ໃນລະຫວ່າງວັນທີ 4-5 ກໍລະກົດ 2024 ຢູ່ທີ່ເມືອງເຟືອງ, ແຂວງວຽງຈັນ, ສະພາປະຊາຊົນແຂວງວຽງຈັນ ໄດ້ຈັດກອງປະຊຸມຝຶກອົບຮົມເພື່ອສ້າງຄວາມເຂັ້ມແຂງໃຫ້ແກ່ ພະນັກງານ-ລັດຖະກອນ ພາຍໃນສະພາປະຊາຊົນແຂວງ ແລະ ພະນັກງານຊ່ວຍວຽກສະມາຊິກສະພາປະຊາຊົນແຂວງ ປະຈໍາເຂດເລືອກຕັ້ງ 11 ເມືອງ ຂອງແຂວງວຽງຈັນ; ໂດຍການເປັນປະທານຂອງທ່ານ ລໍາໄມ ກູດລາວົງ ຄະນະປະຈໍາພັກແຂວງ, ຮອງປະທານສະພາປະຊາຊົນແຂວງວຽງຈັນ; ໃຫ້ກຽດເປັນວິທະຍາກອນໃນກອງປະຊຸມຝຶກອົບຮົມ ໂດຍທ່ານ ສຸບັນ ສະວະບຸດ ກໍາມະການຄະນະປະຈໍາ ສະພາແຫ່ງຊາດ, ປະທານກໍາມາທິການວຽກງານສະມາຊິກສະພາແຫ່ງຊາດ ແລະ ທ່ານ ນາງ ຈັນທະຄອນ ສີອໍາພອນ ຮອງປະທານສະພາປະຊາຊົນແຂວງ, ປະທານຄະນະກໍາມະການວັດທະນະທໍາ-ສັງຄົມ ແລະ ບັນດາເຜົ່າ ສພຂ.

ກອງປະຊຸມດັ່ງກ່າວ, ນັກວິທະຍາກອນໄດ້ຂຶ້ນສະເໜີບົດຮຽນກ່ຽວກັບ 4 ຫົວຂໍ້ຫຼັກໆ ຄື: ບົດຮຽນກ່ຽວກັບກົນໄກການປະສານງານ ລະຫວ່າງ ຄະນະກໍາມະການວັດທະນະທໍາ-ສັງຄົມ ແລະ ບັນດາເຜົ່າ ຮ່ວມກັບບັນດາອົງການ, ພະແນກການຂັ້ນແຂວງ; ມະຕິວ່າດ້ວຍການຈັດຕັ້ງ ແລະ ການເຄື່ອນໄຫວວຽກງານ ຂອງຄະນະກໍາມະການວັດທະນະທໍາ-ສັງຄົມ ແລະ ບັນດາເຜົ່າ; ການສ້າງຄໍາຖາມເຈາະຈິ້ມໃນການຕິດຕາມກວດກາ; ການຂຽນບົດລາຍງານຜົນການເຂົ້າຮ່ວມກອງປະຊຸມແຕ່ລະຄັ້ງ. ຈາກນັ້ນ, ບັນດາຜູ້ເຂົ້າຮ່ວມຝຶກອົບຮົມ ໄດ້ຄົ້ນຄ້ວາ, ປະກອບຄໍາເຫັນ ແລະ ສົນທະນາແລກປ່ຽນບົດຮຽນຮ່ວມກັນຢ່າງເລິກເຊິງ, ກົງໄປກົງມາ ຍົກໃຫ້ເຫັນການຈັດຕັ້ງປະຕິບັດຕົວຈິງໃນແຕ່ລະຂົງເຂດ.

ໃນຕອນທ້າຍ, ທ່ານ ລໍາໄມ ກູດລາວົງ ໄດ້ມີຄໍາຄິດເຫັນໂອ້ລົມວ່າ: ການຝຶກອົບຮົມໃນຄັ້ງນີ້ ສະແດງໃຫ້ເຫັນເຖິງຄວາມເປັນເອກະພາບ ແລະ ຄວາມຮັບຜິດຊອບສູງຂອງບັນດາທ່ານນັກສໍາມະນາກອນທຸກໆທ່ານ ທີ່ມີຄວາມເອົາໃຈໃສ່ຄົ້ນຄ້ວາ, ຮັບຟັງການນໍາສະເໜີບົດຮຽນ ຂອງວິຍະຍາກອນໃນແຕ່ລະຫົວຂໍ້, ໃຫ້ການຮ່ວມມືໃນການສົນທະນາ, ປຶກສາຫາລືແລກປ່ຽນຄໍາຄິດຄໍາເຫັນເຊິ່ງກັນ ແລະ ກັນ; ພ້ອມທັງ, ຮຽກຮ້ອງໃຫ້ບັນດານັກສໍາມະນາກອນ ທີ່ເຂົ້າຮ່ວມກອງປະຊຸມຝຶກອົບຮົມ ຈົ່ງນໍາເອົາບົດຮຽນທີ່ໄດ້ຮຽນຮູ້ໃນເທື່ອນີ້ ໄປໝູນໃຊ້ເຂົ້າໃນການປະຕິບັດວຽກງານຕົວຈິງ ຕາມພາລະບົດບາດຂອງຕົນຮັບຜິດຊອບ ໃຫ້ມີປະສິດທິພາບ ແລະ ປະສິດທິຜົນສູງຂຶ້ນກ່ວາເກົ່າ.

ກອງປະຊຸມຝຶກອົບຮົມຄັ້ງນີ້ ໄດ້ຮັບການສະໜັບສະໜູນຊ່ວຍເຫຼືອທາງດ້ານງົບປະມານຈາກໂຄງການສ້າງຄວາມເຂັ້ມແຂງໃຫ້ແກ່ສະພາແຫ່ງຊາດ ແລະ ສະພາປະຊາຊົນຂັ້ນແຂວງ ຫຼື ສະເຕັບສ໌ (STEPs).