ໂດຍໄດ້ຮັບການສະໜັບສະໜູນຈາກ:ແຜນງານການມີສ່ວນຮ່ວມຂອງປະຊາຊົນຕໍ່ວຽກງານການປົກຄອງທີ່ດີ ແລະ​ ການສ້າງລັດທີ່ປົກຄອງດ້ວຍກົດໝາຍ(ແຜນງານເຊກາCEGGA).
ໃນຕອນແລງ​ວັນທີ​ 20​ ກັນຍາ​ 2022.​ ສະພາປະຊາຊົນແຂວງ​ (ສພຂ)​ ອັດຕະປື​ ສຳເລັດ​ການຝືກອົບຮົບສ້າງຄວາມເຂັ້ມແຂງກ່ຽວກັບການຕິດຕາມກວດກາການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ​ ແລະ​ ແຜນງົບປະມານແຫ່ງລັດ,​ການສ້າງນິຕິກຳ ແລະການຄົ້ນຄວ້າຄໍາຮ້ອງຂໍຄວາມເປັນທໍາ.​ ທີ່ສະໂມສອນເມືອງພູວົງ,​ ໂດຍການເປັນ​ປະທານ​ຂອງທ່ານ​ ນາງ​ ມີນາພອນ​ ໄຊສົມພູ​ ປະທານ​ ສພຂ.​ ມີບັນດາທ່ານ​ຮອງປະທານ,​ຄະນະປະຈໍາ​ ສພຂ,​ ທ່ານເຈົ້າເມືອງພູວົງ, ຜູ້ຕາງໜ້າແຜນງານເຊກາ,​ ນັກວິທະຍາກອນ ທີ່ມາຈາກສູນກາງ​ ແລະ​ ທ້ອງຖີ່ນ,​ ນັກສໍາມະນາກອນ ທີ່ເປັນສະມາຊິກສະພາປະຊາຊົນແຂວງ ແລະ​ ພະນັກງານ-ລັດຖະກອນ​ ທີ່ເປັນເສນາທິການໃຫ້ແກ່ ສພຂ​ ພ້ອມດ້ວຍແຂກທີ່ຖືກເຊີນເຂົ້າຮ່ວມ.​

ຫຼັງຈາກທີ່ໄດ້ດຳເນີນມາເປັນເວລາ 2 ວັນ, ໄດ້ພ້ອມກັນຮຽນຮູ້ ແລະ ສ້າງຄວາມຮັບຮູ້ເຂົ້າໃຈໃໝ່ຢ່າງເປັນເອກະພາບ ກ່ຽວກັບການຕິດຕາມກວດກາ ການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ແລະ ແຜນງົບປະມານແຫ່ງລັດຂັ້ນແຂວງ, ການສ້າງນິຕິກຳ ແລະ ການຄົ້ນຄວ້າຄໍາຮ້ອງຂໍຄວາມເປັນທຳ,​ຜ່ານການດຳເນີນຝືກອົບຮົມ ແມ່ນເຕັມໄປດ້ວຍບັນຍາກາດຟົດຟື້ນ, ເຮັດໃຫ້ນັກສໍາມະນາກອນທີ່ເຂົ້າຮ່ວມ ໄດ້ຍົກສູງຄວາມຮັບຜິດຊອບ, ຫ້າວຫັນ, ມີການຊັກຖາມຕໍ່ບັນດາເນື້ອໃນ ທີ່ວິທະຍາກອນສະເໜີຢ່າງສ້າງສັນ, ມີການປະກອບ​​ຄວາມ​ຄິດຄວາມ​ເຫັນແລກປ່ຽນ ໃນບາງບັນຫາຢ່າງມີຈຸດສູມ, ສາມາດເຮັດໃຫ້ມີທ່າຫັ້ນປ່ຽນອັນໃໝ່ ໃນຄວາມຮັບຮູ້ເຂົ້າໃຈຢ່າງເປັນເອກະພາບ ກ່ຽວກັບການຈັດຕັ້ງປະຕິບັດວຽກງານຕາມລັດຖະທຳມະນູນ ແລະ ກົດໝາຍວ່າດ້ວຍສະພາປະຊາຊົນຂັ້ນແຂວງກຳນົດໄວ້. ນອກນັ້ນ, ຍັງໄດ້ສ້າງຄວາມເຂັ້ມແຂງ ໃຫ້ແກ່ສະມາຊິກສະພາປະຊາຊົນແຂວງ, ພະນັກງານ-ລັດຖະກອນ ພາຍໃນສະພາປະຊາຊົນແຂວງ ໃນກາເຄື່ອນໄຫວວຽກງານຕາມພາລະບົດບາດ, ສິດ ແລະ ໜ້າທີ່ ຂອງຕົນ ທີ່ໄດ້ກໍານົດໄວ້ໃນລັດຖະທໍາມະນູນ ແລະ ກົດໝາຍ. ພ້ອມກັນນັ້ນ, ກໍ່ທັງສ້າງຄວາມເປັນເອກະພາບຮ່ວມກັນ ກ່ຽວກັບຂັ້ນຕອນ ແລະ ວິທີການໃນການຕິດຕາມກວດກາ ແຜນງົບປະມານແຫ່ງລັດຂັ້ນແຂວງ ແລະ ແຜນພັດທະນາເສດຖະກິດ-ສັງຄົມ, ຂັ້ນຕອນການສ້າງນິຕິກໍາໃຕ້ກົດໝາຍ ແລະ ການຄົ້ນຄວ້າຄໍາຮ້ອງ, ຄໍາສະເໜີຕ່າງໆ ໃຫ້ມີຄວາມຮັບປະກັນ, ຖືກຕ້ອງສອດຄ່ອງທາງດ້ານຮູບການ, ຫຼັກການ, ຂັ້ນຕອນ, ວິທີການ ແລະ ເນື້ອໃນຫົວຂໍ້ຕ່າງໆ, ສາມາດເຮັດໃຫ້ກອງປະຊຸມຂອງພວກເຮົາບັນລຸຜົນສໍາເລັດ ຕາມຈຸດປະສົງ ແລະ ລະດັບຄາດໝາຍທີ່ວາງໄວ້.
(ນັກຂ່າວ:ສພຂ​ ອັດຕະປື)