ໃນລະຫວ່າງວັນທີ 14-16 ພຶດສະພາ 2024 ຄະນະກໍາມະການຍຸຕິທໍາ ແລະ ປ້ອງກັນຊາດ-ປ້ອງກັນຄວາມສະຫງົບ ສະພາປະຊາຊົນແຂວງ ສະຫວັນນະເຂດ ໄດ້ລົງເຄື່ອນໄຫວໂຄສະນາເຜີຍແຜ່ ກົດໝາຍວ່າດ້ວຍ ສະພາປະຊາຊົນແຂວງ ແລະ ກົດໝາຍວ່າດ້ວຍການແກ້ຄໍາຮ້ອງທຸກ ເຊິ່ງນໍາໂດຍທ່ານ ພູທອນ ແກ້ວພູວົງ ຮອງປະທານສະພາປະຊາຊົນແຂວງ; ທ່ານ ສະແຫວງ ນັນທະວົງ ປະທານຄະນະກໍາມະການຍຸຕິທໍາ ແລະ ປ້ອງກັນຊາດ-ປ້ອງກັນຄວາມສະຫງົບ, ຮອງປະທານຄະນະກໍາມະການຍຸຕິທໍາ ແລະ ປກຊ-ປກສ, ຮອງຄະນະເລຂາທິການສະພາປະຊາຊົນແຂວງ ພ້ອມຄະນະ ໄດ້ລົງເຄື່ອນໄຫວເຜີຍແຜ່ກົດໝາຍ ໃນ 3 ເມືອງ; ໂດຍໄດ້ຮັບການຕ້ອນຮັບຈາກບັນດາທ່ານ ເຈົ້າເມືອງ ແລະ ຮອງເຈົ້າເມືອງ,ສະມາຊິກສະພາປະຊາຊົນແຂວງ ປະຈໍາເຂດເລືອກຕັ້ງເມືອງ, ບັນດາທ່ານກໍາມະການພັກເມືອງ, ຫົວໜ້າ, ຮອງຫົວໜ້າຫ້ອງການ, ພະນັກງານ, ທະຫານ-ຕໍາຫຼວດ ຕະຫຼອດຮອດອໍານາດການປົກຄອງບ້ານ  ໃນເທດສະບານເມືອງເຂົ້າຮ່ວມຮັບຟັງຢ່າງພ້ອມພຽງ.

        ຈຸດປະສົງໃນການເຜີຍແຜ່ໃນຄັ້ງນີ້ກໍ່ເພື່ອເຮັດໃຫ້ພະນັກງານການນໍາຂອງທຸກຫ້ອງການໃນເມືອງ ເຂົ້າໃຈ ແລະ ເປັນເອງກະພາບກັນໃນການຈັດຕັ້ງປະຕິບັດລະບຽບກົດໝາຍ, ໂດຍສະເພາະການຈັດຕັ້ງຂັ້ນຕອນໃນການຮ້ອງທຸກຂອງພໍ່ແມ່ປະຊາຊົນຜູ້ທີ່ມີສິດເລືອກຕັ້ງ, ແລະ ສ້າງຄວາມຮັບຮູ້, ເຂົ້າໃຈ ໃຫ້ແກ່ທ້ອງຖິ່ນຮາກຖານ, ພະນັກງານ-ລັດຖະກອນ ແລະ ປະຊາຊົນລາວບັນດາເຜົ່າ ຕໍ່ເນື້ອໃນກົດໝາຍ ແນໃສ່ເຮັດໃຫ້ທຸກພາກສ່ວນທີ່ກ່ຽວຂ້ອງ ສາມາດປະຕິບັດພາລະບົດບາດ ຕາມຂອບເຂດສິດ ແລະ ໜ້າທີ່ຂອງຕົນໄດ້ເປັນຢ່າງດີ; ພາຍຫຼັງທີ່ໄດ້ເຜີຍແຜ່ທັງສອງກົດໝາຍສໍາເລັດແລ້ວປະທານກອງປະຊຸມກໍ່ໄດ້ເປີດໂອກາດໃຫ້ຜູ້ແທນກອງປະຊຸມ ສົນທະນາ ແລະ ປ່ຽນຄໍາຄິດຄໍາເຫັນ ໂດຍສະເພາະບັນຫາທີ່ເກີດຂຶ້ນໃນການຈັດຕັ້ງປະຕິບັດລະບຽບກົດໝາຍທີ່ຜ່ານມາຂອງທ້ອງຖິ່ນ, ຕໍ່ຈາກນັ້ນປະທານກອງປະຊຸມກໍ່ໄດ້ຊີ້ແຈງຕໍ່ກັບບັນຫາທີ່ຜູ້ແທນກອງປະຊຸມສະເໜີ ແລະ ແລກປ່ຽນ

ທ້າຍສຸດປະທານກອງປະຊຸມກໍ່ໄດ້ສະຫຼຸບຕີລາຄາ ແລະ ພ້ອມທັງມີທິດຊີ້ນໍາ ໃນການລົງເຜີຍແຜ່ໃນຄັ້ງນີ້ໂດຍທ່ານໄດ້ເນັ້ນໃຫ້ບັນດາທ່ານຜູ້ເຂົ້າຮ່ວມກອງປະຊຸມຈົ່ງໄດ້ນໍາເອົາບົດຮຽນໃນຄັ້ງນີ້ນໍາໄປຈັດຕັ້ງຜັນຂະຫຍາຍໃຫ້ກວ້າງຂວາງໄປໃນທົ່ວສັງຄົມ ໂດຍສະເພາະການຈັດຕັ້ງ ແລະ ພະນັກງານທີ່ຮັບຜິດຊອບໃນການແກ້ໄຂຄຳຮ້ອງທຸກ ລວມເຖິງປະຊາຊົນບັນດາເຜົ່າ ໃຫ້ໄດ້ຮັບຮູ້ ແລະ ເຂົ້າໃຈ ເນື້ອໃນໃຫ້ມີຄວາມເປັນເອກະພາບກັນ ກ່ຽວກັບການນໍາໃຊ້ ແລະ ການຈັດຕັ້ງປະຕິບັດກົດໝາຍ.