ຜ່ານການດໍາເນີນກອງປະຊຸມເປັນເວລາ 3 ວັນ, ວິທະຍາກອນໄດ້ຖ່າຍທອດບົດຮຽນ ແລະ ປະສົບການ ຕົວຈິງຕ່າງໆ ໃຫ້ແກ່ສໍາມະນາກອນ ເປັນຕົ້ນແມ່ນການສະເໜີບົດຮຽນກ່ຽວກັບການຮ່າງແຜນການຕິດຕາມກວດ ກາປົກກະຕິ, ຫົວຂໍ້ສະເພາະ ແລະ ບັນຫາພົ້ນເດັ່ນເຄັ່ງຮ້ອນ; ການກະກຽມບົດຄໍາເຫັນໃຫ້ແກ່ການນໍາ ແລະ ການສັງ ລວມບົດຄໍາເຫັນໃຫ້ແກ່ປະທານກອງປະຊຸມ; ການປະກອບຄໍາເຫັນຕໍ່ແຜນພັດທະນາເສດຖະກິດ-ສັງຄົມແຫ່ງຊາດ ແລະ ຂອງແຂວງ; ການຮ່າງແຈ້ງການເຊີນ ແລະ ຄໍາແນະນໍາ; ການຮ່າງຄໍາຊັກຖາມ ແລະ ຄໍາຖາມເຈາະຈີ້ມ; ການ ຮ່າງບົດສະຫຼຸບປະຈໍາເດືອນ, ບົດບັນທຶກກອງປະຊຸມ ແລະ ບົດລາຍງານຜົນສໍາເລັດຂອງກອງປະຊຸມ; ບົດຮຽນ ກ່ຽວກັບການຄົ້ນຄວ້າ ແລະ ການປະກອບຄໍາເຫັນຕໍ່ການສ້າງ ແລະ ປັບປຸງກົດໝາຍ. ຈາກນັ້ນ, ສໍາມະນາກອນ ໄດ້ ຜັດປ່ຽນກັນປະກອບຄໍາຄິດຄໍາເຫັນ ແລະ ຖອດຖອນບົດຮຽນນໍາວິທະຍາກອນ ເພື່ອໃຫ້ໄດ້ຄວາມຮູ້ໃນການນຳໄປ ແກ້ໄຂໃນການປະຕິບັດໜ້າທີ່ຂອງຕົນ.

ທ່ານ ຄໍາໃບ ດໍາລັດ ໄດ້ມີຄໍາເຫັນໂອ້ລົມຕໍ່ກອງປະຊຸມວ່າ: ກຳມາທິການວັດທະນະທຳ-ສັງຄົມ ໄດ້ຄົ້ນຄວ້າ, ປຶກສາຫາລື ແລະ ປະສານສົມທົບກັບພາກສ່ວນທີ່ກ່ຽວຂ້ອງ ເພື່ອໃຫ້ສາມາດຈັດກອງປະຊຸມຄັ້ງນີ້ຂຶ້ນ ເພື່ອເປັນການຍົກສູງຄຸນນະພາບ ແລະ ຮັບປະກັນການເປັນເສນາທິການໃນການຈັດຕັ້ງປະຕິບັດ 3 ພາລະບົດບາດຂອງສະພາແຫ່ງຊາດ ກໍຄືສະພາປະຊາຊົນຂັ້ນແຂວງ ໃຫ້ມີປະສິດທິພາບ ແລະ ໄດ້ຮັບປະສິດທິຜົນສູງຂຶ້ນ; ທັງນີ້ ກໍເພື່ອເປັນການສືບຕໍ່ກໍ່ສ້າງ ແລະ ພັດທະນາພະນັກງານ-ລັດຖະກອນ ໃຫ້ມີຄວາມຮູ້, ມີຄວາມເຂັ້ມແຂງ, ເປັນມືອາຊີບ ແລະ ມີຄຸນນະພາບດີຂຶ້ນກວ່າເກົ່າ. ໃນໂອກາດນີ້, ທ່ານໄດ້ມີບາງຄຳເຫັນເພື່ອເປັນທິດໃຫ້ບັນດາສຳມະນາກອນນຳໄປຄົ້ນ ຄວ້າ ແລະ ຈັດຕັ້ງປະຕິບັດໃນຕໍ່ໜ້າ ໂດຍສະເໜີໃຫ້ສຳມະນາກອນ ຈົ່ງເຊີດຊູ ແລະ ຍົກສູງຄວາມຮັບຜິດຊອບໜ້າທີ່ການເມືອງຂອງຕົນ ຕໍ່ການເປັນເສນາທິການໃນການຈັດຕັ້ງປະຕິບັດ 3 ພາລະບົດບາດຂອງສະພາແຫ່ງຊາດ ແລະ ສະພາປະຊາຊົນຂັ້ນແຂວງ ດ້ວຍການຄົ້ນຄວ້າກຳແໜ້ນກ່ຽວກັບນະໂຍບາຍ, ແຜນຍຸດທະສາດ, ແຜນພັດທະນາ, ກົດໝາຍ ແລະ ນິຕິກຳໃຕ້ກົດໝາຍ ໃຫ້ເລິກເຊິ່ງກວ່າເກົ່າ ເພື່ອເປັນເຄື່ອງມື ແລະ ເປັນບ່ອນອີງໃຫ້ແກ່ການຕິດຕາມ ກວດກາວຽກງານດັ່ງກ່າວ ທັງຢູ່ສູນກາງ ແລະ ທ້ອງຖິ່ນໃນແຕ່ລະໄລຍະ; ພ້ອມນັ້ນ ກໍໃຫ້ເອົາໃຈໃສ່ຮຽນຮູ້ທິດສະດີ ແລະ ຮູ້ຈັດຕັ້ງປະຕິບັດຕົວຈິງ, ມີທັກສະໃນການຄົ້ນຄວ້າ ແລະ ການເຮັດວຽກທີ່ດີ. ເອົາໃຈໃສ່ນຳເອົາບັນດາເນື້ອໃນ, ບົດຮຽນຂອງການເຝິກອົບຮົມສ້າງຄວາມເຂັ້ມແຂງເທື່ອນີ້ ໄປເປັນຕົວຢ່າງ ແລະ ໝູນໃຊ້ເຂົ້າໃນການປະຕິບັດວຽກງານຕົວຈິງຕາມຂອບເຂດສິດ ແລະ ໜ້າທີ່ທີ່ໄດ້ກຳນົດໄວ້ ເພາະທຸກໆນິຕິກຳ, ທຸກໆເອກະສານ ແມ່ນມີໂຄງຮ່າງ ແລະ ເນື້ອໃນສະເພາະຂອງແຕ່ລະບັນຫາ, ຕົວຢ່າງ: ໂຄງຮ່າງເນື້ອໃນມະຕິຂອງພັກ, ມະຕິກອງປະຊຸມສະພາ, ມະຕິຄະນະປະຈໍາສະພາ, ບົດບັນທຶກ, ບົດລາຍງານ, ບົດຄໍາເຫັນ ເຊິ່ງແຕ່ລະເອກະສານ ໄດ້ມີໂຄງສ້າງ ແລະ ເນື້ອໃນສະເພາະຂອງມັນ. ເພີ່ມທະວີຄວາມເອົາໃຈໃສ່ໃນການເປັນເສນາທິການຊ່ວຍກຳມາທິການວັດທະນະທຳ-ສັງຄົມ, ຄະນະກຳມະການວັດທະນະທຳ-ສັງຄົມ ແລະ ບັນດາເຜົ່າ ຕິດຕາມບັນດາຂະແໜງການທີ່ກ່ຽວຂ້ອງ ໃນການຈັດ ຕັ້ງປະຕິບັດແຜນຍຸດທະສາດ, ແຜນພັດທະນາຂອງຂະແໜງການ, ໂຄງການ, ແຜນງານຂອງຂະແໜງການທີ່ກ່ຽວ ຂ້ອງຢູ່ສູນກາງ ແລະ ທ້ອງຖິ່ນ ໃຫ້ມີຜົນສຳເລັດໃນແຕ່ລະໄລຍະ. ແຕ່ລະກຳມາທິການ, ແຕ່ລະຄະນະກຳມະການ ໄດ້ມີທີ່ຕັ້ງ, ພາລະບົດບາດ, ສິດ, ໜ້າທີ່ ແລະ ທິດທາງແຜນການເຄື່ອນໄຫວລະອຽດແຕ່ລະດ້ານ; ສະນັ້ນ, ພວກເຮົາຕ້ອງຄົ້ນຄວ້າກໍາແໜ້ນແຕ່ລະບັນຫາ ເພື່ອເປັນບ່ອນອີງໃນການຕິດຕາມກວດກາ ແລະ ຊຸກຍູ້ການຈັດຕັ້ງປະຕິ ບັດ. ເພີ່ມທະວີການພົວພັນ, ປະສານສົມທົບກັນທັງພາຍໃນ ແລະ ພາຍນອກ, ລະຫວ່າງສູນກາງ ແລະ ທ້ອງຖິ່ນ ກັບພາກສ່ວນທີ່ກ່ຽວຂ້ອງ ເພື່ອເປັນທ່າແຮງຕໍ່ການຊຸກຍູ້ ແລະ ຕິດຕາມການປະຕິບັດວຽກງານຂອງຂະແໜງການ ໃນຂົງເຂດວັດທະນະທຳ-ສັງຄົມ ໃຫ້ມີຜົນສຳເລັດ ເພາະກຳມາທິການວັດທະນະທໍາ-ສັງຄົມ, ຄະນະກຳມະການວັດ ທະນະທໍາ-ສັງຄົມ ແລະ ບັນດາເຜົ່າ ແມ່ນພົວພັນຫຼາຍຂົງເຂດກວ້າງຂວາງ; ສະນັ້ນ, ພວກເຮົາຢາກເຮັດວຽກຕິດ ຕາມກວດກາໄດ້ ຕ້ອງມີການປະສານສົມທົບທີ່ດີ, ໂລ່ງລ່ຽນ ແລະ ທັນຕາມກຳນົດເວລາ. ຜ່ານການຈັດຕັ້ງປະຕິບັດຕົວຈິງ ຕ້ອງມີການສະຫຼຸບຖອດຖອນບົດຮຽນ, ລາຍງານ ແລະ ຂໍທິດຊີ້ນຳຈາກຂັ້ນເທິງຢ່າງເປັນປົກກະຕິ; ພ້ອມດຽວກັນນີ້, ສະເໜີໃຫ້ບັນດາທ່ານ ເອົາໃຈໃສ່ພັດທະນາຕົນເອງໃນທຸກດ້ານ, ຍົກລະດັບຄວາມຮູ້ໃນການຄົ້ນຄວ້າ, ວິເຄາະ-ວິໄຈ, ສະຫຼຸບ, ສັງລວມຂໍ້ມູນ-ຂ່າວສານ ເພື່ອຕອບສະໜອງກັບການປະຕິບັດໜ້າທີ່ການເມືອງໃນໄລຍະໃໝ່, ເອົາໃຈໃສ່ຄົ້ນຄວ້າຮໍ່າຮຽນແນວທາງ-ທິດສະດີຂອງພັກ ເພື່ອເປັນການປັບປຸງຕົນເອງທາງດ້ານຄຸນທາດການເມືອງ-ຄຸນສົມບັດສິນທຳປະຕິວັດ.

ກອງປະຊຸມຄັ້ງນີ້ ໄດ້ຮັບການສະໜັບສະໜູນຊ່ວຍເຫຼືອທາງດ້ານງົບປະມານຈາກໂຄງການສ້າງຄວາມເຂັ້ມ ແຂງໃຫ້ແກ່ສະພາແຫ່ງຊາດ ແລະ ສະພາປະຊາຊົນຂັ້ນແຂວງ ຫຼື ສະເຕັບສ໌ (STEPs) ໂດຍຜ່ານກອງເລຂາຄຸ້ມຄອງແຫຼ່ງທຶນຊ່ວຍເຫຼືອລ້າໃຫ້ແກ່ສະພາແຫ່ງຊາດ.

(ຂ່າວ ແລະ ພາບ: ສອນສັກ ວັນວິໄຊ)