ເພື່ອຕິດຕາມ ແລະ ຊຸກຍູ້ການຈັດຕັ້ງປະຕິບັດລັດຖະທໍາມະນູນ, ກົດໝາຍ ແລະ ນິຕິກໍາຕ່າງໆຕາມພາລະບົດບາດ, ຂອບເຂດສິດ ແລະ ໜ້າທີ່ຂອງຄະນະສະມາຊິກສະພາແຫ່ງຊາດປະຈໍາເຂດເລືອກຕັ້ງທີ9 ແລະ ສະມາຊິກສະພາປະຊາຊົນແຂວງທີ່ກໍານົດໄວ້ໃນກົດໝາຍວ່າດ້ວຍການຕິດຕາມກວດກາຂອງສະພາແຫ່ງຊາດ ແລະ ສະພາປະຊາຊົນຂັ້ນແຂວງ, ສະນັ້ນມາໃນລະຫວ່າງວັນທີ 18-19 ກັນຍາ 2023 ທ່ານ ວຽງໄຊ ສີວິໄລ ກຳມະການພັກແຂວງ, ຮອງປະທານສະພາປະຊາຊົນແຂວງ ພ້ອມດ້ວຍ 3 ຄະນະກໍາມະການ ແລະ ພະນັກງານສະພາປະຊາຊົນແຂວງ ໄດ້ລົງຕິດຕາມກວດກາ ແລະ ຊຸກຍູ້ການຈັດຕັ້ງປະຕິບັດລັດຖະທໍາມະນູນ, ກົດໝາຍ ແລະ ມະຕິຂອງກອງປະຊຸມສະໄໝສາມັນ ເທື່ອທີ 4 ຂອງສະພາປະຊາຊົນແຂວງ ຢຸ່ເມືອງໜອງແຮດ

                               ໃນໂອກາດທີ່ໄດ້ລົງຕິດຕາມກວດກາໃນຄັ້ງນີ້ເມືອງໄດ້ໄປຢ້ຽມຢ້າມ ແລະ ເຮັດວຽກຢູ່ບ້ານແກ່ວປະຕູ ເມືອງໜອງແຮດ ແຂວງຊຽງຂວາງ ເພື່ອໄປເກັບກໍາຄໍາຄິດຄໍາເຫັນຂອງປະຊາຊົນ ແລະ ຊຸກຍູ້ ການຈັດຕັ້ງປະຕິບັດໜ້າທີ່ວຽກງານຕໍ່ບັນຫາທີ່ເຫັນວ່າມີຄວາມຫຍຸ້ງຍາກສັບສົນຂອງບ້ານ. ໃນຕອນແລງຂອງວັນດຽວກັນ ຄະນະທິມງານຂອງສະພາປະຊາຊົນແຂວງ ໄດ້ປະຊຸມຮ່ວມກັບອົງການປົກຄອງເມືອງ ເພື່ອຕິດຕາມກວດກວດກາການຈັດຕັ້ງປະຕິບັດລັດຖະທໍາມະນູນ, ກົດ ໝາຍ ແລະ ມະຕິຂອງກອງປະຊຸມສະໄໝສາມັນ ເທື່ອທີ 4 ຂອງສະພາປະຊາຊົນແຂວງ, ໃນທີ່ປະຊຸມ ທ່ານ ຕູ້ຢ່າ ຢົງວ່າ ເລຂາພັກເມືອງ ເຈົ້າເມືອງໜອງແຮດ ໄດ້ລາຍງານສະພາບ ການເຄື່ອນໄຫວວຽກງານຂອງຕົນໃນໄລຍະຜ່ານມາ ເຊິ່ງຍົກໃຫ້ເຫັນເຖິ່ງ ຂໍ້ສະດວກ, ຂໍ້ຫຍຸ້ງຍາກ ແລະ ສະພາບຄວາມເປັນຈິງຂອງການເຄື່ອນໄຫວວຽກງານ, ພ້ອມນັ້ນຍັງຮັບຟັງການເຜີຍແຜ່ຜົນສໍາເລັດກອງປະຊຸມສະໄໝສາມັນ ເທື່ອທີ 5 ຂອງສະພາແຫ່ງຊາດ ຊຸດທີ IX ແລະ ສະພາປະຊາຊົນແຂວງ ຊຸດທີ II ພ້ອມນັ້ນຄະນະສະມາຊິກສະພາປະຊາຊົນແຂວງ ຍັງໄດ້ມີເຈາະຈິ້ມຄໍາຖາມເຈາະຈິ້ມທີ່ກ່ຽວພັນກັບບັນດາຫ້ອງການຂອງເມືອງເປັນຕົ້ນແມ່ນ: ການປະຕິບັດແຜນພັດທະນາເສດຖະກິດ-ສັງຄົມຂອງເມືອງ, ວຽກງານການຂຸດຄົ້ນແຮ່ຂອງບັນດາບໍລິສັດທີ່ມາລົງທຶນຢູ່ພາຍໃນເມືອງ, ການປະຕິບັດຄໍາຕັດສິນຂອງສານ, ການຊຸກຍູ້ການຜະລິດ, ບັນຫາຢາເສບຕິດ ແລະ ອື່ນໆອີກ. ຍັງໄດ້ຮັບຟັງການເຜີຍແຜ່ກົດໝາຍ ແລະ ນິຕິກໍາຕ່າງໆ ກ່ຽວຂ້ອງກັບວຽກງານທະນາຄານຈາກທະນາຄານກາງສາຂາພາກເໜືອ (ແຂວງຊຽງຂວາງ) ນອກນັ້ນບັນດາຜູ້ແທນກອງປະຊຸມໄດ້ມີຄໍາເຫັນແລກປ່ຽນເຊິ່ງກັນ ແລະ ກັນ ເປັນຕົ້ນແມ່ນ: ການກໍ່ສ້າງຂົວພຽງຮົ່ງ, ການຈັດສັນເງິນພັດທະນາທ່ອງຖິ່ນ, ຄ່າຊົດເຊີຍຈາກຜົນກະທົບ ຂອງບັນດາໂຄງການຕ່າງໆ, ການແກ້ໄຂຂໍ້ຂັດແຍ່ງທີ່ດິນ ແລະ ບັນຫາອື່ນໆ ເພື່ອໃຫ້ຂັ້ນເທິ່ງຄົ້ນຄວ້າ ແລະ ຂໍທິດຊີ້ນຳ ເພື່ອສະດວກໃນການຈັດຕັ້ງປະຕິບັດໜ້າທີ່ວຽກງານໃຫ້ມີຄວາມຖືກຕ້ອງ ແລະ ສອດຄ່ອງກັບສະພາບ ຄວາມເປັນຈິງ.

                             ນອກນັ້ນ ທ່ານ ວຽງໄຊ ສີວິໄລ ຍັງໄດ້ຊີ້ນໍາ ໃຫ້ຄະນະພັກ, ຄະນະນໍາອົງການປົກຄອງເມືອງໜອງແຮດ ຈົ່ງຈັດຕັ້ງປະຕິບັດໜ້າທີ່ວຽກງານຂອງຕົນ ໃຫ້ຖືກຕ້ອງ ແລະ ສອດຄ່ອງກັບສະພາບຄວາມເປັນຈິງ ບົນພື້ນຖານສອດຄອງກັບລັດຖະທຳມະນູນ, ກົດໝາຍ, ສືບຕໍ່ປະຕິບັດສິດ ແລະ ໜ້າທີ່ຂອງຕົນ, ເອົາໃຈໃສ່ພົວພັນປະສານງານກັບຂະແໜງການທີ່ກ່ຽວຂ້ອງ ໃຫ້ຈອດກັນ ເພື່ອໃຫ້ສະດວກໃນການຈັດຕັ້ງປະຕິບັດວຽກງານ. ການລົງຕິດຕາມກວດກາຄັ້ງນີ້ໄດ້ຮັບການສະໜັບສະໜູນຈາກໂຄງການສ້າງຄວາມເຂັ້ມແຂງໃຫ້ແກ່ສະພາແຫ່ງຊາດ ແລະ ສະພາປະຊາຊົນຂັ້ນແຂວງ (STEPS).

ສະພາປະຊາຊົນແຂວງຊຽງຂວາງ

ຂ່າວໂດຍ: ນາງ ສຸກສະຫວັນ ອິນທະແສງ