ກອງປະຊຸມສະໄໝສາມັນເທື່ອທີ 3 ຂອງສະພາປະຊາຊົນແຂວງໄຊຍະບູລີ ຊຸດທີ II ໄດ້ສໍາເລັດຢ່າງເປັນທາງການໃນຕອນແລງຂອງວັນທີ 12 ສິງຫາ 2022 ນີ້ ທີ່ຫໍປະຊຸມໃຫຍ່ຂອງແຂວງໄຊຍະບູລີ ພາຍຫຼັງທີ່ໄດ້ດໍາເນີນມາເປັນເວລາ 4 ວັນ ໂດຍການເປັນປະທານ ຂອງທ່ານ ເພັງນິລັນ ຄໍາພັນເພັງ ຮອງເລຂາພັກແຂວງ ປະທານສະພາປະຊາຊົນແຂວງ. ໃຫ້ກຽດເຂົ້າຮ່ວມກອງປະຊຸມຄັ້ງນີ້ ມີ ທ່ານ ພົງສະຫວັນ ສິດທະວົງ ກໍາມະການສູນກາງພັກເລຂາພັກແຂວງເຈົ້າແຂວງໄຊຍະບູລີ, ມີບັນດາທ່ານຄະນະປະຈໍາພັກແຂວງ ກໍາມະການພັກແຂວງ ຄະນະປະຈໍາສະພາປະຊາຊົນແຂວງ ສະມາຊິກສະພາແຫ່ງຊາດປະຈໍາເຂດເລືອກຕັ້ງທີ 7 ອະດິດການນໍາຂອງແຂວງ, ອະດິດສະມາຊິກສະພາແຫ່ງຊາດ, ສະມາຊິກສະພາປະຊາຊົນແຂວງ ນົກປະຕິວັດອາວຸໂສບໍານານ, ຜູ້ຊົງຄຸນວຸດທິ ຕ່າງໜ້າອົງການຈັດຕັ້ງພັກ-ລັດ ອົງການຈັດຕັ້ງແນວລາວສ້າງຊາດ ສະຫະພັນນັກຮົບເກົ່າ ອົງການຈັດຕັ້ງມະຫາຊົນ ນາຍບ້ານເທດສະບານ, ນັກທຸລະກິດ ແລະ ຜູ້ປະກອບການເຂົ້າຮ່ວມ.
ກອງປະຊຸມສະໄຫມສາມັນ ເທື່ອທີ 3 ຂອງສະພາປະຊາຊົນແຂວງ ຊຸດທີ II ໄດ້ພິຈາລະນາ, ຮັບຮອງເອົາບັນຫາສໍາຄັນ ດັ່ງນີ້:
ໄດ້ຮັບຟັງການລາຍງານໂດຍສັງເຂບ ຂອງທ່ານເຈົ້າແຂວງ ກ່ຽວກັບສະພາບທີ່ພົ້ນເດັ່ນໃນການຈັດຕັ້ງປະຕິບັດ ແຜນພັດທະນາເສດຖະກິດ-ສັງຄົມ, ແຜນງົບປະມານແຫ່ງລັດຂອງແຂວງ ປະຈໍາ 6 ເດືອນຕົ້ນປີ 2022 ແລະ ທິດທາງແຜນການ ປະຈໍາ 6 ເດືອນທ້າຍປີ 2022. ເຊິ່ງໄດ້ຕີລາຄາສູງ ຕໍ່ຄວາມພະຍາຍາມຂອງອົງການປົກຄອງແຂວງ ໃນການສູ້ຊົນເຮັດໃຫ້ອັດຕາການເຕີບໂຕຂອງດ້ານເສດຖະກິດ ບັນລຸ 4,8%, ຮັກສາໄດ້ສະຖຽນລະພາບທາງດ້ານການເມືອງ, ສັງຄົມມີຄວາມສະຫງົບໂດຍພື້ນຖານ ແລະ ສາມາດປະຄັບປະຄອງເສດຖະກິດ ບໍ່ໃຫ້ເຂົ້າສູ່ພາວະວິກິດທີ່ໜັກໜ່ວງ. ກອງປະຊຸມ ສະເໜີໃຫ້ອົງການປົກຄອງແຂວງ ນໍາເອົາຄວາມຄິດເຫັນ ຂອງກອງປະຊຸມໄປພິຈາລະນາ ເພື່ອສືບຕໍ່ປັບປຸງ, ແກ້ໄຂບັນດາບັນຫາທີ່ຫຍຸ້ງຍາກຕ່າງໆ ໃຫ້ກັບສູ່ສະພາບປົກກະຕິ.
ກອງປະຊຸມ ຮັບຟັງການລາຍງານ ຂອງຕາງໜ້າອົງການປົກຄອງແຂວງ, ໂດຍພະແນກແຜນການ ແລະ ການລົງທຶນແຂວງ ກ່ຽວກັບຄວາມຄືບໜ້າ ໃນການຈັດຕັ້ງປະຕິບັດວາລະແຫ່ງຊາດ ວ່າດ້ວຍການແກ້ໄຂຄວາມຫຍຸ້ງຍາກ ທາງດ້ານເສດຖະກິດ-ການເງິນ. ຕະຫຼອດໄລຍະ 6 ເດືອນຜ່ານມາ ອົງການປົກຄອງແຂວງ ໄດ້ຊີ້ນໍາ-ບັນຊາການຈັດຕັ້ງຜັນຂະຫຍາຍ ມະຕິຂອງກົມການເມືອງສູນກາງພັກ, ລັດຖະບານ ມາເປັນນິຕິກໍາລະອຽດຂອງຕົນ ເພື່ອເປັນບ່ອນອີງໃນການຈັດຕັ້ງປະຕິບັດ ເຊິ່ງໄດ້ຮັບຜົນສໍາເລັດໃນຫຼາຍດ້ານ. ແຕ່ຄຽງຄູ່ກັນນັ້ນ, ກອງປະຊຸມ ສະເໜີໃຫ້ອົງການປົກຄອງແຂວງ ເພີ່ມທະວີການໂຄສະນາເຜີຍແຜ່, ປຸກລະດົມ ໃຫ້ພໍ່ແມ່ປະຊາຊົນບັນດາເຜ່ົາ ໃຫ້ມີຄວາມຮັບຮູ້ເຂົ້າໃຈ, ເຫັນໄດ້ຄວາມຈໍາເປັນ ແລະ ເປັນເຈົ້າການເຂົ້າຮ່ວມຢ່າງຕັ້ງໜ້າ ເພື່ອສູ້ຊົນຜ່ານຜ່າ ຄວາມຫຍຸ້ງຍາກ ທາງດ້ານເສດຖະກິດ-ການເງິນ ໃຫ້ບັນລຸຕາມຄາດໝາຍວາງໄວ້.
ກອງປະຊຸມໄດ້ພິຈາລະນາ ແລະ ຮັບຮອງບົດລາຍງານ ຂອງພະແນກແຜນການ ແລະ ການລົງທຶນແຂວງ ກ່ຽວກັບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ຂອງແຂວງ 6 ເດືອນຕົ້ນປີ 2022 ແລະ ແຜນການ 6 ເດືອນທ້າຍປີ 2022. ໂດຍໄດ້ຕີລາຄາສູງຕໍ່ຄວາມພະຍາຍາມຊີ້ນໍາ-ນໍາພາ ຂອງອົງການປົກຄອງແຂວງ ແລະ ບັນດາພະແນກການ, ອົງການທີ່ກ່ຽວຂ້ອງ ທີ່ໄດ້ຜ່ານຜ່າຄວາມຫຍຸ້ງຍາກ, ສິ່ງທ້າທາຍຫຼາຍດ້ານ, ສູ້ຊົນຈັດຕັ້ງປະຕິບັດມະຕິກອງປະຊຸມສະພາແຫ່ງຊາດ ກໍຄື ມະຕິກອງປະຊຸມສະພາປະຊາຊົນແຂວງ ຕາມຂອບເຂດສິດ ແລະ ພາລະບົດບາດຂອງຕົນ. ກອງປະຊຸມ ມອບໃຫ້ອົງການປົກຄອງແຂວງ ສືບຕໍ່ນໍາເອົາຄວາມຄິດເຫັນ ຂອງຜູ້ແທນກອງປະຊຸມ ໄປປັບປຸງເຂົ້າໃນແຜນພັດທະນາເສດຖະກິດ-ສັງຄົມ ໃຫ້ຮັດກຸມ, ຄົບຖ້ວນ ແລະ ສາມາດຈັດຕັ້ງປະຕິບັດໄດ້ ຕາມແຜນການທີ່ວາງໄວ້.
ພິຈາລະນາ ແລະ ຮັບຮອງເອົາບົດລາຍງານ ຂອງພະແນກການເງິນແຂວງ ກ່ຽວກັບການຈັດຕັ້ງປະຕິບັດ ແຜນງົບປະມານແຫ່ງລັດ ຂອງແຂວງ 6 ເດືອນຕົ້ນປີ 2022 ແລະ ແຜນການ 6 ເດືອນທ້າຍປີ 2022. ໂດຍອີງໃສ່ສະພາບຄວາມຫຍຸ້ງຍາກ ທາງດ້ານເສດຖະກິດ-ການເງິນ ເຊິ່ງໄດ້ສົ່ງຜົນເຮັດໃຫ້ການປະຕິບັດແຜນງົບປະມານແຫ່ງລັດຂອງແຂວງ ພົບຄວາມຫຍຸ້ງຍາກ. ກອງປະຊຸມ ສະເໜີໃຫ້ອົງການປົກຄອງແຂວງ ສືບຕໍ່ສູ້ຊົນຈັດຕັ້ງປະຕິບັດແຜນງົບປະມານ ໃຫ້ບັນລຸຕາມຄາດໝາຍ ແລະ ລື່ນຄາດໝາຍທີ່ວາງໄວ້ ໂດຍຕິດພັນກັບ ຖານລາຍຮັບໃໝ່ ທ່າແຮງບົ່ມຊ້ອນ.
ຮັບຟັງການລາຍງານ ຂອງກອງບັນຊາການປ້ອງກັນຄວາມສະຫງົບແຂວງ ກ່ຽວກັບຄວາມຄືບໜ້າໃນການຈັດຕັ້ງປະຕິບັດວາລະແຫ່ງຊາດ ວ່າດ້ວຍການແກ້ໄຂບັນຫາຢາເສບຕິດ. ກອງປະຊຸມ ສະເໜີໃຫ້ອົງການປົກຄອງແຂວງ ກໍຄືພາກສ່ວນກ່ຽວຂ້ອງ ສືບຕໍ່ເພີ່ມທະວີການໂຄສະນາເຜີຍແຜ່ ປຸກລະດົມປະຊາຊົນບັນດາເຜ່ົາ ເຂົ້າຮ່ວມຢ່າງຕັ້ງໜ້າ ເພື່ອເຮັດໃຫ້ວາລະແຫ່ງຊາດກ່ຽວກັບການແກ້ໄຂບັນຫາຢາເສບຕິດ ໄດ້ຮັບການຈັດຕັ້ງປະຕິບັດເປັນຮູບປະທໍາດີຂຶ້ນ.
ຮັບຟັງລາຍງານ ຂອງອົງການໄອຍະການປະຊາຊົນແຂວງ ກ່ຽວກັບການຈັດຕັ້ງຜັນຂະຫຍາຍວາລະແຫ່ງຊາດ ວ່າດ້ວຍການແກ້ໄຂບັນຫາຢາເສບຕິດ ຕິດພັນກັບການຕິດຕາມກວດກາການປະຕິບັດ 7 ມາດຕະການສະກັດກັ້ນ ຂອງອົງການສືບສວນ-ສອບສວນ ຕາມທີ່ກໍານົດໄວ້ໃນ ມາດຕາ 136 ຂອງກົດໝາຍວ່າດ້ວຍການດໍາເນີນຄະດີອາຍາ ໂດຍສະເພາະການແກ້ໄຂການລະເມີດກົດໝາຍ ໃນການພາຕົວ, ກັກຕົວ, ຈັບຕົວ ແລະ ການກັກຂັງພາງ ທີ່ບໍ່ຖືກຕ້ອງຕາມກົດໝາຍ. ກອງປະຊຸມໄດ້ຕີລາຄາສູງ ທີ່ອົງການໄອຍະການ ໄດ້ເອົາໃຈໃສ່ປະຕິບັດພາລະບົດບາດຂອງຕົນ ດ້ວຍຄວາມຮັບຜິດຊອບສູງ, ໄດ້ຍົກສູງຄຸນນະພາບ ໃນການດໍາເນີນຄະດີຕາມຂະບວນຍຸຕິທໍາ ນັບມື້ດີຂຶ້ນ. ພ້ອມດຽວກັນນີ້, ກອງປະຊຸມ ກໍສະເໜີໃຫ້ອົງການກ່ຽວຂ້ອງ ສືບຕໍ່ກໍານົດຫັນເປັນໂຄງການ ແລະ ກິດຈະກໍາລະອຽດ ເພື່ອຈັດຕັ້ງປະຕິບັດໃຫ້ໄດ້ຮັບຜົນດີ.
ກອງປະຊຸມໄດ້ພິຈາລະນາ ແລະ ຮັບຮອງເອົາບົດລາຍງານ ຂອງພະແນກສຶກສາທິການ ແລະ ກິລາແຂວງ ກ່ຽວກັບການຈັດຕັ້ງປະຕິບັດບັນດາຄາດໝາຍ ໃນຂົງເຂດສຶກສາທິການ ແລະ ກິລາ ເປັນຕົ້ນ ການປັບປຸງຄຸນນະພາບ ລະບົບການຮຽນ-ການສອນທຸກຊັ້ນທຸກສາຍ ໃນໄລຍະໃໝ່ ແລະ ການຄຸ້ມຄອງວຽກງານກິລາ-ກາຍະກຳ.
ພິຈາລະນາ ແລະ ຮັບຮອງເອົາບົດລາຍງານ ຂອງພະແນກຖະແຫຼງຂ່າວ, ວັດທະນະທໍາ ແລະ ທ່ອງທ່ຽວແຂວງ ກ່ຽວກັບການຈັດຕັ້ງປະຕິບັດແຜນການທ່ອງທ່ຽວສີຂຽວ ຕິດພັນກັບການປ້ອງກັນ ແລະ ຮັບມືການແຜ່ລະບາດພະຍາດໂຄວິດ 19.
ກອງປະຊຸມ ໄດ້ພິຈາລະນາ ແລະ ຮັບຮອງເອົາບົດລາຍງານ ຂອງຄະນະປະຈຳສະພາປະຊາຊົນແຂວງ ກ່ຽວກັບການເຄື່ອນໄຫວວຽກງານໄລຍະ ກອງປະຊຸມສະໄໝສາມັນ ເທື່ອທີ 2 ຫາ ກອງປະຊຸມສະໄໝສາມັນ ເທື່ອທີ 3 ຂອງສະພາປະຊາຊົນແຂວງ ແລະ ແຜນການຮອດກອງປະຊຸມສະໄໝສາມັນ ເທື່ອທີ 4 ຂອງສະພາປະຊາຊົນແຂວງ ຊຸດທີ II.
ກອງປະຊຸມ ໄດ້ພິຈາລະນາ ແລະ ຮັບຮອງເອົາ ຮ່າງນິຕິກໍາໃຕ້ກົດໝາຍໃໝ່ 1 ສະບັບ ແລະ ປັບປຸງ (ໃໝ່) 2 ສະບັບ ເປັນຕົ້ນ: (1)ຂໍ້ຕົກລົງ ຂອງເຈົ້າແຂວງ ວ່າດ້ວຍກອງທຶນເລືອດ; (2)ຂໍ້ຕົກລົງ ຂອງເຈົ້າແຂວງ ວ່າດ້ວຍການຄຸ້ມຄອງພັດທະນາ ແລະ ບໍລິຫານຕົວເມືອງໄຊຍະບູລີ; (3)ຂໍ້ຕົກລົງ ຂອງເຈົ້າແຂວງ ວ່າດ້ວຍການສ້າງຕັ້ງກອງທຶນຄວບຄຸມ ສະກັດກັ້ນ ແລະ ຕ້ານຢາເສບຕິດ.
ກອງປະຊຸມຄັ້ງນີ້ ຍັງໄດ້ຮັບຟັງການປະກອບຄໍາເຫັນ ຈາກຜູ້ຕາງໜ້າ ຄະນະປະຈໍາສະພາປະຊາຊົນແຂວງ ຕໍ່ບັນດາບົດລາຍງານ ທີ່ອົງການປົກຄອງແຂວງ ກໍຄືພະແນກການ, ອົງການ, ກົມກອງ ທີ່ໄດ້ຜ່ານຕໍ່ກອງປະຊຸມ ດ້ວຍຄວາມຮັບຜິດຊອບສູງ ແລະ ໃຫ້ການຕີລາຄາຢ່າງພາວະວິໄສ, ກົງໄປ, ກົງມາ ຕໍ່ແຕ່ລະບັນຫາ ທີ່ອົງການປົກຄອງ ໄດ້ນໍາມາສະເໜີ. ພ້ອມດຽວກັນນີ້ ຍັງໄດ້ຮັບຟັງການປະກອບຄໍາຄິດຄໍາເຫັນຈາກ ສະມາຊິກສະພາແຫ່ງຊາດ ປະຈໍາເຂດເລືອກຕັ້ງທີ 7 ເຊິ່ງເປັນເນື້ອໃນທີ່ມີຄວາມໝາຍຄວາມສໍາຄັນ ສ່ອງແສງເຖິງຄວາມຮັບຜິດຊອບ ຈາກຄະນະສະມາຊິກສະພາແຫ່ງຊາດ ປະຈໍາເຂດເລືອກຕັ້ງ ມາສູ່ກອງປະຊຸມໃນຄັ້ງນີ້. ພິເສດ ກອງປະຊຸມຂອງພວກເຮົາ ຍັງໄດ້ຮັບຟັງການຊີ້ແຈງເພີ່ມເຕີມ ຈາກທ່ານເຈົ້າແຂວງ ເຊິ່ງໄດ້ໃຫ້ຄວາມກະຈ່າງແຈ້ງ ຕໍ່ບັນຫາທີ່ສັງຄົມໃຫ້ຄວາມສົນໃຈ ແລະ ໄດ້ຕີລາຄາຢ່າງພາວະວິໄສ, ຖືກຕ້ອງສອດຄ່ອງ ກັບ ສະພາບຄວາມຈິງຂອງແຂວງພວກເຮົາ.
ກອງປະຊຸມ ມີຄວາມເຊື່ອໝັ້ນວ່າ ອົງການຈັດຕັ້ງພັກ-ລັດ, ຄະນະສະມາຊິກສະພາທຸກຂັ້ນ ຈະເສີມຂະຫຍາຍຜົນສໍາເລັດ ທີ່ຍາດມາໄດ້ໃນ 6 ເດືອນຜ່ານມາ, ສືບຕໍ່ສູ້ຊົນແກ້ໄຂ ຄວາມຫຍຸ້ງຍາກຕ່າງໆ, ຍູ້ແຮງຂະບວນການແຂ່ງຂັນຮັກຊາດພັດທະນາ ເພື່ອສ້າງໃຫ້ມີການຫັນປ່ຽນທີ່ດີຂຶ້ນ ຢ່າງແຂງແຮງ, ສືບຕໍ່ຕັ້ງໜ້າຜັນຂະຫຍາຍ ມະຕິກອງປະຊຸມໃຫຍ່ ຄັ້ງທີ XI ຂອງພັກ, ມະຕິກອງປະຊຸມໃຫຍ່ ຄັ້ງທີ VII ຂອງອົງຄະນະພັກແຂວງ, ແຜນພັດທະນາເສດຖະກິດ-ສັງຄົມແຫ່ງຊາດ, ແຜນພັດທະນາເສດຖະກິດ-ສັງຄົມຂອງແຂວງ ແລະ ວາລະແຫ່ງຊາດ ໃຫ້ເປັນຮູບປະທໍາຍິ່ງຂຶ້ນ.
ຜົນສໍາເລັດ ຂອງກອງປະຊຸມໃນຄັ້ງນີ້ ໄດ້ກາຍເປັນຂີດໝາຍສໍາຄັນແຫ່ງການເສີມຂະຫຍາຍສິດ, ປະຊາທິປະໄຕ, ແມ່ນໝາກຜົນລວມຍອດແຫ່ງສະຕິປັນຍາ, ຄວາມເປັນເຈົ້າການ, ການຍົກສູງຄວາມຮັບຜິດຊອບທາງການເມືອງ ຂອງບັນດາທ່ານສະມາຊິກສະພາປະຊາຊົນແຂວງ, ຄວາມຕັດສິນໃຈເຂົ້າຮວມ ຂອງອົງການປົກຄອງແຂວງ, ພະແນກການ, ອົງການທີ່ກ່ຽວຂ້ອງ ຈຶ່ງໄດ້ເຮັດໃຫ້ກອງປະຊຸມຄັ້ງນີ້ ບັນລຸຜົນສໍາເລັດຕາມລະດັບຄາດໝາຍທີ່ວາງໄວ້.
ເພື່ອສືບຕໍ່ຈັດຕັ້ງຜັນຂະຫຍາຍຜົນສໍາເລັດ ຂອງກອງປະຊຸມຄັ້ງນີ້, ກອງປະຊຸມ ຮຽກຮ້ອງມາຍັງຄະນະປະຈໍາສະພາປະຊາຊົນແຂວງ, ບັນດາກໍາມະການກ່ຽວຂ້ອງ, ຄະນະສະມາຊິກສະພາປະຊາຊົນແຂວງ ປະຈໍາເຂດເລືອກຕັ້ງເມືອງ ແລະ ອົງການປົກຄອງແຂວງ, ອົງການປົກຄອງເມືອງ, ທຸກພາກສ່ວນ ທີ່ກ່ຽວຂ້ອງ ຈົ່ງຍົກສູງຄວາມຮັບຜິດຊອບ ໃນການຈັດຕັ້ງຜັນຂະຫຍາຍມະຕິກອງປະຊຸມຄັ້ງນີ້ ໃຫ້ບັນລຸຜົນສໍາເລັດເປັນຢ່າງດີ.

ໂດຍ:ອິນທີ ຂຽວສີຟ້າ