(ສພຊ) – ໃນພິທີປິດກອງປະຊຸມສະໄໝວິສາມັນເທື່ອທີ 2 ຂອງສະພາແຫ່ງຊາດ ຊຸດທີ IX, ທ່ານ ປອ. ໄຊສົມພອນ ພົມວິຫານ ກໍາມະການກົມການເມືອງສູນກາງພັກ, ປະທານສະພາແຫ່ງຊາດ ໄດ້ກ່າວສູນທອນພົດປິດກອງປະຊຸມວ່າ: ກອງປະຊຸມສະໄໝວິສາມັນເທື່ອທີ 2 ຂອງສະພາແຫ່ງຊາດ ຊຸດທີ IX ທີ່ໄດ້ດໍາເນີນມາແຕ່ວັນທີ 17 ມີນາ 2025 ດ້ວຍຈິດໃຈເຄັ່ງຮ້ອນ ທີ່ເຕັມໄປດ້ວຍບັນຍາກາດຟົດຟື້ນແຫ່ງການເສີມຂະຫຍາຍສິດປະຊາທິປະໄຕ, ການຍົກສູງຄວາມຮັບຜິດຊອບການເມືອງຂອງບັນດາທ່ານສະມາຊິກສະພາແຫ່ງຊາດ ມາຮອດມື້ນີ້ ໄດ້ບັນລຸຜົນສໍາເລັດຢ່າງຈົບງາມ.
ກອງປະຊຸມສະໄໝວິສາມັນເທື່ອທີ 2 ຂອງສະພາແຫ່ງຊາດ ຊຸດທີ IX ໄດ້ພິຈາລະນາ, ຮັບຮອງເອົາເນື້ອໃນສໍາຄັນຈໍານວນໜຶ່ງດັ່ງນີ້:
1) ກອງປະຊຸມໄດ້ພິຈາລະນາ ແລະ ຮັບຮອງເອົາລັດຖະທໍາມະນູນ ສະບັບປັບປຸງປີ 2025. ກອງປະຊຸມສະພາແຫ່ງຊາດ ສະແດງຄວາມຊົມເຊີຍຕໍ່ຄະນະກໍາມະການລະດັບຊາດປັບປຸງລັດຖະທໍາມະນູນ ທີ່ໄດ້ມີຄວາມຮັບຜິດຊອບສູງ, ເປັນເຈົ້າການດໍາເນີນຕາມແຕ່ລະຂັ້ນຕອນ ເປັນຕົ້ນການຈັດຕັ້ງປະເມີນລັດຖະທໍາມະນູນ, ການນໍາເອົາຮ່າງລັດຖະທໍາມະນູນລົງໄປທາບທາມປະກອບຄໍາເຫັນນໍາທຸກຊັ້ນຄົນຢ່າງກວ້າງຂວາງທົ່ວປະເທດ, ການຈັດຕັ້ງກອງປະຊຸມສໍາມະນາວິທະຍາສາດ, ການຂໍທິດຊີ້ນໍາຈາກກອງປະຊຸມກົມການເມືອງສູນກາງພັກ, ກອງປະຊຸມຄະນະບໍລິຫານງານສູນກາງພັກ ຄັ້ງທີ 9 ແລະ ກອງປະຊຸມຄົບຄະນະວິສາມັນຂອງຄະນະບໍລິຫານງານສູນກາງພັກ ສະໄໝທີ XI ແລະ ກອງປະຊຸມຍົກສູງດ້ານເນື້ອໃນໃຫ້ແກ່ກອງປະຊຸມສະໄໝວິສາມັນເທື່ອທີ 2 ຂອງສະພາແຫ່ງຊາດ ຊຸດທີ IX.
ການປັບປຸງລັດຖະທໍາມະນູນປີ 2025 ນີ້ ເນື້ອແທ້ເປັນການສືບຕໍ່ຜັນຂະຫຍາຍແນວທາງປ່ຽນແປງໃໝ່ຂອງພັກ ທີ່ວາງອອກໃນແຕ່ລະໄລຍະ ໃຫ້ເປັນອັນລະອຽດເຂົ້າໃສ່ເນື້ອໃນຂອງລັດຖະທໍາມະນູນ ເຊິ່ງເປັນກົດໝາຍພື້ນຖານສໍາຄັນຂອງຊາດ, ເປັນເຄື່ອງມືສໍາຄັນຂອງລັດ ໃນການປົກປ້ອງສິດ ແລະ ຜົນປະໂຫຍດຂອງພັກກຳອຳນາດ, ການຄຸ້ມຄອງລັດ ແລະ ຄຸ້ມຄອງສັງຄົມດ້ວຍກົດໝາຍ; ການປັບປຸງລັດຖະທໍາມະນູນຄັ້ງນີ້ ແມ່ນແນໃສ່ການປັບປຸງລະບົບອໍານາດແຫ່ງລັດ ປະຊາທິປະໄຕປະຊາຊົນ ໃຫ້ມີປະສິດທິພາບ, ປະສິດທິຜົນສູງ, ສ້າງບາດລ້ຽວໃໝ່ໃຫ້ແກ່ການປົກປັກຮັກສາ ແລະ ສ້າງສາປະເທດຊາດ, ສາມາດເຊື່ອມໂຍງເສດຖະກິດພາກພື້ນ ແລະ ສາກົນ, ແນໃສ່ສ້າງພື້ນຖານທາງດ້ານກົດໝາຍ ກໍຄືນິຕິກໍາທີ່ວາງອອກໃນຕໍ່ໜ້າ ໃຫ້ຮັບປະກັນຄວາມສອດຄ່ອງກັບແນວທາງການເມືອງຂອງພັກ, ທັງຈະເປັນການຊ່ວຍໃຫ້ການຄຸ້ມຄອງ-ບໍລິຫານລັດດ້ວຍກົດໝາຍໃນໄລຍະໃໝ່ ໃຫ້ມີຄຸນນະພາບສູງຂຶ້ນເລື້ອຍໆ.
ກອງປະຊຸມໄດ້ສະເໜີໃຫ້ຄະນະກໍາມະການລະດັບຊາດປັບປຸງລັດຖະທໍາມະນູນ ຮີບຮ້ອນຮຽບຮຽງ, ປັບປຸງເນື້ອໃນຕາມບັນດາຄໍາຄິດຄໍາເຫັນຂອງກອງປະຊຸມ ເພື່ອນໍາສະເໜີຂໍການພິຈາລະນາລົງລາຍເຊັນຈາກປະທານສະພາແຫ່ງຊາດ; ຫຼັງຈາກນັ້ນ, ນໍາສະເໜີຂໍການພິຈາລະນາຈາກທ່ານປະທານປະເທດ ໃນການອອກລັດຖະດໍາລັດປະກາດນໍາໃຊ້ຢ່າງເປັນທາງການໃນມໍ່ໆນີ້.
2) ກອງປະຊຸມໄດ້ພິຈາລະນາ, ຮັບຮອງເອົາການປັບປຸງກົດໝາຍ ຈໍານວນ 2 ສະບັບຄື: ກົດໝາຍວ່າດ້ວຍການປົກຄອງທ້ອງຖິ່ນ ແລະ ກົດໝາຍວ່າດ້ວຍພະນັກງານ-ລັດຖະກອນ ເພື່ອໃຫ້ສອດຄ່ອງກັບມະຕິຂອງພັກ, ການປັບປຸງກົງຈັກການຈັດຕັ້ງ ແລະ ສອດຄ່ອງກັບລັດຖະທໍາມະນູນສະບັບປັບປຸງປີ 2025 ທັງເປັນການປະກອບສ່ວນສໍາຄັນໃນການຄຸ້ມຄອງລັດ, ຄຸ້ມຄອງສັງຄົມດ້ວຍກົດໝາຍ ໃຫ້ເປັນຮູບປະທໍາ ແລະ ມີປະສິດທິຜົນຍິ່ງໆຂຶ້ນ; ກອງປະຊຸມມອບໃຫ້ຄະນະຮັບຜິດຊອບ ນໍາເອົາເນື້ອໃນຂອງຮ່າງໄປຮຽບຮຽງໃຫ້ຄົບຖ້ວນສົມບູນ ເພື່ອໄດ້ປະກາດໃຊ້ໂດຍໄວ ແລະ ນໍາໄປສູ່ການຈັດຕັ້ງປະຕິບັດໃຫ້ມີປະສິດພາບ ແລະ ປະສິດທິຜົນເປັນຢ່າງດີ.
3) ກອງປະຊຸມໄດ້ພິຈາລະນາ ແລະ ຮັບຮອງເອົາຄໍາສະເໜີຂອງນາຍົກລັດຖະມົນຕີ ກ່ຽວກັບການປັບປຸງກົງຈັກການຈັດຕັ້ງຂອງກະຊວງ-ອົງການຈໍານວນໜຶ່ງ ເຊິ່ງກອງປະຊຸມໄດ້ສະແດງຄວາມຊົມເຊີຍທີ່ລັດຖະບານໄດ້ມີຄວາມຕັດສິນໃຈສູງໃນການປັບປຸງກົງຈັກການຈັດຕັ້ງຕາມທິດກະທັດຮັດ, ໂລ່ງລ່ຽນ, ມີປະສິດທິພາບ, ສອດຄ່ອງກັບສະພາບການພັດທະນາເສດຖະກິດ-ສັງຄົມໃນປັດຈຸບັນ, ທັງເປັນການຍົກສູງປະສິດທິພາບຂອງການນໍາພາ-ຊີ້ນໍາ ແລະ ຄຸ້ມຄອງລັດ, ຄຸ້ມຄອງເສດຖະກິດ-ສັງຄົມໃນເງື່ອນໄຂໃໝ່; ພ້ອມທັງຈະເປັນການເພີ່ມຄວາມເຂັ້ມງານ ແລະ ຄວາມຮັບຜິດຊອບຂອງພະນັກງານ-ລັດຖະກອນໃຫ້ສູງຂຶ້ນ.
ກອງປະຊຸມມີຄວາມເຊື່ອໝັ້ນວ່າ ລັດຖະບານຈະສຸມໃສ່ການປັບປຸງຂັ້ນກະຊວງ-ອົງການໃຫ້ສໍາເລັດພາຍໃນເດືອນພຶດສະພາ 2025 ແລະ ການປັບປຸງການຈັດຕັ້ງສາຍຕັ້ງຢູ່ທ້ອງຖິ່ນ ໃຫ້ສໍາເລັດພາຍໃນເດືອນກໍລະກົດ 2025 ເພື່ອກ້າວສູ່ການປັບປຸງກົງຈັກໃນຂອບເຂດທົ່ວປະເທດ ແລະ ສ້າງບັນຍາກາດໃໝ່ໃຫ້ແກ່ການສ້າງຜົນງານຕ້ອນຮັບ 3 ວັນປະຫວັດສາດ ແລະ ການກະກຽມກອງປະຊຸມໃຫຍ່ 3 ຂັ້ນ ກ້າວໄປສູ່ການດໍາເນີນກອງປະຊຸມໃຫຍ່ ຄັ້ງທີ XII ຂອງພັກໃນຕໍ່ໜ້າ.
4) ກອງປະຊຸມໄດ້ພິຈາລະນາ ແລະ ຮັບຮອງເອົານະໂຍບາຍສົ່ງເສີມພິເສດສະເພາະໃຫ້ຜູ້ລົງທຶນໃນນິຄົມອຸດສາຫະກໍາອຳມະຕະ ຕາມການສະເໜີຂອງລັດຖະບານ ກ່ຽວກັບການຍົກເວັ້ນອາກອນກໍາໄລ ໄລຍະ 30 ປີ (ສະເພາະຜູ້ທີ່ມາລົງທຶນພາຍໃນ 7 ປີທໍາອິດຂອງການດໍາເນີນນິຄົມດັ່ງກ່າວ) ທີ່ຈະລົງທຶນໃນ 4 ກິດຈະກໍາສົ່ງເສີມພິເສດຄື: 1) ອຸດສາຫະກໍາຜະລິດ, ປະກອບເຄື່ອງຈັກ ແລະ ອຸປະກອນຮັບໃຊ້ການກະເສດ, ອຸດສາຫະກໍາຝຸ່ນຊີວະພາບ, ເຄມີ ແລະ ການຜະລິດອາຫານສັດ; 2) ອຸດສາຫະກໍາຜະລິດແຜງຊິ້ນສ່ວນພະລັງງານແສງອາທິດ ແລະ ພະລັງງານທົດແທນ; 3) ອຸດສາຫະກໍາຜະລິດລົດຍົນ ແລະ ອາໄຫຼ່; 4) ອຸດສາຫະກໍາຜະລິດອຸປະກອນໄຟຟ້າ ແລະ ເອເລັກໂຕຣນິກ.
ຜ່ານການພິຈາລະນາດ້ວຍເຫດຜົນ ແລະ ເຫັນໄດ້ຄວາມຈໍາເປັນໃນການດຶງດູດເອົາການລົງທຶນມາພັດທະນາເຂດທຸລະກັນດານ, ພື້ນຖານໂຄງລ່າງບໍ່ທັນມີຄວາມສະດວກນັ້ນ, ຜູ້ແທນກອງປະຊຸມໄດ້ມີຄວາມເຫັນເປັນເອກະພາບເຫັນດີຮັບຮອງເອົານະໂຍບາຍສົ່ງເສີມພິເສດສະເພາະໃຫ້ຜູ້ລົງທຶນໃນນິຄົມອຸດສາຫະກໍາອຳມະຕະ ເຊິ່ງຈະເປັນເງື່ອນໄຂສໍາຄັນໃນການສົ່ງເສີມ ແລະ ດຶງດູດເອົາການລົງທຶນຂອງຕ່າງປະເທດ ເຊິ່ງສອດຄ່ອງກັບທິດທາງໃນການພັດທະນາເຂດເສດຖະກິດຂອງປະເທດເຮົາ, ສ້າງການຫັນປ່ຽນໂຄງປະກອບເສດຖະກິດທີ່ຈະສົ່ງເສີມການຜະລິດອຸດສາຫະກໍາ, ການຜະລິດເພື່ອສົ່ງອອກ ແທນການຂຸດຄົ້ນ ແລະ ຂາຍຊັບພະຍາກອນທໍາມະຊາດດັ່ງຜ່ານມາ ແລະ ປັດຈຸບັນ.
ກອງປະຊຸມສະເໜີໃຫ້ລັດຖະບານເອົາໃຈໃສ່ຄຸ້ມຄອງວຽກງານນິຄົມອຸດສາຫະກໍາດັ່ງກ່າວ ໃຫ້ປະຕິບັດຕາມລະບຽບ, ກົດໝາຍຢ່າງເຂັ້ມງວດ, ຊຸກຍູ້ໃຫ້ນັກລົງທຶນມີການປະກອບສ່ວນພັດທະນາທ້ອງຖິ່ນ, ມີການຖ່າຍທອດບົດຮຽນ-ເຕັກນິກວິຊາການໃຫ່ແກ່ຄົນລາວ ແລະ ມີການສ້າງວຽກເຮັດງານທໍາໃຫ້ປະຊາຊົນໃນທ້ອງຖິ່ນໃຫ້ນັບມື້ຫຼາຍຂຶ້ນ.
ຜົນສໍາເລັດຂອງກອງປະຊຸມສະໄໝວິສາມັນເທື່ອທີ 2 ຂອງສະພາແຫ່ງຊາດ ຊຸດທີ IX ຄັ້ງນີ້ ເປັນການຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ, ແຜນພັດທະນາເສດຖະກິດ-ສັງຄົມແຫ່ງຊາດ 5 ປີຄັ້ງທີ IX ເຂົ້າສູ່ວຽກງານຕົວຈິງ, ເປັນໝາກຜົນລວມສູນສະຕິປັນຍາ, ການສະແດງອອກສິດປະຊາທິປະໄຕ ກໍຄືຜົນຂອງການຍົກສູງຄວາມຮັບຜິດຊອບທາງການເມືອງຂອງບັນດາທ່ານສະມາຊິກສະພາແຫ່ງຊາດ, ການຕັດສິນໃຈສູງຂອງລັດຖະບານ, ອົງການທີ່ກ່ຽວຂ້ອງ ທີ່ມີຄວາມພະຍາຍາມ ແລະ ມີມາດຕະການຕົວຈິງໃນການແກ້ໄຂຄວາມຫຍຸ້ງຍາກທາງດ້ານເສດຖະກິດ-ການເງິນ ໃຫ້ຕົກໄປເທື່ອລະກ້າວ, ມີການປັບປຸງບັນດາເອກະສານນິຕິກໍາທີ່ສໍາຄັນ ນັບທັງຄວາມຕັດສິນໃຈໃນການປັບປຸງກົງຈັກການຈັດຕັ້ງ ເພື່ອສ້າງໃຫ້ມີການຫັນປ່ຽນໃໝ່ຢ່າງເລິກເຊິ່ງ ເພື່ອສ້າງຄວາມເຊື່ອໝັ້ນຂອງປະຊາຊົນຕໍ່ການນໍາພາຂອງພັກ ແລະ ລັດ ໃນພາລະກິດປົກປັກຮັກສາ ແລະ ສ້າງສາປະເທດຊາດ ໃຫ້ມີຄວາມໜັກແໜ້ນຂຶ້ນເລື້ອຍໆ.
ກອງປະຊຸມສະໄໝວິສາມັນເທື່ອທີ 2 ຂອງສະພາແຫ່ງຊາດ ຊຸດທີ IX ໄດ້ຮັບຜົນສໍາເລັດຢ່າງຈົບງາມ ກໍຍ້ອນມີການຊີ້ນໍາຢ່າງໃກ້ຊິດຈາກກົມການເມືອງສູນກາງພັກ ແລະ ຄະນະເລຂາທິການສູນກາງພັກ, ຍ້ອນຄວາມຮັບຜິດຊອບສູງຂອງລັດຖະບານ, ບັນດາກະຊວງ, ອົງການ ແລະ ຂະແໜງການກ່ຽວຂ້ອງ ທີ່ໃຫ້ການຮ່ວມມື ແລະ ສະໜັບສະໜູນຢ່າງກວ້າງຂວາງ.
ຕາງໜ້າຄະນະປະຈໍາສະພາແຫ່ງຊາດ, ສະມາຊິກສະພາແຫ່ງຊາດ ຂໍສະແດງຄວາມຂອບໃຈເປັນຢ່າງສູງ ມາຍັງກົມການເມືອງສູນກາງພັກ ແລະ ຄະນະເລຂາທິການສູນກາງພັກ ທີ່ຍາມໃດກໍໄດ້ໃຫ້ການຊີ້ນໍາຢ່າງໃກ້ຊິດຕໍ່ສະພາແຫ່ງຊາດໂດຍຕະຫຼອດມາ, ຂໍສະແດງຄວາມຂອບໃຈເປັນຢ່າງສູງມາຍັງການນໍາຂັ້ນສູງພັກ-ລັດ, ອະດີດການນໍາຂັ້ນສູງພັກ-ລັດ ແລະ ການນໍາຂອງສູນກາງແນວລາວສ້າງຊາດ, ສະຫະພັນນັກຮົບເກົ່າແຫ່ງຊາດລາວ ແລະ ອົງການຈັດຕັ້ງມະຫາຊົນຂັ້ນສູນກາງ ທີ່ໄດ້ໃຫ້ກຽດເຂົ້າຮ່ວມກອງປະຊຸມ ແລະ ຂອບໃຈມາຍັງປະຊາຊົນລາວບັນດາເຜົ່າຢູ່ພາຍໃນ ແລະ ຊາວລາວທີ່ຢູ່ຕ່າງປະເທດ ທີ່ໄດ້ຕິດຕາມກອງປະຊຸມຂອງພວກເຮົາໃນຄັ້ງນີ້ຢ່າງຈົດຈໍ່ ແລະ ສົ່ງຄໍາຄິດເຫັນຜ່ານໂທລະສັບສາຍດ່ວນມາຍັງກອງປະຊຸມຢ່າງຫຼວງຫຼາຍ.
ຂໍສະແດງຄວາມຂອບໃຈຕໍ່ທຸກພາກສ່ວນກ່ຽວຂ້ອງ ທີ່ໄດ້ມີສ່ວນຮ່ວມໃນຜົນສໍາເລັດຂອງກອງປະຊຸມຄັ້ງນີ້ ເປັນຕົ້ນ ກອງເລຂານຸການກອງປະຊຸມ ທີ່ເອົາໃຈໃສ່ຮັບຜິດຊອບເນື້ອໃນ, ວຽກບໍລິຫານ-ພິທີການຮອບດ້ານ ດ້ວຍຄວາມຫ້າວຫັນ ແລະ ມີຄວາມຮັບຜິດຊອບສູງ; ຂໍຂອບໃຈຕໍ່ກໍາລັງປ້ອງກັນຊາດ-ປ້ອງກັນຄວາມສະຫງົບ ທີ່ໄດ້ປະກອບສ່ວນເຮັດໃຫ້ກອງປະຊຸມມີຄວາມປອດໄພທຸກປະການ ແລະ ຂອບໃຈຕໍ່ບັນດາສື່ມວນຊົນ ທີ່ໄດ້ເອົາໃຈໃສ່ເຜີຍແຜ່ການດໍາເນີນກອງປະຊຸມສະພາແຫ່ງຊາດ ໃຫ້ສັງຄົມໄດ້ເຂົ້າເຖິງ ແລະ ຕິດຕາມຢ່າງຕໍ່ເນື່ອງ.
ກອງປະຊຸມມອບໃຫ້ຄະນະປະຈໍາສະພາແຫ່ງຊາດ, ບັນດາກໍາມາທິການ, ຄະນະເລຂາທິການສະພາແຫ່ງຊາດ, ຄະນະສະມາຊິກສະພາແຫ່ງຊາດປະຈໍາເຂດເລືອກຕັ້ງ, ສະມາຊິກສະພາແຫ່ງຊາດ, ລັດຖະບານ, ອົງການທີ່ກ່ຽວຂ້ອງ, ອົງການປົກຄອງທ້ອງຖິ່ນ ແລະ ທຸກພາກສ່ວນທີ່ກ່ຽວຂ້ອງ ຈົ່ງໄດ້ຜັນຂະຫຍາຍມະຕິກອງປະຊຸມສະໄໝວິສາມັນຄັ້ງນີ້ ເຂົ້າໃນການປະຕິບັດວຽກງານຕົວຈິງຂອງແຕ່ລະພາກສ່ວນ ໃຫ້ໄດ້ຮັບຜົນສໍາເລັດເປັນຢ່າງດີ.
ອີກເທື່ອໜຶ່ງ, ເນື່ອງໃນໂອກາດວັນສ້າງຕັ້ງພັກປະຊາຊົນປະຕິບັດລາວ ຄົບຮອບ 70 ປີ (ວັນທີ 22 ມີນາ 1955 ຫາ ວັນທີ 22 ມີນາ 2025) ທີ່ຈະມາເຖິງນີ້, ຂ້າພະເຈົ້າ ຂໍຕາງໜ້າໃຫ້ຄະນະປະຈໍາສະພາແຫ່ງຊາດ, ສະມາຊິກສະພາແຫ່ງຊາດ ຂໍອວຍພອນໄຊອັນປະເສີດມາຍັງສະຫາຍເລຂາທິການໃຫຍ່ຄະນະບໍລິຫານງານສູນກາງພັກ, ປະທານປະເທດ ຈົ່ງມີພະລະນາໄມສົມບູນ, ມີຄວາມຜາສຸກໃນຊີວິດສ່ວນຕົວ ແລະ ຄອບຄົວ, ມີຜົນສໍາເລັດໃໝ່ໃຫຍ່ຫຼວງກວ່າເກົ່າ ໃນການນໍາພາ-ຊີ້ນໍາປະເທດຊາດກ້າວຂຶ້ນຢ່າງໜັກແໜ້ນ.
ຂໍອວຍພອນໃຫ້ບັນດາການນໍາຂັ້ນສູງພັກ-ລັດ, ຄະນະລັດຖະບານ, ອະດີດການນໍາພັກ-ລັດ, ສະມາຊິກສະພາແຫ່ງຊາດ ຕະຫຼອດຮອດພະນັກງານ, ທະຫານ, ຕຳຫຼວດ ນັບທັງຊາວລາວທົ່ວປະເທດ ຈົ່ງມີສຸຂະພາບເຂັ້ມແຂງ, ມີຄວາມສຸກໃນຄອບຄົວ ແລະ ປະສົບຜົນສໍາເລັດໃນໜ້າທີ່ວຽກງານອັນມີກຽດຂອງຕົນ.
ໃນໂອກາດອັນສະຫງ່າລາສີນີ້, ຂ້າພະເຈົ້າ ຂໍປະກາດປິດກອງປະຊຸມສະໄໝວິສາມັນເທື່ອທີ 2 ຂອງສະພາແຫ່ງຊາດ ຊຸດທີ IX ຢ່າງເປັນທາງການນັບແຕ່ເວລານີ້ເປັນຕົ້ນໄປ.