ກອງປະຊຸມສຳມະນາ ພາຍໃຕ້ຫົວຂໍ້ ” ຍົກສູງຂີດຄວາມສາມາດໃນການຕິດຕາມກວດກາວຽກງານຍຸຕິທໍາ” ໄດ້ປິດລົງດ້ວຍຜົນສຳເລັດອັນຈົບງາມ ໃນຕອນບ່າຍວັນທີ 09 ກຸມພາ 2023 ນີ້, ພາຍຫຼັງທີ່ດໍາເນີນມາເປັນເວລາ 02 ວັນເຕັມ ໂດຍເລີ່ມແຕ່ຕອນເຊົ້າຂອງວັນທີ 08 ກຸມພາ 2023 ຜ່ານມານີ້ ທີ່ສະໂມສອນ ສະພາປະຊາຊົນແຂວງ ເຊກອງ.ກອງປະຊຸມຈັດຂຶ້ນໂດຍ ກໍາມາທິການຍຸຕິທໍາ ສະພາແຫ່ງຊາດ ໂດຍການເປັນປະທານ ຂອງ ທ່ານ ຄໍາແພງ ວິລະພັນ ກໍາມະການຄະນະປະຈໍາ ສະພາແຫ່ງຊາດ, ປະທານກໍາມາທິການຍຸຕິທໍາ ສະພາແຫ່ງຊາດ, ມີບັນດາທ່ານສະມາຊິກສະພາແຫ່ງຊາດທີ່ເປັນກໍາມະການສັງກັດກໍາມາທິການຍຸຕິທໍາ ສະພາແຫ່ງຊາດ, ປະທານ-ຮອງປະທານກໍາມະການຍຸຕິທໍາ ແລະ ປກຊ-ປກສ, ຜູ້ປະສານງານຂອງໂຄງການ ພ້ອມດ້ວຍວິຊາການທີ່ກ່ຽວຂ້ອງຈາກສະພາປະຊາຊົນ 07 ແຂວງເຂົ້າຮ່ວມ ໃນນັ້ນມີ: ແຂວງ ບໍລິຄໍາໄຊ, ຄໍາມ່ວນ, ສະຫວັນນະເຂດ, ຈໍາປາສັກ, ສາລະວັນ, ເຊກອງ ແລະ ອັດຕະປື.
ເຊິ່ງວາລະດໍາເນີນກອງປະຊຸມ ໄດ້ຮັບຟັງການນໍາສະເໜີລາຍງານກ່ຽວກັບບັນດາເນື້ອໃນທີ່ສໍາຄັນຕ່າງໆໃນຂົງເຂດຍຸຕິທໍາເປັນຕົ້ນ: ບົດສະເໜີ ກ່ຽວກັບພາລະບົດບາດການຕິດຕາມກວດກາຂອງກໍາມາທິການຍຸຕິທໍາ ສະພາແຫ່ງຊາດ; ບົດສະເໜີການແຕ່ງຕັ້ງ, ຍົກຍ້າຍ ຫຼື ປົດຕໍາແໜ່ງບຸກຄະລາກອນ ຂອງສານປະຊາຊົນ ແລະ ແລກປ່ຽນບົດຮຽນການຕິດຕາມກວດກາໂດຍຜ່ານຄໍາຮ້ອງຂໍຄວາມເປັນທໍາ ໂດຍມີການຄົ້ນຄວ້າປຶກສາຫາລື ແລະ ແລກປ່ຽນບົດຮຽນ ເຊິ່ງກັນ ແລະ ກັນຕໍ່ບັນດາເນື້ອໃນດັ່ງກ່າວ ຢ່າງມີຈຸດສຸມ, ມີເຫດ, ມີຜົນ ແລະ ມີເນື້ອໃນທີ່ເລິກເຊິ່ງ. ພ້ອມທັງ, ຍົກໃຫ້ເຫັນການຈັດຕັ້ງປະຕິບັດຕົວຈິງຂອງແຕ່ລະທ້ອງຖິ່ນ ເພື່ອຊອກຫາວິທີການ ແລະ ມາດຕະການແກ້ໄຂໃຫ້ເປັນເອກະພາບກັນ ເຮັດໃຫ້ບັນດາເນື້ອໃນດັ່ງກ່າວນັ້ນສາມາດຮັບຮອງໄດ້ ແລະ ນໍາໄປຈັດຕັ້ງຜັນຂະຫຍາຍໃນການປະຕິບັດໜ້າທີ່ວຽກງານ ຕໍ່ໜ້າໃຫ້ມີຜົນສໍາເລັດຫຼາຍຂຶ້ນກວ່າເກົ່າ.
ໂອກາດດັ່ງກ່າວ, ທ່ານ ຄໍາແພງ ວິລະພັນ ກໍາມະການຄະນະປະຈໍາ ສະພາແຫ່ງຊາດ, ປະທານກໍາມາທິການຍຸຕິທໍາ ສະພາແຫ່ງຊາດ ໄດ້ສະແດງຄວາມຊົມເຊີຍ ແລະ ຂອບໃຈບັນດາຜູ້ແທນກອງປະຊຸມ ທັງສູນກາງ ແລະ ທ້ອງຖິ່ນ ທີ່ໄດ້ພ້ອມກັນຄົ້ນຄວ້າ, ສົນທະນາແລກປ່ຽນບົດຮຽນເຊິ່ງກັນ ແລະ ກັນຢ່າງກົງໄປກົງມາ ເຊິ່ງເປັນຂໍ້ມູນທີ່ສໍາຄັນເພື່ອທີ່ຈໍານໍາໄປປັບປຸງເພີ່ມເຕີ່ມຕໍ່ບົດສະເໜີດັ່ງກ່າວໃຫ້ມີຄວາມຄົບຖ້ວນສົມບູນ ແລະ ເປັນບ່ອນອີງທີ່ສໍາຄັນໃຫ້ແກ່ການຈັດຕັ້ງປະຕິບັດວຽກງານໃນຂົງເຂດຍຸຕິທໍາຢູ່ຂັ້ນສູນກາງ ແລະ ທ້ອງຖິ່ນ ເຮັດໃຫ້ວຽກງານດັ່ງກ່າວໄດ້ຮັບການແກ້ໄຂ ແລະ ມີຜົນສໍາເລັດຫຼາຍຂຶ້ນ. ພ້ອມນັ້ນ, ຍັງໄດ້ຮຽກຮ້ອງຕໍ່ບັນດາຜູ້ແທນກອງປະຊຸມໃຫ້ເອົາໃຈໃສ່ຢ່າງສູງຕໍ່ການຈັດຕັ້ງປະຕິບັດວຽກງານດ້ວຍຄວາມເປັນເຈົ້າການ, ມີການປະສານສົມທົບລະຫວ່າງສູນກາງ ແລະ ທ້ອງຖິ່ນໃຫ້ມີຄວາມກົມກຽວ-ເຊື່ອມຈອດ, ແລກປ່ຽນຖອດຖອນບົດຮຽນເຊິ່ງກັນ ແລະ ກັນຢ່າງເປັນປົກກະຕິຕໍ່ເນື່ອງ, ເອົາໃຈໃສ່ປະຕິບັດພາລະບົດບາດໃນການຕິດຕາມກວດກາຢ່າງແຂງແຮງ ໂດຍສະເພາະຕິດຕາມກວດກາການປະຕິບັດວາລະແຫ່ງຊາດວ່າດ້ວຍການແກ້ໄຂບັນຫາຢາເສບຕິດ ແລະ ຕິດຕາມກວດກາການປະຕິບັດວຽກງານຂະບວນການຍຸຕິທໍາຢູ່ຂັ້ນທ້ອງຖິ່ນຢ່າງເປັນປົກກະຕິຕໍ່ເນື່ອງ.
#ໂດຍ: ນາລີວັນ.