ຈຸດປະສົງແມ່ນເພື່ອເຝິກອົບຮົມໃຫ້ແກ່ຜູ້ປະສານງານໂຄງການພາຍໃນສະພາແຫ່ງຊາດ ທີ່ຮັບຜິດຊອບຂຶ້ນແຜນການຮັບໃຊ້ວຽກງານຂອງຕົນໃຫ້ຖືກຕ້ອງ ແລະ ສອດຄ່ອງຕາມລະບຽບກົດໝາຍ, ຍົກສູງຄວາມຮັບຜິດຊອບ ແລະ ສ້າງຂີດຄວາມສາມາດໃຫ້ແກ່ພະນັກງານກົມການເງິນ ແລະ ຜູ້ປະສານງານໂຄງການພາຍໃນ ສພຊ, ແນະນຳລະ ບຽບການຄຸ້ມຄອງການນຳໃຊ້ງົບປະມານຂອງອົງການຈັດຕັ້ງສາກົນ ແລະ ຂັ້ນຕອນການປະສານງານລະຫວ່າງຜູ້ປະສານງານໂຄງການພາຍໃນ ສພຊ ແລະ ກອງເລຂາຄຸ້ມຄອງແຫ່ງທຶນຊ່ວຍເຫຼືອລ້າຂອງສະພາແຫ່ງຊາດ ທັງເປັນການປັບປຸງຂອດການປະສານງານລະຫວ່າງກອງເລຂາຄຸ້ມຄອງແຫຼ່ງທຶນຊ່ວຍເຫຼືອລ້າ ແລະ ຜູ້ປະສານງານໂຄງການພາຍໃນ ສພຊ ໃນການນຳໃຊ້ງົບປະມານຂອງລັດ ແລະ ງົບປະມານຈາກອົງການຈັດຕັ້ງສາກົນ ໃຫ້ມີຄວາມສະດວກ, ວ່ອງໄວ, ຖືກ ຕ້ອງຕາມແຜນການ, ຕາມລະບຽບຫຼັກການ, ເປັນລະບຽບ, ມີຄວາມເປັນເອກະພາບ ແລະ ມີປະສິດທິຜົນສູງຂຶ້ນກວ່າເກົ່າ.

ທ່ານ ນາງ ອຳໄພວອນ ລ້ອມບຸນແພງ ໄດ້ມີຄຳເຫັນເປີດກອງປະຊຸມວ່າ: ວຽກງານການເງິນ ເປັນວຽກງານໜຶ່ງທີ່ມີຄວາມສໍາຄັນ ແລະ ເປັນປັດໄຈຕົ້ນຕໍໃນການຂັບເຄື່ອນໃຫ້ບັນດາແຜນການ, ແຜນງານຂອງສະພາແຫ່ງຊາດ ໄດ້ຮັບການຈັດຕັ້ງປະຕິບັດດ້ວຍຜົນສໍາເລັດເປັນຢ່າງດີຕະຫຼອດມາ; ດັ່ງນັ້ນ, ຈຸດປະສົງຂອງກອງປະຊຸມທີ່ມີຄວາມສໍາຄັນດັ່ງ ກ່າວນີ້ ແມ່ນເພື່ອເປັນການຍົກສູງພາລະບົດບາດການເປັນເສນາທິການທີ່ດີ, ມີຄຸນນະພາບ ໃຫ້ແກ່ຄະນະນໍາຂອງສະພາແຫ່ງຊາດໃນວຽກງານການເງິນ ຮັບປະກັນການປະຕິບັດໃຫ້ຖືກຕ້ອງ, ສອດຄ່ອງກັບລະບຽບຫຼັກການ ເປັນຕົ້ນການຄຸ້ມຄອງນໍາໃຊ້ງົບປະມານລວມຂອງລັດ, ການນໍາໃຊ້ງົບປະມານຂອງອົງການຈັດຕັ້ງສາກົນ, ແຫຼ່ງທຶນຊ່ວຍເຫຼືອລ້າຂອງສະ ພາແຫ່ງຊາດ ລວມໄປເຖິງຂັ້ນຕອນການປະສານງານລະຫວ່າງຜູ້ປະສານງານຂອງບັນດາກົມ, ສູນ, ຫ້ອງການ ກັບ ກອງເລຂາຄຸ້ມຄອງແຫຼ່ງທຶນຊ່ວຍເຫຼືອລ້າໃຫ້ແກ່ສະພາແຫ່ງຊາດ. ທ່ານເລຂາທິການສະພາແຫ່ງຊາດ ກ່າວອີກວ່າ: ກອງປະ ຊຸມຄັ້ງນີ້ ເປົ້າໝາຍເຂົ້າຮ່ວມກໍລ້ວນແລ້ວແຕ່ແມ່ນພະນັກງານຜູ້ທີ່ຖືກມອບໝາຍຮັບຜິດຊອບລົງເລິກໃນການຈັດຕັ້ງປະ ຕິບັດວຽກງານຕົວຈິງທີ່ມີປະສົບການ, ມີຄວາມຮູ້ຄວາມສາມາດ, ມີຄວາມຊຳນານດ້ານວຽກງານການເງິນເປັນຢ່າງດີ ຫວັງຢ່າງຍິ່ງວ່າພາຍຫຼັງສໍາເລັດການເຝິກອົບຮົມແລ້ວ, ບັນດາທ່ານຈະນຳເອົາບົດຮຽນໄປຈັດຕັ້ງປະຕິບັດໃຫ້ເກີດດອກອອກຜົນໃນກົມກອງຂອງຕົນ ໃຫ້ໄດ້ຮັບປະສິດທິຜົນໃນຕໍ່ໜ້າ.

ຜູ້ເຂົ້າຮ່ວມໄດ້ຮັບຟັງການເຜີຍແຜ່ຄຳແນະນຳກ່ຽວກັບການຈັດຕັ້ງປະຕິບັດແຜນງົບປະມານແຫ່ງລັດປະຈຳປີ 2024 ສະບັບເລກທີ 3797/ກງ, ລົງວັນທີ 24 ພະຈິກ 2023; ຂໍ້ຕົກລົງຂອງກະຊວງການເງິນວ່າດ້ວຍການກຳນົດໝາ ຍການໃຊ້ຈ່າຍງົບປະມານຂອງລັດ, ການປະຢັດ ແລະ ຕ້ານການຟຸມເຟືອຍ ສະບັບເລກທີ 200/ກງ, ລົງວັນທີ 25 ມັງ ກອນ 2023; ຄຳແນະນຳວ່າດ້ວຍການປະກອບເອກະສານ ແລະ ກວດກາລາຍຈ່າຍງົບປະມານຂອງລັດ ແລະ ທຶນຊ່ວຍ ເຫຼືອທາງການເພື່ອການພັດທະນາ ຢູ່ຄັງເງິນແຫ່ງຊາດ ສະບັບເລກທີ 0866/ກງ, ລົງວັນທີ 22 ມີນາ 2019; ພາບລວມຂອງການສະໜັບສະໜູນສະພາແຫ່ງຊາດ ແລະ ສະພາປະຊາຊົນຂັ້ນແຂວງ; ຂັ້ນຕອນການປະສານງານ, ການສ້າງແຜນກິດຈະກຳປະຈຳປີ, ແຜນກິດຈະກຳ, ການປະກອບເອກະສານ ເພື່ອຂໍນຳໃຊ້ງົບປະມານຊ່ວຍເຫຼືອລ້າ ແລະ ການສະຫຼຸບລາຍງານດ້ານເນື້ອໃນ; ແນະນຳ ແລະ ເຝິກປະຕິບັດຕົວຈິງໃນການສະໜອງເອກະສານຜ່ານ Google Drive ແລະ ສ້າງຟອມປະເມີນຜ່ານ Google Form; ແນະນຳລະບຽບການນຳໃຊ້ງົບປະມານຈາກອົງການຈັດຕັ້ງສາກົນທີ່ເປັນຄູ່ຮ່ວມງານຂອງສະພາແຫ່ງຊາດ ແລະ ສະພາປະຊາຊົນຂັ້ນແຂວງ; ແນະນຳກ່ຽວກັບການປະເມີນ ແລະ ການລາຍງານ ກິດຈະກຳ (MEL). ຜູ້​ເຂົ້າ​ຮ່ວມຍັງໄດ້ສົນທະນາ​ແລກປ່ຽນບົດຮຽນກັບບັນດາວິທະຍາກອນ ພ້ອມທັງດຳເນີນການປະເມີນຜົນຂອງການເຂົ້າຮ່ວມກອງປະຊຸມຜ່ານ Google Form.

ກອງປະຊຸມຄັ້ງນີ້ ຈັດຂຶ້ນໃນວັນທີ 07-08 ກັນຍາ 2024 ທີ່ເມືອງວັງວຽງ ແຂວງວຽງຈັນ, ໄດ້ຮັບການສະໜັບສະໜູນຊ່ວຍເຫຼືອທາງດ້ານງົບປະມານຈາກໂຄງການສ້າງຄວາມເຂັ້ມແຂງໃຫ້ແກ່ສະພາແຫ່ງຊາດ ແລະ ສະພາປະຊາ ຊົນຂັ້ນແຂວງ ຫຼື ສະເຕັບສ໌ (STEPs) ໂດຍຜ່ານກອງເລຂາຄຸ້ມຄອງແຫຼ່ງທຶນຊ່ວຍເຫຼືອລ້າໃຫ້ແກ່ສະພາແຫ່ງຊາດ ສົມທົບກັບງົບປະມານຂອງຄະນະ​ເລຂາທິການ​ສະພາ​ແຫ່ງ​ຊາດ.

(ນາງ ສຸພາວັນ ຫອມສະນິດ)