາທິການຂອງສູນກາງພັກ ເລກທີ 190/ຄລສພ, ລົງວັນທີ 29/9/2021, ຄໍາສັ່ງຂອງຄະນະປະຈຳພັກແຂວງ ເລກທີ 07/ຄປພຂ, ລົງວັນທີ 8/11/2021.

(ພາບ ແລະ ບົດ: ກົງທະນູຄໍາ ພິພັດເສລີ)