(ສພຊ) ໃນຕອນເຊົ້າຂອງວັນທີ 23 ກຸມພາ 2022, ທີ່ຫ້ອງສະໝຸດຂອງສະພາແຫ່ງຊາດ ໄດ້ພິທີມອບ-ຮັບປື້ມການຮ່ວມມື ຈາກສໍານັກພິມ ແລະ ຈໍາໜ່າຍປື້ມແຫ່ງລັດ ກະຊວງຖະແຫລ່ງຂ່າວ, ວັດທະນະທໍາ ແລະ ທ່ອງທ່ຽວ (ຖວທ) ໃຫ້ສະພາແຫ່ງຊາດ ໂດຍຕາງໜ້າມອບໂດຍທ່ານ ໄຊຍະພອນ ອານຸລາດ ຮອງອໍານວຍການສໍານັກພິມ ແລະ ຈໍາໜ່ວຍປື້ມແຫ່ງລັດ (ກະຊວງ ຖວທ) ແລະ ຕາງໜ້າຮັບໂດຍທ່ານ ບຸນເລີດ ລ້ວນດວງຈັນ ຫົວໜ້າກົມສື່ມວນຊົນ ສະພາແຫ່ງຊາດ.
ປື້ມທີ່ນຳມາມອບໃນຄັ້ງນີ້, ແມ່ນການຮ່ວມມືສອງຝ່າຍທີ່ມີຄຸນຄ່າສູງ ເພື່ອສົ່ງເສີມ ແລະ ປະກອບສ່ວນເຂົ້າໃນການຄົ້ນຄວ້າຂອງແຕ່ລະພາກສ່ວນ ແລະ ສະຖາບັນຕ່າງໆ ມີຈໍານວນ 5 ຊຸດ (75 ຫົວ) ເຊິ່ງແຕ່ລະຊຸດມີ 15 ຫົວເລື່ອງຄື: ອາຊຽນໃນຍຸດທະສາດປະເທດໃໝ່; ຊາຍແດນມິດຕະພາບແບບພິເສດຫວຽດນາມ-ລາວ, ການປະຕິວັດອຸດສະຫະກຳ 4.0 ບັນຫາທີ່ຕັ້ງຂຶ້ນສໍາລັບການພັດທະນາເສດຖະກິດ-ສັງຄົມ ແລະ ການເຊື່ອມໂຍງກັບສາກົນຂອງຫວຽດນາມ; ພາລະບົດບາດດ້ານເສດຖະກິດໃນ 30 ກວ່າປີທີ່ໄດ້ປ່ຽນແປງໃໝ່ ແລະ ວິໄສທັດດ້ານນິຕິກຳ; ຫລັກສູດແນວຄິດ ໂຮ່ຈິມິນ.
​ຈາກນັ້ນ, ກົມສື່ມວນຊົນ ໄດ້ມອບຕໍ່ໃຫ້ຫ້ອງສະໝຸດ ສະພາແຫ່ງຊາດ ເປັນຜູ້ຄຸ້ມຄອງ ແລະ ປົກປັກຮັກສາ ເພື່ອໃຫ້ຜູ້ທີ່ຕ້ອງການອ່ານ ແລະ ຄົ້ນຄວ້າຊອກຫາຂໍ້ມູນສາມາດເຂົ້າເຖິງໄດ້.
(ພາບ ແລະ ຂ່າວ: ນາງ ນິດຕາ ຄຸນປາກດີ)