ໜ່ວຍພັກຄະນະກໍາມະການເສດຖະກິດ ແຜນການ ແລະ ການເງິນ ສະພາປະຊາຊົນແຂວງ ໄດ້ໄຂກອງປະຊຸມໃຫຍ່ ສະມາຊິກພັກ ຄັ້ງທີ II ຢ່າງເປັນທາງການ ໃນຕອນເຊົ້າວັນທີ 16 ມີນາ 2022 ທີ່ສະພາປະຊາຊົນແຂວງ  ໂດຍເປັນກຽດເຂົ້າຮ່ວມໃນພິທີຂອງ ສະຫາຍ ກົງແກ້ວ ມີວໍລະຈັກ ຮອງເລຂາພັກແຂວງ, ເລຂາຄະນະພັກຮາກຖານ, ປະທານສະພາປະຊາຊົນແຂວງ, ສະຫາຍ ສະແຫວງ  ນັນທະວົງ ເລຂາໜ່ວຍພັກຄະນະກໍາມະການເສດຖະກິດ, ແຜນການ ແລະ ການເງິນ ສພຂ, ນອກຈາກນັ້ນຍັງມີຕາງໜ້າຈາກຄະນະ ຈັດຕັ້ງແຂວງ; ຄະນະກວດກາແຂວງ, ຄະນະພັກຮາກຖານ, ບັນດາໜ່ວຍພັກພາຍໃນ ສພຂ ແລະ ຜູ້ແທນສົມບູນພາຍໃນໜ່ວຍພັກເຂົ້າຮ່ວມຢ່າງພ້ອມພຽງ.

ໃນວາລະປະຊຸມ ສະຫາຍ  ສະແຫວງ  ນັນທະວົງ ເລຂາໜ່ວຍພັກຄະນະກໍາມະການເສດຖະກິດ ແຜນການ ແລະ ການເງິນ ໄດ້ຂຶ້ນກ່າວໄຂກອງປະຊຸມ ພ້ອມທັງຜ່ານບົດລາຍງານການເມືອງ ພາກ I,II,III ເປັນຕົ້ນແມ່ນວຽກງານດ້ານການເມືອງແນວຄິດ, ແບບແຜນການນໍາພາ, ການເຮັດໜ້າທີ່ຊີ້ນໍາ-ນໍາພາການປະຕິບັດໜ້າທີ່ເບື້ອງລັດໃນການຕິດຕາມຊຸກຍູ້ການຈັດຕັ້ງປະຕິບັດລັດຖະທໍາມະນູນ ແລະ ກົດໝາຍ, ການຮັບຄໍາຮ້ອງຂໍຄວາມເປັນທໍາຂອງພົນລະເມືອງ, ຕິດຕາມຊຸກຍູ້ວຽກງານໃນຂົງເຂດ ເສດຖະກິດ ແຜນການ ແລະ ວຽກງານການເງິນ ທີ່ນອນຢູ່ໃນແຜນພັດທະນາເສດຖະກິດມ ສັງຄົມ ຂອງວາລະແຫ່ງຊາດ, ວຽກງານກໍ່ສ້າງພັກ ພະນັກງານ, ຕີລາຄາ ດ້ານດີ, ດ້ານອ່ອນ, ຂໍ້ຄົງຄ້າງ ບົດຮຽນທີ່ຖອດຖອນໄດ້ ໃນການເຄື່ອນໄຫວ ຊີ້ນໍາ-ນໍາພາ ການຈັດຕັ້ງປະຕິບັດໜ້າທີ່ວຽກງານ ໃນໄລຍະຜ່ານມາ.

ພາຍຫຼັງທີ່ໄດ້ຮັບຟັງການຜ່ານເງື່ອນໄຂ ຂອງຜູ້ຈະອອກຮັບສະໝັກຄະນະພັກຊຸດໃໝ່ຈາກຕາງໜ້າຄະນະຈັດຕັ້ງແຂວງແລ້ວ, ບັນດາຜູ້ແທນ ສົມບູນໄດ້ໃຊ້ສິດປະຊາທິປະໄຕ ຂອງຕົນປ່ອນບັດຄັດເລືອກເອົາ ຄະນະໜ່ວຍພັກຊຸດໃໝ່ຂັ້ນຂອງຕົນ, ກອງປະຊຸມໄດ້ເລືອກເອົາ ສະຫາຍ ສະແຫວງ ນັນທະວົງ ເປັນເລຂາໜ່ວຍພັກ ແລະ ສະຫາຍ ນາງ ຫົງຄໍາ ໄຊຍະຄົມ ເປັນຮອງເລຂາ ແລະ ທັງເປັນຜູ້ກວດກາໜ່ວຍພັກ.