ວັນທີ 24 ກຸມພາ 2022 ນີ້ ທີ່ສະພາປະຊາຊົນແຂວງຫລວງນ້ຳທາ, ທ່ານ ພິດສະໄໝ ບຸນວິໄລ ຮອງຫົວໜ້າກົມສື່ມວນຊົນ ພ້ອມດ້ວຍຄະນະ ໄດ້ລົງເຄື່ອນໄຫວຝຶກອົບຮົມ ໃນຫົວຂໍ້ ຍຸດທະສາດໃໝ່ແຫ່ງການກະຈາຍຂໍ້ມູນ-ຂ່າວສານຜ່ານໂທລະສັບມືຖື ໂດຍການເຂົ້າຮ່ວມຂອງ ທ່ານ ມີໄຊ ມີວິໄລ ເລຂາທິການສະພາປະຊາຊົນແຂວງ ພ້ອມດ້ວຍຮອງເລຂາທິການ, ຫົວໜ້າຂະແໜງ ແລະ ພະນັກງານ-ວິຊາການຂໍ້ມູນ-ຂ່າວສານເຂົ້າຮ່ວມ.

ການຝຶກອົບຮົມຄັ້ງນີ້ໄດ້ຮຽນຮູ້ການຂຽນຂ່າວສັ້ນລົງສື່ອອນລາຍ, ລົງຮູບພາບຕ່າງໆຜ່ານໂທລະສັບມືຖຶ, ຄອມພິວເຕີ  ໂດຍການນຳໃຊ້ແອັບພີເຄຊັນໃນເວັບໄຊ້ຂອງສະພາແຫ່ງຊາດ ເພື່ອເຮັດໃຫ້ວຽກງານສື່ມວນຊົນ ມີຄວາມວ່ອງໄວທວງທັນກັບເຫດການ, ຍົກສູງຄຸນນະພາບ ໃນຖານະເປັນກະບອກສຽງຂອງສະພາປະຊາຊົນຂັ້ນທ້ອງຖິ່ນ ໃນການໂຄສະນາເຜີຍແຜ່ພາລະບົດບາດ, ສິດ ແລະ ໜ້າທີ່ຂອງສະມາຊິກສະພາແຫ່ງຊາດປະຈຳເຂດເລືອກຕັ້ງ, ສະມາຊິກສະພາປະຊາຊົນແຂວງ ໃຫ້ກວ້າງຂວາງຍິ່ງຂຶ້ນ.

ໂອກາດນີ້ທ່ານ ມີໄຊ ມີວິໄລ ເລຂາທິການສະພາປະຊາຊົນແຂວງ ຍັງໄດ້ສະແດງຄວາມຂອບໃຈມາຍັງກົມສື່ມວນຊົນ ສະພາແຫ່ງຊາດ ທີ່ເຫັນໄດ້ເຖິງຄວາມສຳຄັນ, ລົງເຄື່ອນໄຫວຝຶກອົບຮົມໃຫ້ແກ່ພະນັກງານ-ວິຊາການ ເພື່ອຍົກສູງຄຸນນະພາບວຽກງານສື່ມວນຊົນໃນຂັ້ນທ້ອງຖິ່ນໃຫ້ມີຄວາມເຂັ້ມແຂງ ແລະ ຫວັງຢ່າງຍິ່ງວ່າໂອກາດໜ້າຍັງຈະໄດ້ຮັບເອົາຄວາມຮູ້, ໄດ້ຮ່ວມມືແບ່ງປັນ ເພື່ອເຮັດໃຫ້ວຽກງານສື່ມວນຊົນພາຍໃນທ້ອງຖິ່ນ ດີຂຶ້ນເປັນກ້າວໆ.

              ຂຽນໂດຍ ນາງ ວັນນີ ແຝງບົວວັນ