(ສພຊ) – ຄະນະຜູ້ແທນສະພາແຫ່ງຊາດລາວ ນໍາໂດຍທ່ານ ສຈ. ປອ. ດຣ. ມາຍຟອງ ມາຍຊາຍ ສະມາຊິກສະພາແຫ່ງຊາດປະຈຳເຂດເລືອກຕັ້ງທີ 12 ແຂວງຄໍາມ່ວນ, ອະທິການບໍດີມະຫາວິທະຍາໄລວິທະຍາສາດສຸຂະພາບ ພ້ອມດ້ວຍວິຊາການ 1 ທ່ານ ໄດ້ສໍາເລັດການເຂົ້າຮ່ວມກອງປະຊຸມສໍາມະນາລະດັບພາກພື້ນກ່ຽວກັບ “ການປ່ຽນແປງທາງດ້ານປະຊາກອນ ແລະ ພະຍາດທີ່ບໍ່ຕິດຕໍ່: ການແກ້ໄຂສິ່ງທ້າທາຍສຳລັບປະຊາກອນ ແລະ ໄວໜຸ່ມ” ທີ່ສະພາແຫ່ງຊາດ ແຫ່ງ ລາຊະອານາຈັກກຳປູເຈຍ ໄດ້ຈັດຂຶ້ນໃນວັນທີ 31 ມີນາ 2025 ທີ່ນະຄອນຫຼວງພະນົມເປັນ ເຊິ່ງມີຕົວແທນຈາກບັນດາປະເທດສະມາຊິກລັດຖະສະພາໃນພາກພື້ນອາຊຽນ ເຂົ້າຮ່ວມ.
ກອງປະຊຸມສຳມະນາຄັ້ງນີ້ ຈັດຂຶ້ນພາຍໃຕ້ການຮ່ວມມືຂອງສະພາແຫ່ງຊາດກຳປູເຈຍ, ສູນລັດຖະສະພາອາຊີ (PCAsia) ແລະ ເວທີປຶກສາຫາລືຂອງສະມາຊິກລັດຖະສະພາອາຊີ ກ່ຽວກັບປະຊາກອນ ແລະ ການພັດທະນາ (AFPPD) ເຊິ່ງໄດ້ແລກປ່ຽນປະສົບການ ແລະ ການຈັດຕັ້ງປະຕິບັດທີ່ດີ ໃນການແກ້ໄຂບັນຫາພະຍາດທີ່ບໍ່ຕິດຕໍ່ ທັງເປັນການປຶກສາຫາລືກ່ຽວກັບການວາງນະໂຍບາຍເພື່ອຮັບມືກັບບັນຫາດັ່ງກ່າວ. ໃນລະຫວ່າງການແລກປ່ຽນຄຳຄິດເຫັນ ແລະ ບົດຮຽນ, ທ່ານ ສຈ. ປອ. ດຣ. ມາຍຟອງ ມາຍຊາຍ ໄດ້ນໍາສະເໜີປະສົບປະການຂອງສະພາແຫ່ງຊາດລາວໃນເລື່ອງດັ່ງກ່າວ ພ້ອມທັງມີຄຳເຫັນແລກປ່ຽນ ແລະ ຕອບຄຳຊັກຖາມຈາກສະມາຊິກລັດຖະສະພາອາຊີ ໂດຍສະເພາະແມ່ນບັນຫາພະຍາດທີ່ບໍ່ຕິດຕໍ່ຢູ່ ສປປລາວ ໃນລັກສະນະສ້າງສັນ ແລະ ກົງໄປກົງມາ.
ກອງປະຊຸມຄັ້ງນີ້ ໄດ້ປິດລົງດ້ວຍຜົນສໍາເລັດຢ່າງຈົບງາມ ເຊິ່ງໄດ້ເຮັດໃຫ້ຄະນະຜູ້ແທນສະມາຊິກລັດຖະສະພາພາກພື້ນອາຊີ ໄດ້ຮັບຮູ້ ແລະ ເຂົ້າໃຈກ່ຽວກັບພະຍາດດັ່ງກ່າວຫຼາຍຂຶ້ນ ແລະ ນຳໄປເຜີຍແຜ່ໃຫ້ກວ້າງຂວາງກວ່າເກົ່າ.