ໃນລະຫວ່າງວັນທີ 21-23 ກັນຍາ 2022 ນີ້, ນໍາໂດຍທ່ານ ຄໍາດີ ວົງລ້ອມ ຮອງເລຂາຄະນະບໍລິຫານງານພັກແຂວງ, ສະມາຊິກສະພາແຫ່ງຊາດຊຸດທີ IX ປະຈໍາເຂດເລືອກຕັ້ງທີ 04, ປະທານ ສພຂ, ທ່ານ ຄໍາພອນ ພິມມະລາດ, ສສຂ ປະຈໍາເຂດເລືອກຕັ້ງເມືອງແບງ, ທ່ານ ທອງໄຊ ທໍ່ຈົງເລ່ຍຈີ່ ສສຂ ປະຈໍາເຂດເລືອກຕັ້ງເມືອງແບງ ແລະ ທ່ານ ປອ ນາງ ວຽງມາລີ ສຸລີໄຊ ສສຂ ປະຈໍາເຂດເລືອກຕັ້ງເມືອງແບງ, ໄດ້ສໍາເລັດການເຄື່ອນໄຫວພົບປະຜູ້ມີສິດເລືອກຕັ້ງ ແລະ ເຜີຍແຜ່ຜົນສໍາເລັດຂອງກອງປະຊຸມສະໄໝສາມັນເທື່ອທີ່ 3 ຂອງ ສພຊ ຊຸດທີ IX ແລະ ສພຂ ຊຸດທີ II ຢູ່ເມືອງແບງ ໄດ້ທັງໝົດ 12 ຈຸດຄື: ສະໂມສອນເມືອງ, ບ້ານ: ປາງທອງ, ທ່າມື່ນ, ນາແມດ, ກີ່ວສັງວັນ, ໂພນສະອາດ, ນາມອນ, ປາງສົມ, ໂພນສີ, ວັງວະ, ສາມກາງ ແລະ ບ້ານຫວຍລຸກ, ໂດຍການຕ້ອນຮັບຂອງທ່ານ ຄໍາຈັນ ວາບົວແສງ ຮອງເລຂາພັກເມືອງ, ມີບັນດາທ່ານຄະນະປະຈຳພັກເມືອງ, ກໍາມະການພັກເມືອງ, ຫົວໜ້າ-ຮອງຫົວໜ້າຫ້ອງການ, ພະນັກງານລັດຖະກອນ, 2 ກໍາລັງ ປກຊ-ປກສ, ລັດວິສາຫະກິດ, ເລຂາພັກບ້ານ-ນາຍບ້ານ, ອົງການປົກຄອງບ້ານ ແລະ ປະຊາຊົນບັນດາເຜົ່າ ເຂົ້າຮ່ວມທັງໝົດ 1056 ທ່ານ, ຍິງ 385 ທ່ານ.

ໃນພິທີໄດ້ຮັບຟັງການລາຍງານຜົນການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ໃນໄລຍະ 6 ເດືອນຕົ້ນປີ 2022 ຕິດພັນກັບການຈັດຕັ້ງປະຕິບັດ 2 ວາລະແຫ່ງຂອງເມືອງແບງ ແລະ ຂອງແຕ່ລະບ້ານ. ຫຼັງຈາກນັ້ນ ບັນດາທ່ານ ສສຊ, ສສຂ ກໍ່ໄດ້ຜັດປ່ຽນກັນເຜີຍແຜ່ເນື້ອໃນຜົນສຳເລັດຂອງກອງປະຊຸມສະໄໝສາມັນເທື່ອທີ 03 ຂອງ ສພຊ ຊຸດທີ IX ແລະ ສພຂ ຊຸດທີ II ວ່າທັງ 2 ກອງປະຊຸມໄດ້ພິຈາລະນາ, ຮັບຮອງເອົາຫຼາຍບັນຫາສຳຄັນຫຍັງແດ່.

ໂອກາດນີ້, ກໍ່ໄດ້ຮັບຟັງຄໍາຄິດເຫັນ ແລະ ຄໍາສະເໜີຂອງພະນັກງານຫຼັກແຫຼງ, ອໍານາດການປົກຄອງບ້ານ ແລະ ພໍ່ແມ່ນປະຊາຊົນບັນດາເຜົ່າ ໂດຍສະເພາະແມ່ນບັນຫາການພັດທະນາ ໂຄງລ່າງພື້ນຖານເຊັນ: ການກໍ່ສ້າງເສັ້ນທາງ, ຊົນລະປະທານ, ນໍ້າລິນສະອາດ, ຂໍທຶນສ້າງສະໂມສອນ, ການຄຸ້ມຄອງສິນຄ້າໃນທ້ອງຕະຫຼາດ, ນໍ້າມັນເຊື້ອໄຟ, ຂໍເພີ້ມເງິນເດືອນໃຫ້ພະນັກງານລັດຖະກອນ, ນະໂຍບາຍຕໍ່ນັກປະຕິວັດປາງສົງຄາມ ແລະ ບັນຫາອື່ນໆ. ຕໍ່ກັບຄໍາຄິດເຫັນ ແລະ ຄໍາສະເໜີດັ່ງກ່າວນັ້ນ ທາງ ສສຊ-ສສຂ ໄດ້ຊີ້ແຈງກັບທີ່ແລ້ວ ແລະ ບາງບັນຫາຈະໄດ້ສະຫຼຸບສັງລວມ ເພື່ອນໍາສະເໜີຕໍ່ລັດຖະບານ, ຕໍ່ກອງປະຊຸມສະພາແຫ່ງຊາດ ແລະ ຄະນະປະຈຳສະພາປະຊາຊົນແຂວງ ຄົ້ນຄວ້າປຶກສາຫາລື, ມອບໃຫ້ຄະນະກໍາມະການ ສະເໜີຕໍ່ພາກສ່ວນກ່ຽວຂ້ອງຄົ້ນຄ້ວາ, ພິຈາລະນາແກ້ໄຂ ໃຫ້ຖືກຕ້ອງຕາມລະບຽບການ ແລະ ທັນເວລາ. ພ້ອມດຽວກັນນັ້ນ, ທ່ານ ຄໍາດີ ວົງລ້ອມ ປະທານ ສພຂ ຍັງໄດ້ຕາງໜ້າຄະນະປະຈໍາ ສພຂ ມອບເງິນສົດຈໍານວນ 5 ແສນກີບ, ເຄື່ອງນຸ່ງຫົມ ແລະ ເຄື່ອງໃຊ້ຄົວເຮືອນອີກຈໍານວນໜຶ່ງໃຫ້ແກ່ຄອບຄົວຜູ້ເສຍຊີວິດ ທີ່ຖືກນໍ້າພັດໄຫຼ ຢູ່ບ້ານກີ່ວສັງວັນຕື່ມອີກ.

      

ຈຸດປະສົງຂອງການລົງເຄື່ອນໄຫວພົບປະຜູ້ມີສິດເລືອກຕັ້ງຄັ້ງນີ້ ເພື່ອໃຫ້ພະນັກງານ-ລັດຖະກອນ, ທະຫານ-ຕໍາຫຼວດ, ອຳນາດການປົກຄອງຂັ້ນເມືອງ ແລະ ຂັ້ນບ້ານ ຕະຫຼອດຮອດພໍ່ແມ່ປະຊາຊົນ ໄດ້ມີຄວາມຮັບຮູ້,ເຊື່ອມຊຶມ ແລະ ເຂົ້າໃຈ ຕໍ່ແນວທາງນະໂຍບາຍຂອງພັກເວົ້າລວມ, ເວົ້າສະເພາະກໍ່ຄືວຽກງານຂອງສະພາແຫ່ງຊາດ ແລະ ຂອງສະພາປະຊາຊົນຂັ້ນແຂວງ ທັງເປັນການເກັບກຳສະພາບການ, ຄໍາຄິດເຫັນ, ຄໍາສະເໜີ, ບັນຫາຂັດຂ້ອງໝອງໃຈຕ່າງໆຂອງປະຊາຊົນໃນແຕ່ລະຈຸດ, ຄຽງຄູ່ກັບການປັບປຸງຊີວິດການເປັນຢູ່ ຂອງປະຊາຊົນ ຕໍ່ກັບສະພາບການ ເໜັງຕີງຂອງລາຄານໍ້າມັນເຊື້ອໄຟ, ລາຄາສິນຄ້າ, ອັດຕາແລກປ່ຽນ ແລະ ຄວາມຫຍຸ້ງຍາກຍາກອຶ່ນໆ ທີ່ສົ່ງຜົມກະທົບຕໍ່ເສດຖະກິດ, ການດຳລົງຊີວິດຂອງປະຊາຊົນ ກໍ່ຄືອົງການຈັດຕັ້ງພັກ-ລັດ ແລະ ເພື່ອຮ່ວມກັນຊອກຫາວິທີແກ້ໄຂໃນຕໍ່ໜ້າ ໃຫ້ບັນລຸຜົນສຳເລັດຕາມຈຸດປະສົງ ແລະ ລະດັບຄາດໝາຍ.

  

ພາບ/ຂ່າວ: ແສງພອນ ອິິນນະລົງ.