ໃນວັນທີ 26 ເມສາ 2024 ຜ່ານມານີ້ ສະພາປະຊາຊົນແຂວງວຽງຈັນ ໄດ້ຈັດກອງປະຊຸມເຊື່ອມຊືມເອກະສານ ກ່ຽວກັບການນໍາໃຊ້ເອກະສານສຶກສາອົບຮົມການເມືອງ-ແນວຄິດ ສໍາລັບສະມາຊິກພັກ, ພະນັກງານຫຼັກແຫຼ່ງ ໃຫ້ກຽດຂຶ້ນເຊື່ອມຊຶ່ມ ໂດຍ ທ່ານ ນາງ ຈັນທະຄອນ ສີອໍາພອນ ເລຂາໜ່ວຍພັກສະພາປະຊາຊົນແຂວງວຽງຈັນ ເຂົ້າຮ່ວມມີ ຄະນະພັກ, ຈຸພັກ, ສະມາຊິກພັກ, ພະນັກງານຫຼັກແຫຼ່ງພາຍໃນສະພາປະຊາຊົນແຂວງວຽງຈັນເຂົ້າຮ່ວມຢ່າງພ້ອມພຽງ.

ຈຸດປະສົ່ງ: ເພື່ອເຮັດໃຫ້ພະນັກງານ,ສະມາຊິກພັກ ມີຄວາມຮັບຮູ້, ເຂົ້າໃຈກ່ຽວກັບຄວາມໜາຍ ແລະ ຄວາມສໍາຄັນຂອງການດໍາເນີນກອງປະຊຸມໃຫ່ຍ 3 ຂັ້ນ ຂອງພັກ; ເຂົ້າໃຈກ່ຽວກັບເນື້ອໃນຕ້ອງກໍາແໜ້ນ ໃນການດໍາເນີນກອງປະຊຸມໃຫ່ຍ 3 ຂັ້ນ ຂອງພັກ ແລະ ເປັນເຈົ້າການນໍາເອົາມະຕິກອງປະຊຸມ ໄປຈັດຕັ້ງຜັນຂະຫຍາຍ ໃຫ້ເກີດຜົນເປັນຈິງ; ບົນພື້ນຖານຄວາມຮັບຮູ້, ເຂົ້າໃຈດັ່ງກ່າວ ເພື່ອເປັນການປັບປຸງພາຍໃນພັກ ໃຫ້ມີຄວາມປອດໃສ, ເຂັ້ມແຂງ ແລະ ໜັກແໜ້ນ ຮັບປະກັນການກໍ່ສ້າງພັກຕາມ 5 ຫຼັກການ ແລະ 3 ທິດນໍາຂອງພັກ, ຖືກຕ້ອງຕາມກົດລະບຽບພັກ; ເພື່ອຄັດເລືອກບຸກຄະລະກອນ ທີ່ມີມາດຕະຖານ, ເງື່ອນໄຂຕາມທີ່ກໍານົດໄວ້ ປະກອບເຂົ້າໃນການຈັດຕັ້ງແຕ່ລະຂັ້ນ ໃນລະບົບການເມືອງ, ເພື່ອບຸກທະລຸການສ້າງການຫັນປ່ຽນຢ່າງແຂງແຮງ ແລະ ເລິກເຊິ່ງ ວຽກງານພະນັກງານຂອງຂະແໜງການ, ທ້ອງຖິ່ນ, ສາມາດຕອບສະໜອງຄວາມຮຽກຮ້ອງຕ້ອງການຂອງໜ້າທີ່ການເມືອງໃນໄລຍະໃໜ່ ແລະ ເພື່ອສ້າງຄວາມເຊື່ອໜັ້ນ, ສັດທາຂອງມະຫາຊົນ ຕໍ່ການນໍາພາຂອງຄະນະພັກ ແຕ່ລະຂັ້ນ ກໍຄື ພະນັກງານ, ສະມາຊິກພັກ.

ເອກະສານທີ່ນໍາມາເຊື່ອມຊື່ມໃນຄັ້ງນີ້ມີ 4 ເນື້ອໃນເອກະສານ: ຄວາມເຂົ້າໃຈກຽ່ວກັບການດໍາເນີນກອງປະຊຸມໃຫຍ່ 3 ຂັ້ນຂອງພັກ; ສູງຄວາມສາມາດນໍາພາ ແລະ ຄວາມເປັນແບບຢ່າງນໍາໜ້າຂອງພັກ; ຕັ້ງໜ້າຝຶກຝົນຫຼໍ່ຫຼອມຄຸນທາດການເມືອງ ແລະ ຄຸນສົມບັດສິນທໍາປະຕິວັດ ແລະ ເດັດດຽ່ວແກ້ໄຂປະກົດການຫຍໍ້ທໍ້ໃນຖັນແຖວພະນັກງານ ແລະ ສະມາຊິກ.

ໃນຕ້ອນທ້າຍ ທ່ານປະທານກອງປະຊຸມໄດ້ຍົກໃຫ້ເຫັນຄວາມສໍາຄັນໃນການເຊື່ອມຊຶ່ມເອກສານໃນຄັ້ງນີ້ກໍ່ເພື່ອໂຄສະນາເຜີຍແຜ່ໃຫ້ສະມາຊິກພັກ,ພະນັກງານຫຼັກແຫຼ່ງໄດ້ຮັບຮູ້ ແລະ ເຂົ້າໃຈເຖີງຄວາມໜາຍຄວາມສໍາຄັນຂອງກອງປະຊຸມໃຫຍ່ 3 ຂັ້ນ ແນໃສ່ເພື່ອສ້າງຄວາມຕື່ນຕົວ, ເປັນເຈົ້າການເຂົ້າຮ່ວມໃນການກະກຽມ ແລະ ດໍາເນີນກອງປະຊຸມໃຫຍ່ 3 ຂັ້ນ,ໃຫ້ດໍາເນີນໄປດ້ວຍຄວາມເປັນລະບຽບຮຽບຮ້ອຍ ແລະ ມີຜົນສໍາເລັດຢ່າງຈົບງາມ.

ພາບ- ຂ່າວ ບູລາຕີ ແສນທະວົງ