ໃນວັນທີ 6 ຕຸລາ 2023 ທີ່ເມືອງນາກາຍ ທ່ານ ບຸນມີ ພິມມະສອນ ຮອງເລຂາພັກແຂວງ ປະທານສະພາປະຊາຊົນແຂວງຄໍາມ່ວນ ພ້ອມດ້ວຍ ທ່ານ ບົວພັນ ແສງຈັນ ກໍາມະການພັກແຂວງ ຮອງປະທານສະພາປະຊາຊົນແຂວງຄໍາມ່ວນ ໄດ້ເຄື່ອນໄຫວຕິດຕາມກວດກາ, ການຈັດຕັ້ງປະຕິບັດ ລັດຖະທຳມະນູນ, ກົດໝາຍ ໃນຂົງເຂດ ຍຸຕິທຳ ແລະ ປກຊ-ປກສ  ຢູ່ເມືອງນາກາຍ ໂດຍໃຫ້ກຽດຕ້ອນຮັບ ແລະ ເຂົ້າຮ່ວມເຮັດວຽກຂອງບັນດາທ່ານ ຄະນະປະຈໍາພັກເມືອງ, ຄະນະສະມາຊິກສະພາປະຊາຊົນຂັ້ນແຂວງປະຈໍາເຂດເລືອກຕັ້ງເມືອງ, ອົງການກວດກາພັກ-ລັດເມືອງ, ຄະນະກອງບັນຊາການ ປກຊ-ປກສ ເມືອງ, ຫ້ອງການຍຸຕິທຳເມືອງ, ໄອຍະການປະຊາຊົນປະຈໍາເມືອງ, ຫົວໜ້າ-ຮອງຫົວໜ້າຫ້ອງການທີ່ກ່ຽວຂ້ອງເຂົ້າຮ່ວມ.

ຈຸດປະສົງ ໃນການລົງມາເຄື່ອນໄຫວວຽກງານ ຂອງປະທານ ສະພາປະຊາຊົນແຂວງ ພ້ອມດ້ວຍຄະນະຄັ້ງນີ້ ກໍ່ເພື່ອຮັບຟັງການລາຍງານການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ໃນໄລຍະ 1 ປີ ຜ່ານມາ ແລະ ການ ຈັດຕັ້ງປະຕິບັດວຽກງານຂອງ ປກຊ-ປກສ ເມືອງ, ໄອຍະການປະຊາຊົນປະຈໍາເມືອງ, ຫ້ອງການຍຸຕິທຳເມືອງ, ອົງການກວດກາພັກ-ລັດເມືອງ, ໂດຍສະເພາະກໍ່ແມ່ນການປະຕິບັດໜ້າທີ່ຂອງເຈົ້າໜ້າທີ່ ປກສ ເມືອງໃນການຈັດຕັ້ງປະຕິບັດວະລາແຫ່ງຊາດ, ການແກ້ໄຂຄະດີ, ວຽກງານຫ້ອງການຍຸຕິທຳ ໃນການຈັດຕັ້ງປະຕິບັດຄໍາຕັດສິນຂອງສານ ແລະ ວຽກງານການ ຈັດຕັ້ງປະຕິບັດອົງການກວດກາພັກ-ລັດເມືອງ ກ່ຽວກັບການແກ້ໄຂຄໍາຮ້ອງ-ຄໍາສະເໜີ, ວຽກງານຕ້ານ ແລະ ສະກັ້ນການສໍ້ລາດບັງຫຼວງ.

ໂດຍ: ເອື້ອ ມະໂນສິງ