ໂດຍສືບຕໍ່ປະຕິບັດຕາມຄໍາແນະນໍາ ຂອງກໍາມາທິການກົດໝາຍ ສະພາແຫ່ງຊາດ ກ່ຽວກັບໃຫ້ສະມາຊິກສະພາແຫ່ງຊາດ ປະຈໍາເຂດເລືອກຕັ້ງໃນຂອບເຂດທົ່ວປະເທດ ຈັດຕັ້ງການທາບທາມຄໍາເຫັນໃສ່ຮ່າງກົດໝາຍ ຈໍານວນ 10 ສະບັບ ກ່ອນທີ່ຈະນໍາເຂົ້າພິຈາລະນາ ແລະ ຮັບຮອງໃນກອງປະຊຸມສະໄໝສາມັນເທື່ອທີ 7 ຂອງສະພາແຫ່ງຊາດ ຊຸດທີ IX ໃນຕົ້ນເດືອນ ມິຖຸນາ ທີ່ຈະເຖິງນີ້; ໃນວັນທີ 16 ພຶດສະພາ 2024 ນີ້, ທີ່ຫ້ອງປະຊຸມສະໂມສອນແຂວງ, ສະພາປະຊາຊົນແຂວງສາລະວັນ ໄດ້ຈັດກອງປະຊຸມທາບທາມຄໍາເຫັນໃສ່ຮ່າງກົດໝາຍ 5 ສະບັບ ຄັ້ງທີ II; ໂດຍການເປັນປະທານກອງປະຊຸມຂອງທ່ານ ຂັນໄຊ ລັດຖະເຮົ້າ ຄະນະປະຈໍາພັກແຂວງ ຮອງປະທານຄະນະສະມາຊິກສະພາແຫ່ງຊາດ ປະຈໍາເຂດເລືອກຕັ້ງທີ 14 ຮອງປະທານສະພາປະຊາຊົນແຂວງ; ເຂົ້າຮ່ວມມີທ່ານ ນາງ ສູນໄຖ ໄຊຍະແສງ ກໍາມະການພັກແຂວງ ຮອງປະທານສະພາປະຊາຊົນແຂວງ; ມີປະທານ-ຮອງປະທານຄະນະກໍາມະການ, ຄະນະເລຂາທິການ, ບັນດາທ່ານສະມາຊິກສະພາປະຊາຊົນ ອ້ອມຂ້າງແຂວງ; ບັນດາທ່ານຫົວໜ້າ-ຮອງຫົວໜ້າພະແນກການທີ່ກ່ຽວຂ້ອງກັບ ຮ່າງກົດໝາຍ ແລະ ພະນັກງານ-ລັດຖະກອນ ພາຍໃນສະພາປະຊາຊົນແຂວງ ເຂົ້າຮ່ວມ;

ທັງນີ້, ເພື່ອເປັນການສືບຕໍ່ການທາບທາມຄໍາເຫັນໃສ່ຮ່າງກົດໝາຍ ທີ່ຍັງຄ້າງ 5 ສະບັບ ໃຫ້ສໍາເລັດ, ມີການລະດົມຄໍາຄິດເຫັນເປັນເອກະພາບຢ່າງກວ້າງຂວາງ, ເປັນປະໂຫຍດ ດ້ວຍເຫດ ແລະ ຜົນໃນການສ້າງ ແລະ ປັບປຸງ ສາມາດເຮັດໃຫ້ຮ່າງກົດໝາຍມີເນື້ອໃນຄົບຖ້ວນ, ຮັດກຸມ ແລະ ສອດຄ່ອງກັບສະພາບການຂະຫຍາຍຕົວຂອງເສດຖະກິດ-ສັງຄົມໃນປັດຈຸບັນ ເຮັດໃຫ້ການຄຸ້ມຄອງລັດ ຄຸ້ມຄອງສັງຄົມ ດ້ວຍກົດໝາຍ ມີຜົນສັກສິດ ແລະ ດັດປັບສາຍພົວພັນໃນສັງຄົມໃຫ້ມີຄວາມສະຫງົບ ແລະ ເປັນລະບຽບຮຽບຮ້ອຍ;

ໃນທີ່ປະຊຸມຜູ້ເຂົ້າຮ່ວມໄດ້ຮັບຟັງການສະເໜີ ຮ່າງກົດໝາຍ 5 ສະບັບ ປະກອບມີ: ຮ່າງກົດໝາຍ ວ່າດ້ວຍການຕ້ານສະກັດກັ້ນ ແລະ ຕ້ານອັກຄີໄຟ (ສະບັບປັບປຸງ); ຮ່າງກົດໝາຍ ວ່າດ້ວຍການທ່ອງທ່ຽວ (ສະບັບປັບປຸງ); ຮ່າງກົດໝາຍ ວ່າດ້ວຍອາກອນມູນຄ່າເພີ່ມ (ສະບັບປັບປຸງ); ຮ່າງກົດໝາຍ ວ່າດ້ວຍການຕ້ານສະກັດກັ້ນການຟອກເງິນ ແລະ ການສະໜອງທຶນໃຫ້ແກ່ການກໍ່ການຮ້າຍ (ສະບັບສ້າງໃໝ່) ແລະ ຮ່າງກົດໝາຍ ວ່າດ້ວຍສົ່ງເສີມການລົງທຶນ (ສະບັບປັບປຸງ); ຈາກນັ້ນ, ຜູ້ແທນທີ່ເຂົ້າຮ່ວມໄດ້ພ້ອມກັນເຊີດຊູຄວາມຮັບຜິດຊອບ, ສຸມສະຕິປັນຍາ ຄົ້ນຄວ້າແລກປ່ຽນ ແລະ ປະກອບຄໍາຄິດຄໍາເຫັນຕໍ່ເນື້ອໃນແຕ່ລະໝວດແຕ່ລະມາດຕາຂອງ 5 ຮ່າງກົດໝາຍ ຢ່າງມີຈຸດສຸມ ແລະ ເປັນຂະບວນຢ່າງຟົດຟື້ນ;

ພາບ-ຂ່າວ: ດີລໍາພົນ ພົມມະຈັນ