(ສພຊ) – ວັນທີ 9-11 ພະຈິກຜ່ານມາ ທີ່ເມືອງວັງວຽງ ແຂວງວຽງຈັນ, ກົມຈັດຕັ້ງ-ພະນັກງານ ໄດ້ຈັດກອງປະຊຸມເຝິກອົບຮົມສ້າງຄວາມເຂັ້ມແຂງດ້ານວິຊາການໃນວຽກງານປະເມີນຜົນການປະຕິບັດວຽກງານໃຫ້ແກ່ພະນັກງານ-ລັດຖະກອນພາຍໃນສະພາແຫ່ງຊາດ ໂດຍການເປັນປະທານຂອງທ່ານ ນາງ ອຳໄພວອນ ລ້ອມບຸນແພງ ເລຂາ ທິການສະພາແຫ່ງຊາດ ເຊິ່ງມີວິທະຍາກອນຮັບເຊີນຈາກກະຊວງພາຍໃນເຂົ້າຮ່ວມ; ຈຸດປະສົງການຈັດເຝິກອົບຮົມຄັ້ງນີ້ ແມ່ນເພື່ອເຝິກອົບຮົມໃຫ້ແກ່ຜູ້ທີ່ຮັບຜິດຊອບວຽກງານປະເມີນຜົນ ແນໃສ່ຍົກລະດັບຄວາມຮູ້ຄວາມສາມາດ, ຄວາມເຂົ້າໃຈທາງດ້ານທິດສະດີ, ຫຼັກການ ແລະ ສາມາດປະຕິບັດຢ່າງຖືກຕ້ອງ, ສອດຄ່ອງກັບລະບຽບການ ແລະ ນິຕິກຳທີ່ກຳນົດໄວ້ ທັງເປັນການສົນທະນາແລກປ່ຽນບົດຮຽນລະຫວ່າງວິທະຍາກອນກັບຜູ້ເຂົ້າຮ່ວມເຝິກອົບ ຮົມ ເພື່ອເສີມຂະຫຍາຍຫົວຄິດປະດິດສ້າງ ແລະ ຄວາມເປັນເອກະພາບໃນການປະຕິບັດໜ້າທີ່ວຽກງານ.
ທ່ານ ນາງ ອຳໄພວອນ ລ້ອມບຸນແພງ ໄດ້ມີຄຳເຫັນໂອ້ລົມວ່າ: ວຽກງານປະເມີນຜົນການປະຕິບັດໜ້າທີ່ວຽກ ງານຂອງພະນັກງານ-ລັດຖະກອນ ເປັນວຽກທີ່ມີຄວາມໝາຍຄວາມສຳຄັນ; ສະນັ້ນ, ຈຶ່ງໄດ້ຈັດກອງປະຊຸມເຝິກອົບຮົມຄັ້ງນີ້້ຂຶ້ນ ຈຸດປະສົງແມ່ນເພື່ອຍົກລະດັບຄວາມຮູ້, ຄວາມເຂົ້າໃຈຢ່າງເປັນລະບົບ ໃຫ້ແກ່ຜູ້ຮັບຜິດຊອບວຽກງານດັ່ງກ່າວ. ບັນດາບົດຮຽນ, ປະສົບການ ທີ່ທາງວິທະຍາກອນນຳມາເຜີຍແຜ່ ຈະເປັນບ່ອນອີງ, ເປັນເຄື່ອງມືສຳຄັນທີ່ສາມາດນຳໄປໝູນໃຊ້ ແລະ ຈັດຕັ້ງປະຕິບັດຕົວຈິງໃນການປະເມີນຜົນການປະຕິບັດໜ້າທີ່ວຽກງານຂອງພະນັກ ງານ-ລັດຖະກອນ ໃຫ້ມີຄວາມຊັດເຈນ, ຖືກຕ້ອງຕາມມາດຕະຖານ, ສອດຄ່ອງກັບສະພາບຄວາມເປັນຈິງ, ສາມາດເລືອກໄດ້ວຽກດີຄົນເດັ່ນ ເພື່ອດຳເນີນການຍ້ອງຍໍຕາມເປົ້າໝາຍ ເພື່ອໃຫ້ເກີດປະໂຫຍດສູງສຸດແກ່ຜູ້ທີ່ມີຄວາມດຸໝັ່ນ, ຫ້າວຫັນ, ມີຜົນສຳເລັດດ້ວຍຄຸນນະພາບສູງໃນໜ້າທີ່ວຽກງານທີ່ໄດ້ຮັບມອບໝາຍ; ພ້ອມນີ້, ການປະເມີນຜົນການປະຕິບັດວຽກງານຂອງພະນັກງານ-ລັດຖະກອນ ແມ່ນວິທີການຕົ້ນຕໍແນໃສ່ຊອກໃຫ້ເຫັນດ້ານຕັ້ງໜ້າເພື່ອຊຸກຍູ້ສົ່ງເສີມ ແລະ ຂໍ້ຫຍຸ້ງຍາກສິ່ງທ້າທາຍທີ່ຈະຕ້ອງໄດ້ເອົາໃຈໃສ່ແກ້ໄຂ. ການປະເມີນຜົນການປະຕິບັດວຽກງານຂອງພະນັກງານ-ລັດຖະກອນ ເປັນຂໍ້ມູນພື້ນຖານໃນການວາງແຜນພັດທະນາຊັບພະຍາກອນມະນຸດ ເວົ້າລວມ, ເວົ້າສະພາະກໍແມ່ນການວາງແຜນສ້າງ, ການບັນຈຸສັບຊ້ອນ, ເລື່ອນຊັ້ນ-ຂັ້ນ, ເລື່ອນຕຳແໜ່ງບໍລິຫານ ແລະ ການຍ້ອງຍໍຕ່າງໆ ຢ່າງຖືກຕ້ອງ ແລະ ເປັນລະບົບ.
ກອງປະຊຸມໄດ້ຮັບຟັງການເຜີຍແຜ່ດຳລັດວ່າດ້ວຍການປະເມີນຜົນການປະຕິບັດວຽກງານຂອງພະນັກງານ-ລັດຖະກອນ ສະບັບເລກທີ 300/ລບ, ລົງວັນທີ 13 ກຸມ ພາ 2017; ຄໍາແນະນໍາຂອງກະຊວງພາຍໃນ ກ່ຽວກັບການຈັດຕັ້ງປະຕິ ບັດດຳລັດວ່າດ້ວຍການປະເມີນຜົນການປະຕິບັດວຽກງານຂອງພະນັກງານ-ລັດຖະກອນ ສະບັບເລກທີ 06/ພນ, ລົງວັນທີ 02 ພຶດສະພາ 2018; ຄູ່ມືແນະນໍາການຈັດຕັ້ງປະຕິບັດການປະເມີນຜົນການປະຕິບັດວຽກງານຂອງພະນັກງານ-ລັດຖະກອນ ສະບັບເລກທີ 01/ປພລ, ລົງວັນທີ 29 ສິງຫາ 2018. ຈາກນັ້ນ, ຜູ້ເຂົ້າຮ່ວມໄດ້ສຸມໃສ່ຄົ້ນຄວ້າ, ສະແດງຄຳຄິດຄຳເຫັນ ແລະ ແລກປ່ຽນບົດ ຮຽນ ພ້ອມທັງຈັດເປັນກຸ່ມປະຕິບັດຕົວຈິງໃນການປະເມີນຜົນປົກກະຕິ ເພື່ອເຮັດໃຫ້ວຽກງານປະເມີນຜົນມີປະສິດທິພາບ ແລະ ປະສິດທິຜົນຫຼາຍຂຶ້ນ.
ກອງປະຊຸມໃນຄັ້ງນີ້ ໄດ້ຮັບການສະໜັບສະໜູນຊ່ວຍເຫຼືອທາງດ້ານງົບປະມານຈາກໂຄງການ STEPS ໂດຍຜ່ານກອງເລຂາຄຸ້ມຄອງແຫຼ່ງທຶນຊ່ວຍເຫຼືອລ້າໃຫ້ແກ່ສະພາແຫ່ງຊາດ ສົມທົບກັບງົບປະມານຂອງຄະນະເລຂາທິການສະພາແຫ່ງຊາດ.
(ອານຸສອນ ພູມມີທອນ)