ສະພາປະຊາຊົນແຂວງສາລະວັນ ສໍາເລັດກອງປະຊຸມຝຶກອົບຮົມດ້ານພິທີການ, ການເປັນເລຂາການນໍາ ໃຫ້ແກ່ພະນັກງານ-ລັດຖະກອນ ສະພາປະຊາຊົນແຂວງສາລະວັນ ແລະ ຜູ້ຊ່ວຍວຽກຂອງຄະນະສະມາຊິກສະພາປະຊາຊົນແຂວງ ປະຈໍາ 08 ຕົວເມືອງ ໂດຍການເປັນປະທານກອງປະຊຸມຂອງທ່ານ ສີເຮັງ ຫອມສົມບັດ ຮອງເລຂາພັກແຂວງ ປະທານສະພາປະຊາຊົນແຂວງ; ເຂົ້າຮ່ວມມີຮອງປະທານສະພາປະຊາຊົນແຂວງ, ຄະນະເລຂາທິການ, ຄະນະກໍາມະການ, ສະມາຊິກສະພາປະຊາຊົນແຂວງ ປະຈໍາເຂດເລືອກຕັ້ງ 8 ຕົວເມືອງ, ຄະນະຮັບຜິດຊອບກອງເລຂາຊ່ວຍວຽກ, ນັກວິທະຍາກອນ ພາຍໃນສະພາປະຊາຊົນແຂວງ, ຕາງໜ້າຈາກພະແນກການທີ່ກ່ຽວຂ້ອງ ແລະ ບັນດາພະນັກງານສະພາປະຊາຊົນແຂວງ ແລະ ພະນັກງານຜູ້ຊ່ວຍວຽກຄະນະສະມາຊິກສະພາປະຊາຊົນແຂວງ ປະຈໍາ 08 ຕົວເມືອງ ເຂົ້າຮ່ວມ;

ໃນພິທີຝຶກນັກວິທະຍາກອນ ໄດ້ເອົາໃຈໃສ່ຖ່າຍທອດຄວາມຮູ້ ແລະ ບົດຮຽນ, ນໍາສະເໜີເນື້ອໃນຄູ່ມື ແລະ ເອກະສານຕ່າງໆ ປະກອບມີ ຄູ່ມືການເປັນເລຂາການນໍາ; ພິທີການມາລະຍາດທາງສັງຄົມ-ສາກົນ; ຄູ່ມືການນໍາໃຊ້ເອກະສານທາງການ; ກົດໝາຍ ວ່າດ້ວຍພະນັກງານ-ລັດຖະກອນ; ວິທີການນໍາໃຊ້ເຄື່ອງໄອຊີທີ ລະບົບເຄືອຂ່າຍພາຍໃນຂອງສະພາແຫ່ງຊາດ; ວິທີການນໍາໃຊ້ລະບົບສື່ສານພາກລັດ (G-chat). ພ້ອມນັ້ນ, ກໍ່ຍັງໄດ້ມີການສົນທະນາແລກປ່ຽນລະຫວ່າງຄູຝຶກ ແລະ ນັກວິທະຍາກອນ ຢ່າງເປັນຂະບວນຟົດຟື້ນ ແລະ ເຮັດກິດຈະກໍາຮ່ວມຝຶກແອບນໍາໃຊ້ເຄື່ອງມືໄອຊີທີ ເພື່ອນໍາມາມູນໃຊ້ເຂົ້າໃນວຽກງານຕົວຈິງ ໃຫ້ເກີດປະໂຫຍດສູງສຸດ;

ທັງນີ້, ເພື່ອຍົກສູງທັກສະ, ສ້າງຄວາມຮັບຮູ້ອັນໃໝ່ ທີ່ເປັນປະໂຫຍດເຮັດໃຫ້ ພະນັກງານ-ລັດຖະກອນ ຂອງສະພາປະຊາຊົນແຂວງ ແລະ ຜູ້ຊ່ວຍວຽກຂອງ ຄະນະ ສສຂ ປະຈໍາ 08 ຕົວເມືອງ ໄດ້ຮັບຮູ້ຢ່າງຖືກຕ້ອງ ກ່ຽວກັບຂັ້ນຕອນດ້ານພິທີການໃນການຮັບແຂກກອງປະຊຸມ, ສ້າງຄວາມຊໍານານໃນການເປັນເລຂາການນໍາທີ່ດີ, ການນໍາໃຊ້ເອກະສານທາງການ ແລະ ກົດໝາຍ ວ່າດ້ວຍພະນັກງານ-ລັດຖະກອນ, ເພື່ອສ້າງສິ່ງອໍານວຍຄວາມສະດວກໃຫ້ແກ່ສະພາປະຊາຊົນແຂວງ, ຄະນະປະຈໍາ ແລະ ສະມາຊິກສະພາແຫ່ງຊາດປະຈໍາເຂດເລືອກຕັ້ງ, ຄະນະສະມາຊິກສະພາປະຊາຊົນແຂວງ ປະຈໍາເຂດເລືອກຕັ້ງເມືອງ.

ກອງປະຊຸມຈັດຂຶ້ນໃນລະຫວ່າງວັນທີ 16-17 ທັນວາ 2024 ຢູ່ທີ່ສະໂມສອນຂອງ ເມືອງລະຄອນເພັງ ແຂວງສາລະວັນ; ການຈັດຕັ້ງປະຕິບັດກິດຈະກໍາຄັ້ງນີ້ໂດຍນໍາໃຊ້ງົບປະມານຈາກໂຄງການສ້າງຄວາມເຂັ້ມແຂງໃຫ້ແກ່ສະພາແຫ່ງຊາດ ແລະ ສະພາປະຊາຊົນຂັ້ນແຂວງ (STEPS).

ພາບ-ຂ່າວ: ດີລໍາພົນ ພົມມະຈັນ