ກອງປະຊຸມສະໄໝສາມັນເທື່ອທີ 7 ຂອງສະພາປະຊາຊົນແຂວງຄໍາມ່ວນ ຊຸດທີ II ຄັ້ງນີ້ ໄດ້ພິຈາລະນາຮັບຮອງ ບັນຫາສໍາຄັນ ຂອງແຂວງ ດັ່ງນີ້:

1. ກອງປະຊຸມໄດ້ ພິຈາລະນາ-ຮັບຮອງ ບົດລາຍງານ ຂອງເຈົ້າແຂວງ ກ່ຽວກັບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ແລະ ແຜນງົບປະມານແຫ່ງລັດ ຂອງແຂວງ ປະຈໍາ 6 ເດືອນຕົ້ນປີ ແລະ ທິດທາງແຜນການ 6 ເດືອນທ້າຍປີ 2024; ກອງປະຊຸມສະແດງຄວາມຊົມເຊີຍ ອົງການປົກຄອງແຂວງ ຄໍາມ່ວນ ທີ່ໄດ້ຕັ້ງໜ້າໃນການແກ້ໄຂບັນຫາຄວາມຫຍຸ້ງຍາກທາງດ້ານເສດຖະກິດ-ການເງິນ ດ້ວຍການຜັນຂະຫຍາຍແນວທາງ ນະໂຍບາຍ ຂອງພັກ ແລະ ລະບຽບກົດໝາຍ ຂອງລັດ ໂດຍກໍານົດເປັນມາດຕະການ, ວິທີການແກ້ໄຂບັນຫາຕ່າງໆ, ກໍານົດບັນດາຄາດໝາຍສູ້ຊົນ ໃນການຈັດຕັ້ງປະຕິບັດຢ່າງລະອຽດ ຈະແຈ້ງ ເຮັດໃຫ້ເສດຖະກິດ ຂອງແຂວງສືບຕໍ່ຂະຫຍາຍຕົວ ແລະ ການເກັບລາຍຮັບງົບປະມານແຫ່ງລັດ ກໍປະຕິບັດໄດ້ລື່ນແຜນ.

ກອງປະຊຸມສະເໜີໃຫ້ອົງການປົກຄອງ ເອົາໃຈໃສ່ແກ້ໄຂຂໍ້ຄົງຄ້າງ, ອຸປະສັກ ແລະ ຂອດອຸດຕັນ ໃນການຈັດຕັ້ງປະຕິບັດແຜນພັດທະນາເສດຖະກິດ – ສັງຄົມ ໃຫ້ມີບາດກ້າວບຸກທະລຸ, ມີສ່ວນຮ່ວມ ຂອງປະຊາຊົນ ແລະ ບັນດາການຈັດຕັ້ງທີ່ກ່ຽວຂ້ອງ ລະຫວ່າງແຂວງ ແລະ ເມືອງ ໃຫ້ເລິກເຊິ່ງ ແລະ ກວ້າງຂວາງ; ເອົາໃຈໃສ່ໃນການຄຸ້ມຄອງງົບປະມານ ຂອງແຂວງ ໂດຍສະເພາະການຂຸດຄົ້ນແຫຼ່ງລາຍຮັບໃໝ່ ເພື່ອຮັບປະກັນໃຫ້ການຈັດເກັບລາຍຮັບ ກຸ້ມລາຍຈ່າຍ ຕາມການຖືກມອບໃຫ້ເປັນແຂວງກຸ້ມຕົນເອງ; ເອົາໃຈໃສ່ປະຕິບັດຄາດໝາຍເສດຖະກິດ ໂດຍສືບຕໍ່ ຄົ້ນຄວ້າມາດຕະການ ໃນການນໍາໃຊ້ທ່າແຮງທີ່ໄດ້ປຽບ ຂອງແຂວງເຮົາ ໃຫ້ເກີດປະໂຫຍດສູງສຸດ, ຊຸກຍູ້ສົ່ງເສີມການຜະລິດພາຍໃນໃຫ້ມີຄວາມເຂັ້ມແຂງ ໂດຍສະເພາະສົ່ງເສີມການຜະລິດເພື່ອທົດແທນການນໍາເຂົ້າ ແລະ ສົ່ງເສີມການສົ່ງອອກໃຫ້ໄດ້ຫຼາຍຂຶ້ນ, ກໍານົດຈຸດສຸມການຜະລິດໃຫ້ຈະແຈ້ງ ຊັດເຈນ; ເອົາໃຈໃສ່ສຶບຕໍ່ປະຕິບັດນະໂຍບາຍ, ກໍານົດມາດຕະການ ແລະ ວິທີການແກ້ໄຂບັນດາຄາດໝາຍຕົວຊີ້ວັດໃນຂົງເຂດວັດທະນະທຳ – ສັງຄົມ ທີ່ບໍ່ທັນບັນລຸ; ຊຸກຍູ້ປຸກລະດົມ ສ້າງສະຕິໃຫ້ທຸກພາກສ່ວນທົ່ວສັງຄົມ ລວມທັງພາກລັດ, ເອກະຊົນ, ຜູ້ປະກອບການ, ນັກຮຽນຮູ້, ນັກສຶກສາ, ປັນຍາຊົນ ແລະ ປະຊາຊົນບັນດາເຜົ່າ ໃຫ້ປະຕິບັດນະໂຍບາຍປະຢັດມັດຖະຍັດ ແລະ ຕ້ານການຟຸມເຟືອຍ ດ້ວຍຄວາມຮັບຜິດຊອບ ແລະ ຕື່ນຕົວສູງ, ສ້າງຄວາມເປັນເຈົ້າຕົນເອງ-ກຸ້ມຕົນເອງ, ສ້າງຄວາມເຂັ້ມແຂງດ້ວຍຕົນເອງ ແລະ ຍົກສູງນໍ້າໃຈຮັກຊາດໃຫ້ສູງຂຶ້ນ ໃນສະພາບທີ່ມີຄວາມຫຍຸ້ງຍາກທາງເສດຖະກິດ – ການເງິນ; ເອົາໃຈໃສ່ຄຸ້ມຄອງບໍລິຫານລັດດ້ວຍກົດໝາຍໃຫ້ມີຜົນສັກສິດ ແລະ ແກ້ໄຂປະກົດການຫຍໍ້ທໍ້ທີ່ເກີດຂຶ້ນໃນທຸກຂົງເຂດ ຂອງສັງຄົມ ໃຫ້ໄປຕາມກົດໝາຍ, ຕາມຫຼັກການເດັດຂາດ, ໂປ່ງໃສ ແລະ ມືອາຊີບ, ມີປະສິດທິພາບ, ປະສິດທິຜົນສູງ ແລະ ມີຄວາມເຂັ້ມງວດ ໂດຍສະເພາະປະຕິບັດມາດຕະການເດັດຂາດ ຕໍ່ຫົວໜ່ວຍງົບປະມານທີ່ລະເມີນວິໄນແຜນການ – ການເງິນ; ເອົາໃຈໃສ່ປະຕິບັດວຽກງານທີ່ມີການແບ່ງຂັ້ນຄຸ້ມຄອງລະຫວ່າງແຂວງ ແລະ ເມືອງຢ່າງຈະແຈ້ງ ເພື່ອສ້າງຄວາມເຂັ້ມແຂງໃຫ້ອົງການປົກຄອງເມືອງ ໃຫ້ມີຄວາມເປັນເຈົ້າການຫຼາຍຂຶ້ນໃນການພັດທະນາທ້ອງຖິ່ນ.

2. ກອງປະຊຸມໄດ້ ພິຈາລະນາ-ຮັບຮອງ ບົດລາຍງານ ຂອງອົງການປົກຄອງແຂວງ ກ່ຽວກັບການຈັດຕັ້ງປະຕິບັດຄາດໝາຍວຽກພັດທະນາຊົນນະບົດ ແລະ ແກ້ໄຂຄວາມທຸກຍາກ ຂອງແຂວງຄໍາມ່ວນໄລຍະແຕ່ປີ 2021 ຫາ 2023, ການຈັດຕັ້ງປະຕິບັດວຽກງານດັ່ງກ່າວ ປະຈໍາ 6 ເດືອນຕົ້ນປີ ແລະ ທິດທາງແຜນການ 6 ເດືອນທ້າຍປີ 2024 ຕິດພັນກັບການຈັດຕັ້ງປະຕິບັດມະຕິກອງປະຊຸມສະພາປະຊາຊົນແຂວງຄໍາມ່ວນ ສະບັບເລກທີ 15/ຄປຈ.ສພຂ, ລົງວັນທີ 04 ເມສາ 2023 ແລະ ສະບັບເລກທີ14/ຄປຈ.ສພຂ, ລົງວັນທີ 27 ມີນາ 2024; ກອງປະຊຸມຕີລາຄາສູງ ຕໍ່ອົງການປົກຄອງທີ່ໄດ້ຕັ້ງໜ້ານໍາພາ-ຊີ້ນໍາ ການຈັດຕັ້ງປະຕິບັດບັນດາຄາດໝາຍ ດັ່ງກ່າວ ເປັນຕົ້ນແມ່ນ ການປະຕິບັດຄາດໝາຍການພັດທະນາຊົນນະບົດ ແລະ ແກ້ໄຂຄວາມທຸກຍາກ ໄດ້ບັນລຸຜົນສໍາເລັດໃນຫຼາຍຄາດໝາຍ ແລະ ຍັງປະຕິບັດບໍ່ທັນບັນລຸພຽງແຕ່ 2 ຄາດໝາຍ ເຊິ່ງໄດ້ເປັນການປະກອບສ່ວນອັນສໍາຄັນ ເຂົ້າໃນການແກ້ໄຂຄວາມທຸກຍາກ, ຍົກລະດັບຊີວິດການເປັນຢູ່ ຂອງປະຊາຊົນບັນດາເຜົ່າ; ກອງປະຊຸມສະເໜີໃຫ້ມີການແຕ່ງຕັ້ງຄະນະຮັບຜິດຊອບ ແລະ ມີການແບ່ງວຽກງານກັນໃຫ້ລະອຽດຊັດເຈນ, ໃຫ້ມີການຕິດຕາມກວດກາ, ການປະເມີນຜົນ, ປັບປຸງກົນໄກການປະສານງານ, ການແລກປ່ຽນຂໍ້ມູນຂ່າວສານ ຕໍ່ວຽກງານ ພັດທະນາຊົນນະບົດ ແລະ ແກ້ໄຂຄວາມທຸກຍາກ ລະຫວ່າງ ພະແນກການ-ອົງການ ແລະ ລະຫວ່າງຂະແໜງການທີ່ກ່ຽວຂ້ອງຂັ້ນຕ່າງໆ; ພ້ອມທັງໃຫ້ຄົ້ນຄວ້າຈັດສັນງົບປະມານ ເຂົ້າໃສ່ວຽກງານດັ່ງກ່າວ ໃຫ້ສາມາດເຄື່ອນໄຫວໄດ້ຢ່າງຄ່ອງຕົວ ສາມາດບັນລຸຄາດໝາຍການພັດທະນາ ແລະ ແກ້ໄຂຄວາມທຸກຍາກ ຂອງປະຊາຊົນເທື່ອລະກ້າວ.

3. ກອງປະຊຸມໄດ້ ພິຈາລະນາ-ຮັບຮອງ ບົດລາຍງານ ຂອງອົງການປົກຄອງແຂວງ ກ່ຽວກັບການປະເມີນຜົນການຈັດຕັ້ງປະຕິບັດ ຂໍ້ຕົກລົງ ຂອງເຈົ້າແຂວງ ວ່າດ້ວຍການຄຸ້ມຄອງນໍາໃຊ້ ທີ່ດິນກະສິກໍາຢູ່ແຂວງຄໍາມ່ວນ ສະບັບເລກທີ 333/ຈຂ.ຄມ, ລົງວັນທີ 03 ມີນາ 2020; ກອງປະຊຸມສັງເກດເຫັນວ່າ ຂໍ້ຕົກລົງສະບັບດັ່ງກ່າວ ເປັນນິຕິກໍາຟື້ນຖານທີ່ສໍາຄັນຂອງອົງການລັດຂັ້ນທ້ອງຖິ່ນ ໃນການຄຸ້ມຄອງລັດ, ຄຸ້ມຄອງເສດຖະກິດ-ສັງຄົມ, ແກ້ໄຂຂໍ້ຂັດແຍ່ງໃນສັງຄົມ, ເປັນບ່ອນອີງ ແລະ ເປັນເຄື່ອງມືໃນການປົກປ້ອງສິດ ແລະ ຜົນປະໂຫຍດລວມ ຂອງລັດ, ລວມໝູ່, ນິຕິບຸກຄົນ ແລະ ບຸກຄົນ ເຊິ່ງການຈັດຕັ້ງປະຕິບັດໄລຍະ 3 ປີຜ່ານມາ ໄດ້ມີດ້ານຕັ້ງໜ້າຫຼາຍດ້ານ; ພ້ອມດຽວກັນນີ້ ກອງປະຊຸມຍັງສັງເກດເຫັນວ່າ ການໂຄສະນາ ເຜີຍແຜ່ ເຊື່ອມຊຶມຂໍ້ຕົກລົງສະບັບນີ້ ຍັງເຮັດບໍ່ທັນກວ້າງຂວາງ ເລິກເຊິ່ງເທົ່າທີ່ຄວນ ແລະ ການຈັດຕັ້ງປະຕິບັດກໍຍັງມີຫຼາຍບັນຫາທີ່ຈະຕ້ອງໄດ້ປັບປຸງແກ້ໄຂ ເປັນຕົ້ນແມ່ນຄວາມສອດຄ່ອງ ຂອງເນື້ອໃນຂໍ້ຕົກລົງ ມີບາງມາດຕາຍັງເປັນສາເຫດໃຫ້ແກ່ການຈັດຕັ້ງປະຕິບັດພົບຄວາມຫຍຸ້ງຍາກ ແລະ ມີເນື້ອໃນຂອງບາງມາດຕາ ກໍຍັງຂັດກັບກົດໝາຍ ຫຼື ນິຕິກຳໃຕ້ກົດໝາຍສະບັບອື່ນ, ເປັນຊ່ອງຫວ່າງ, ມີຜົນກະ ທົບ ແລະ ບໍ່ສາມາດຈັດຕັ້ງປະຕິບັດໄດ້ ແຕ່ກໍ່ຍັງບໍ່ທັນເອົາໃຈໃສ່ຄົ້ນຄວ້າ ແລະ ສະເໜີວິທີການແກ້ໄຂ; ສະນັ້ນ ກອງປະຊຸມສະເໜີໃຫ້ອົງການປົກຄອງ ຄົ້ນຄວ້າ ແລະ ປັບປຸງບາງໝວດ, ບາງເນື້ອໃນ, ບາງມາດຕາ ຂອງຂໍ້ຕົກລົງສະບັບນີ້ຄືນໃໝ່ ໃຫ້ເປັນອັນລະອຽດ ແລະ ເອົາໃຈໃສ່ ຈັດຕັ້ງຜັນຂະຫຍາຍ ມະຕິກອງປະຊຸມສະໄໝສາມັນ ເທື່ອທີ 7 ຂອງສະພາປະຊາຊົນແຂວງ ຊຸດທີ II ວ່າດ້ວຍການຮັບຮອງເອົາບົດລາຍງານ ຂອງອົງການປົກຄອງແຂວງ ກ່ຽວກັບການປະເມີນຜົນການຈັດຕັ້ງປະຕິບັດຂໍ້ຕົກລົງ ຂອງເຈົ້າແຂວງ ສະບັບເລກທີ 333/ຈຂ.ຄມ ໃຫ້ເປັນແຜນການ, ແຜນງານ ແລະ ເປັນວຽກງານຈຸດສຸມ ທີ່ແທດຕົວຈິງ ແລະ ມີຜົນສໍາເລັດເປັນຢ່າງດີ.

4. ກອງປະຊຸມໄດ້ ພິຈາລະນາ-ຮັບຮອງ ບົດລາຍງານ ຂອງຄະນະປະຈໍາສະພາປະຊາຊົນຂັ້ນແຂວງ ກ່ຽວກັບການຈັດຕັ້ງປະຕິບັດແຜນການເຄື່ອນໄຫວວຽກງານ ຂອງສະພາປະຊາຊົນຂັ້ນແຂວງ ໃນໄລຍະແຕ່ກອງປະຊຸມສະໄໝສາມັນເທື່ອທີ 6 ຫາ ກອງປະຊຸມສະໄໝສາມັນເທື່ອທີ 7 ແລະ ແຜນການເຄື່ອນໄຫວວຽກງານ ແຕ່ກອງປະຊຸມສະໄໝສາມັນເທື່ອທີ 7 ຫາ ກອງປະຊຸມສະໄໝສາມັນເທື່ອທີ 8 ຂອງສະພາປະຊາຊົນແຂວງຄຳມ່ວນ ຊຸດທີ II; ກອງປະຊຸມສະແດງຄວາມຊົມເຊີຍຕໍ່ການເອົາໃຈໃສ່ນໍາພາ-ຊີ້ນໍາ ຂອງຄະນະປະຈໍາສະພາແຫ່ງຊາດ, ຄະນະບໍລິຫານງານພັກແຂວງ, ຄະນະປະຈໍາສະພາປະຊາຊົນຂັ້ນແຂວງ, ຄວາມເປັນເຈົ້າການຂອງກົງຈັກເສນາທິການ ຂອງສະພາປະຊາຊົນຂັ້ນແຂວງ ກໍຄືສະມາຊິກສະພາປະຊາຊົນຂັ້ນແຂວງ ໃນການເຄື່ອນໄຫວປະຕິບັດພາລະບົດບາດ, ສິດ ແລະ ໜ້າທີ່ ຂອງຕົນ ຕາມທີ່ໄດ້ກໍານົດໄວ້ໃນກົດໝາຍ ແລະ ນິຕິກໍາໃຕ້ກົດໝາຍທີ່ກ່ຽວຂ້ອງ ຈົນໄດ້ຮັບຜົນສໍາເລັດຫຼາຍດ້ານ ເຮັດໃຫ້ບົດບາດ ຂອງສະພາປະຊາຊົນຂັ້ນແຂວງ ນັບມື້ສູງຂຶ້ນ, ໄດ້ຮັບຄວາມໄວ້ເນື້ອເຊື່ອໃຈ ຈາກອົງການຈັດຕັ້ງພັກ-ລັດຂັ້ນຕ່າງໆ ແລະ ປະຊາຊົນຜູ້ມີສິດເລືອກຕັ້ງນັບມື້ນັບກວ້າງຂວາງ.

ກອງປະຊຸມໄດ້ເນັ້ນໜັກຕໍ່ການສ້າງ ຂໍ້ຕົກລົງ ຂອງເຈົ້າແຂວງ ເຊິ່ງມີຈໍານວນ 5 ສະບັບທີ່ຈະນໍາເຂົ້າພິຈາລະນາຮັບຮອງໃນກອງປະຊຸມສະໄໝສາມັນເທື່ອທີ 8 ໃຫ້ສອດຄ່ອງກັບກັບຂັ້ນຕອນຂອງການສ້າງນິຕິກໍາ ແລະ ສອດຄ່ອງກັບຄວາມຮຽກຮ້ອງຕ້ອງການໃນການຄຸ້ມຄອງລັດ ຄຸ້ມຄອງສັງຄົມດ້ວຍກົດໝາຍ ໃນແຕ່ລະໄລຍະ, ຍົກສູງຄຸນນະພາບໃນການປະຕິບັດ 3 ພາລະບົດບາດ ຂອງສະພາປະຊາຊົນຂັ້ນແຂວງ, ຮ່ວມກັບອົງການປົກຄອງເພື່ອແກ້ໄຂບັນຫາຄວາມເຄັ່ງຮ້ອນ ຂອງສັງຄົມ ຢ່າງທັນການ ແລະ ນໍາເອົາຜົນສໍາເລັດ ຂອງກອງປະຊຸມຄັ້ງນີ້ໄປເຜີຍແຜ່ ໃຫ້ຜູ້ມີສິດເລືອກຕັ້ງໃນທົ່ວແຂວງຮັບຮູ້ ແລະ ເຂົ້າໃຈຢ່າງກວ້າງຂວາງ ເພື່ອເຂົ້າຮ່ວມໃນການຈັດຕັ້ງປະຕິບັດ ແລະ ສ້າງສະຕິເຄົາລົບລັດຖະທໍາມະນູນ ແລະ ກົດໝາຍໃຫ້ປະກົດຜົນເປັນຈິງ.

5. ກອງປະຊຸມໄດ້ຮັບຟັງການຊີ້ແຈງຈາກພາກສວ່ນຕ່າງໆ ຂອງອົງການປົກຄອງແຂວງ ຕາມຫົວຂໍ້ສະເພາະ ຫຼຶ ຄໍາຊັກຖາມ ທີ່ຄະນະປະຈໍາສະພາປະຊາຊົນຂັ້ນແຂວງໄດ້ຕັ້ງຂຶ້ນກ່ອນການດໍາເນີນກອງປະຊຸມ ແລະ ການປະກອບຄຳເຫັນ,ຊັກຖາມ ຂອງສະມາຊິກສະພາປະຊາຊົນຂັ້ນແຂວງ ທີ່ໄດ້ຍົກຂື້ນໃນວາລະດໍາເນີນກອງປະຊຸມ ໂດຍມີທ່ານເຈົ້າແຂວງ, ຮອງເຈົ້າແຂວງ, ຫົວໜ້າ/ຮອງຫົວໜ້າ 8 ພະເເນກການໃນຂົງເຂດເສດຖະກິດ, ຫົວໜ້າ/ຮອງຫົວໜ້າ 4 ພະເເນກການໃນຂົງເຂດວັດທະນະທໍາສັງຄົມ ແລະ ຫົວໜ້າກອງບັນຊາການປ້ອງກັນຄວາມສະຫງົບແຂວງ ໃນບັນຍາກາດທີ່ກົງໄປກົງມາ ແລະ ສ້າງສັນ ເພື່ອພ້ອມກັນຊອກຫາວິທີແກ້ໄຂບັນດາຂໍ້ຄົງງຄ້າງ ສິ່ງທ້າທ້າຍ ທີ່ແຂວງເຮົາພວມປະເຊີນຢູ່ໃນປັດຈຸບັນ;

6. ກອງປະຊຸມຍັງໄດ້ຮັບຟັງຜູ້ຕາງໜ້າຄະນະປະຈໍາສະພາປະຊາຊົນຂັ້ນແຂວງ ລາຍງານຜົນການພິຈາລະນາ ແລະ ຮັບຮອງ ຈາກກອງປະຊຸມສະໄໝສາມັນ ແລະ ວິສາມັນ ຂອງຄະນະປະຈໍາສະພາປະຊາຊົນຂັ້ນແຂວງ ກ່ຽວກັບການພິຈາລະນາຮັບຮອງເອົາບັນຫາສໍາຄັນພື້ນຖານ ຂອງແຂວງ ຈໍານວນ 23 ມະຕິ, ໃນນັ້ນມີດ້ານເສດຖະກິດສັງຄົມຈໍານວນ 10 ມະຕິ ແລະ ດ້ານບຸກຄະລາກອນ ຈໍານວນ 13 ມະຕິ.

ຜົນສໍາເລັດ ຂອງກອງປະຊຸມສະໄໝສາມັນເທື່ອທີ 7 ຂອງສະພາປະຊາຊົນແຂວງຄໍາມ່ວນ ຊຸດທີ II ຄັ້ງນີ້ ເປັນການຜັນຂະຫຍາຍມະຕິກອງປະຊຸມໃຫຍ່ຄັ້ງທີ XI ຂອງພັກ, ມະຕິກອງປະຊຸມໃຫຍ່ຄັ້ງທີ X ຂອງອົງຄະນະພັກແຂວງຄໍາມ່ວນ, ແຜນພັດທະນາເສດຖະກິດສັງຄົມ 5 ປີ ຂອງແຂວງ ເຂົ້າສູ່ຊີວິດຕົວຈິງ, ແມ່ນໝາກຜົນແຫ່ງສະຕິປັນຍາ, ສິດປະຊາທິປະໄຕ ກໍຄືການຍົກສູງຄວາມຮັບຜິດຊອບການເມືອງ ຂອງບັນດາທ່ານສະມາຊິກສະພາປະຊາຊົນຂັ້ນແຂວງ, ຄວາມຕັດສິນໃຈສູງ ຂອງອົງການປົກຄອງແຂວງ, ອົງການທີ່ກ່ຽວຂ້ອງ ທີ່ຈະສືບຕໍ່ພ້ອມກັນແກ້ໄຂຄວາມຫຍຸ້ງຍາກທາງດ້ານເສດຖະກິດ-ການເງິນ ໃຫ້ຕົກໄປເທື່ອລະກ້າວ ເພື່ອພັດທະນາ ແຂວງຄໍາມ່ວນໃຫ້ມີຄວາມໜັກແໜ້ນຂຶ້ນໄປເລື້ອຍໆ.

ກອງປະຊຸມສະໄໝສາມັນເທື່ອທີ 7 ຂອງສະພາປະຊາຊົນແຂວງຄຳມ່ວນ ຊຸດທີ II ໄດ້ຮັບຜົນສໍາເລັດຢ່າງຈົບງາມ ກໍຍ້ອນມີການຊີ້ນໍາຢ່າງໃກ້ຊິດ ຈາກຄະນະປະຈຳສະພາແຫ່ງຊາດ, ຄະນະປະຈຳພັກແຂວງ ແລະ ຄະນະປະຈຳສະພາປະຊາຊົນຂັ້ນແຂວງ, ສະມາຊິກສະພາປະຊາຊົນຂັ້ນແຂວງ , ຍ້ອນຄວາມຮັບຜິດຊອບສູງ ຂອງອົງການປົກຄອງແຂວງ, ພະແນກການ, ບັນດາອົງການທີ່ກ່ຽວຂ້ອງ ທີ່ໃຫ້ການຮ່ວມມື ແລະ ສະໜັບສະໜູນຢ່າງກວ້າງຂວາງ.

ຕາງໜ້າຄະນະປະຈໍາສະພາປະຊາຊົນຂັ້ນແຂວງ ຂໍສະແດງຄວາມຂອບໃຈເປັນຢ່າງສູງ ມາຍັງຄະນະປະຈຳສະພາແຫ່ງຊາດ ແລະ ຄະນະປະຈຳພັກແຂວງຄຳມ່ວນ ທີ່ຍາມໃດກໍໄດ້ໃຫ້ການຊີ້ນໍາຢ່າງໃກ້ຊິດຕໍ່ສະພາປະຊາຊົນຂັ້ນແຂວງໂດຍຕະຫລອດມາ, ຂໍສະແດງຄວາມຂອບໃຈ ເປັນຢ່າງຍິ່ງມາຍັງທ່ານຮອງປະທານສະພາແຫ່ງຊາດ, ທ່ານເລຂາພັກແຂວງ-ເຈົ້າແຂວງ, ບັນດາທ່ານການນໍາພັກ-ລັດ, ແນວລາວສ້າງຊາດ, ສະຫະພັນນັກຮົບເກົ່າ ແລະ ອົງການຈັດຕັ້ງມະຫາຊົນ ທີ່ໄດ້ໃຫ້ກຽດເຂົ້າຮ່ວມ ແລະ ຂອບໃຈມາຍັງປະຊາຊົນລາວບັນດາເຜົ່າຊາວແຂວງຄຳມ່ວນ ທີ່ໄດ້ຕິດຕາມກອງປະຊຸມຂອງພວກເຮົາໃນຄັ້ງນີ້ ຢ່າງຈົດຈໍ່ ແລະ ມີການສົ່ງຄໍາຄິດເຫັນຜ່ານໂທລະສັບສາຍດ່ວນ 051 156 ມາຍັງກອງປະຊຸມ.

ຂໍສະແດງຄວາມຂອບໃຈ ຕໍ່ທຸກພາກສ່ວນກ່ຽວຂ້ອງ ທີ່ໄດ້ປະກອບສ່ວນເຂົ້າໃນຜົນສໍາເລັດ ຂອງກອງປະຊຸມໃນຄັ້ງນີ້ ເປັນຕົ້ນ ກອງເລຂານຸການກອງປະຊຸມ ທີ່ໄດ້ຮັບໃຊ້ກອງປະຊຸມເທື່ອນີ້ຢ່າງຫ້າວຫັນ ແລະ ມີຄວາມຮັບຜິດຊອບສູງ; ຂໍສະແດງຄວາມຂອບໃຈຕໍ່ກໍາລັງປ້ອງກັນຊາດ-ປ້ອງກັນຄວາມສະຫງົບ ທີ່ໄດ້ເຮັດສໍາເລັດເລັດໜ້າທີ່ວຽກງານປ້ອງກັນຄວາມສະຫງົບ ແລະ ຄວາມປອດໄພໃຫ້ແກ່ກອງປະຊຸມຄັ້ງນີ້, ຂອບໃຈຕໍ່ບັນດາສື່ມວນຊົນ ທີ່ໄດ້ນໍາສະເໜີຂ່າວສານ ໂດຍການຖ່າຍທອດສົດຂ່າວຜ່ານວິທະຍຸ ແລະ ສື່ເອເລັກໂຕຣນິກ ເຊິ່ງສ້າງຄວາມສະດວກ ໃຫ້ແກ່ສັງຄົມໄດ້ເຂົ້າເຖິງ ແລະ ຕິດຕາມການດໍາເນີນກອງປະຊຸມ ໄດ້ທັນສະພາບການ ແທດຕົວຈິງ ແລະ ຕໍ່ເນື່ອງ ແລະ ພິເສດສະແດງຄວາມຂອບໃຈມາຍັງບັນດາຫົວໜ່ວຍທຸລະກິດ, ວິສະຫະກິດ ທັງພາກລັດ ແລະ ເອກະຊົນ ທີ່ໄດ້ເຂົ້າຮ່ວມຕິດຕາມກອງປະຊຸມ ແລະ ຍັງໄດ້ໃຫ້ການສະໜັບໜູນຊຸກຍູ້ກອງປະຊຸມ ຕາມຄວາມສາມາດ.

ກອງປະຊຸມ ຮຽກຮ້ອງມາຍັງຄະນະປະຈໍາສະພາປະຊາຊົນຂັ້ນແຂວງ, ບັນດາຄະນະກຳມະການ, ຄະນະເລຂາທິການ ສະພາປະຊາຊົນຂັ້ນແຂວງ, ຄະນະສະມາຊິກສະພາປະຊາຊົນຂັ້ນແຂວງ ປະຈໍາເຂດເລືອກຕັ້ງເມືອງ, ອົງການປົກຄອງທ້ອງຖິ່ນ, ອົງການທີ່ກ່ຽວຂ້ອງ ແລະ ທຸກພາກສ່ວນທີ່ກ່ຽວຂ້ອງ ຈົ່ງໄດ້ຜັນຂະຫຍາຍມະຕິກອງປະຊຸມຄັ້ງນີ້ ເຂົ້າໃນການປະຕິບັດວຽກງານໃນຂອບເຂດຄວາມຮັບຜິດຊອບຂອງຕົນ ໃຫ້ໄດ້ຮັບຜົນສໍາເລັດເປັນຢ່າງດີ.

ສຸດທ້າຍນີ້, ຕາງໜ້າໃຫ້ກອງປະຊຸມສະພາປະຊາຊົນຂັ້ນແຂວງ ຂໍອວຍພອນໄຊອັນປະເສີດມາຍັງ ທ່ານ ຮອງປະທານສະພາແຫ່ງຊາດ, ທ່ານເຈົ້າແຂວງ ຈົ່ງມີພາລະນາໄມສົມບູນ, ມີຄວາມຜາສຸກໃນຊີວິດຄອບຄົວ, ມີຜົນສໍາເລັດໃຫຍ່ຫຼວງກວ່າເກົ່າ ໃນການຊີ້ນໍາ-ນໍາພາປະເທດຊາດ ກໍ່ຄືແຂວງ ຂອງພວກເຮົາໃຫ້ກ້າວຂຶ້ນຢ່າງໜັກແໜ້ນ.

ຂໍອວຍພອນໃຫ້ບັນດາທ່ານການນໍາພັກ-ລັດ, ການນໍາຜູ້ອາວຸໂສບໍານານພັກ-ລັດ, ສະມາຊິກສະພາແຫ່ງຊາດ, ສະມາຊິກສະພາປະຊາຊົນຂັ້ນແຂວງ ຕະຫຼອດຮອດພະນັກງານ, ທະຫານ, ຕຳຫລວດ, ນັກທຸລະກິດ-ຜູ້ປະກອບການ ແລະ ປະຊາຊົນລາວບັນດາເຜົ່າໃນທົ່ວແຂວງຄຳມ່ວນ ຈົ່ງມີສຸຂະພາບເຂັ້ມແຂງ, ມີຄວາມສຸກໃນຄອບຄົວ ແລະ ປະສົບຜົນສໍາເລັດໃນໜ້າທີ່ວຽກງານອັນມີກຽດຂອງທຸກໆທ່ານ.

ໃນໂອກາດອັນສະຫງ່າລາສີນີ້, ຂ້າພະເຈົ້າ ຂໍປະກາດ ປິດກອງປະຊຸມສະໄໝສາມັນເທື່ອທີ 7 ຂອງສະພາປະຊາຊົນແຂວງຄຳມ່ວນ ຊຸດທີ II ຢ່າງເປັນທາງການ ນັບແຕ່ເວລານີ້ ເປັນຕົ້ນໄປ.

ໂດຍ: ເອື້ອ ມະໂນສິງ