(ສພຊ) ພາຍຫຼັງດຳເນີນມາເປັນເວລາ 3 ວັນ, ທີ່ເມືອງແກ້ວອຸດົມ ແຂວງວຽງຈັນ; ກອງປະຊຸມເຝິກອົບຮົມການຕິດຕາມກວດກາການປະເມີນຜົນການຈັດຕັ້ງປະຕິບັດກົດໝາຍ ໃຫ້ແກ່ພະນັກງານ-ລັດຖະກອນຂອງສະພາແຫ່ງຊາດ ໄດ້ສຳເລັດໃນວັນທີ 9 ກຸມພາ 2024 ໂດຍການເປັນປະທານກ່າວປິດຂອງທ່ານ ອຳໄພ ຈິດມານົນ ຮອງປະທານກຳມາທິການກົດໝາຍ ເຊິ່ງມີຄະນະກົມ ແລະ ພະນັກງານຂອງກົມຕິດຕາມກວດກາ, ໂຄສະນາ ແລະ ຕີຄວາມໝາຍກົດໝາຍ ແລະ ບັນດາກົມພາຍໃນສະພາແຫ່ງຊາດ ເຂົ້າຮ່ວມ; ກອງປະຊຸມຄັ້ງນີ້ ໄດ້ຮັບການສະໜັບສະໜູນຊ່ວຍເຫຼືອທາງດ້ານງົບປະມານສົມທົບຈາກມູນນິທິເວດມິນສະເຕີ ເພື່ອປະຊາທິປະໄຕ (Westminster Foundation for Democracy).
ທ່ານ ອຳໄພ ຈິດມານົນ ໄດ້ມີຄຳເຫັນວ່າ: ກອງປະຊຸມເຕັມໄປດ້ວຍເນື້ອໃນສຳຄັນ, ເລິກເຊິ່ງຫຼາຍດ້ານ; ການຄົ້ນຄວ້າ, ປະກອບຄຳເຫັນ ແລະ ແລກປ່ຽນບົດຮຽນເຊິ່ງກັນ ແລະກັນຢ່າງກົງໄປກົງມາຂອງບັນດາທ່ານທີ່ເຂົ້າຮ່ວມກອງປະຊຸມໃນຄັ້ງນີ້ ເຫັນວ່າມີເຫດມີຜົນ, ພາວະວິໄສ ແລະ ແທດກັບສະພາບການຕົວຈິງໃນການຂະຫຍາຍຕົວຂອງສະ ພາບເສດຖະກິດ-ສັງຄົມໃນປັດຈຸບັນ ເຊິ່ງສັງລວມແລ້ວເຫັນວ່າບັນດາທ່ານເຫັນໄດ້ເຖິງຄວາມສຳຄັນຂອງວຽກງານຕິດ ຕາມກວດກາການປະເມີນຜົນການຈັດຕັ້ງປະຕິບັດກົດໝາຍ; ເຖິງແມ່ນວ່າຍັງເປັນວຽກງານໃໝ່ສຳລັບພວກເຮົາກໍຕາມ, ແຕ່ພວກເຮົາຕ້ອງໄດ້ພ້ອມກັນຕັ້ງໜ້າຈັດຕັ້ງປະຕິບັດວຽກງານດັ່ງກ່າວໃຫ້ມີປະສິດທິພາບ ແລະ ປະສິດທິຜົນດີຂຶ້ນກວ່າເກົ່າ ເພື່ອຮັບປະກັນໃຫ້ບັນດາຂະແໜງການຕ່າງໆ ຈັດຕັ້ງປະຕິບັດລັດຖະທຳມະນູນ, ກົດໝາຍ ແລະ ນິຕິກຳໃຕ້ກົດ ໝາຍ ໃຫ້ມີຄວາມເຂັ້ມງວດສັກສິດ. ຜ່ານການຮັບຟັງການລາຍງານ, ເຜີຍແຜ່ ແລະ ຖອດຖອນບົດຮຽນຮ່ວມກັນກັບບັນດາທ່ານກ່ຽວກັບວຽກງານດັ່ງກ່າວ ເຫັນວ່າມີຫຼາຍດ້ານທີ່ມີຜົນສຳເລັດພົ້ນເດັ່ນ ແລະ ມີບາງດ້ານທີ່ຍັງພົບຄວາມຫຍຸ້ງ ຍາກ ເປັນຕົ້ນຄວາມເຂົ້າໃຈຕໍ່ກັບບັນດາອົງການທີ່ເປັນໃຈກາງ, ເປັນເຈົ້າການໃນການປະເມີນຜົນການຈັດຕັ້ງປະຕິບັດກົດໝາຍຕົວຈິງ, ໄລຍະເວລາໃນການປະເມີນ, ກົນໄກການຕິດຕາມກວດກາພາຍຫຼັງກອງປະຊຸມສະພາແຫ່ງຊາດພິຈາລະນາຮັບຮອງແລ້ວ, ງົບປະມານສະໜອງໃຫ້ແກ່ວຽກງານດັ່ງກ່າວ ເຊິ່ງຂ້າພະເຈົ້າຂໍມີຄຳເຫັນຕື່ມບາງບັນຫາຄື: ສະເໜີໃຫ້ບັນ ດາທ່ານທີ່ເຂົ້າຮ່ວມກອງປະຊຸມຄັ້ງນີ້ ໃນນາມເປັນພະນັກງານທີ່ເປັນເສນາທິການໃຫ້ແກ່ຄະນະປະຈຳສະພາແຫ່ງຊາດ ກໍຄືກຳມາທິການຕົນ ສືບຕໍ່ເຜີຍແຜ່, ຄົ້ນຄວ້າ ແລະ ຈັດຕັ້ງປະຕິບັດຕາມມະຕິຂອງຄະນະປະຈຳສະພາແຫ່ງຊາດ ວ່າດ້ວຍການຕິດຕາມກວດກາການປະເມີນຜົນການຈັດຕັ້ງປະຕິບັດກົດໝາຍ, ມະຕິຂອງຄະນະປະຈຳສະພາແຫ່ງຊາດ ວ່າດ້ວຍການຕິດຕາມກວດກາການຜັນຂະຫຍາຍມາດຕາຂອງກົດໝາຍ ທີ່ກຳນົດໃຫ້ອອກເປັນນິຕິກຳໃຕ້ກົດໝາຍ ໃຫ້ເລິກເຊິ່ງກວ້າງຂວາງຕື່ມ; ເອົາໃຈໃສ່ຄົ້ນຄວ້າອີງໃສ່ປຶ້ມຄູ່ມືການຕິດຕາມກວດກາການປະເມີນຜົນການຈັດຕັ້ງປະຕິບັດກົດໝາຍ ໃນການຈັດຕັ້ງປະຕິບັດວຽກງານດັ່ງກ່າວຕົວຈິງ ແລະ ພະຍາຍາມຖອດຖອນບົດຮຽນຈາກການຕິດຕາມກວດກາການປະເມີນຜົນການຈັດຕັ້ງປະຕິບັດກົດໝາຍໃຫ້ລະອຽດຈະແຈ້ງ ເພື່ອປັບປຸງແກ້ໄຂວິທີ, ຂັ້ນຕອນ, ຮູບການໃນການຈັດຕັ້ງປະຕິບັດວຽກງານໃຫ້ດີຂຶ້ນເທື່ອລະກ້າວ ແນໃສ່ຫັນພະນັກງານ-ລັດຖະກອນໃຫ້ມີຄວາມຊຳນານ, ເປັນມືອາຊີບໃນຕໍ່ໜ້າ ; ສືບຕໍ່ປະສານສົມທົບກັບທຸກກຳມາທິການພາຍໃນສະພາແຫ່ງຊາດ ເພື່ອກຳນົດແຜນຕິດຕາມກວດກາການປະເມີນຜົນການຈັດຕັ້ງປະຕິບັດກົດໝາຍໃນແຕ່ລະປີ ໃຫ້ມີຄວາມວ່ອງໄວ, ຊັດເຈນ ແລະ ທັນກຳນົດເວລາ; ເອົາໃຈໃສ່ປະສານສົມ ທົບກັບບັນດາກະຊວງ-ອົງການທີ່ກ່ຽວຂ້ອງ ເພື່ອຕິດຕາມກວດກາບັນດາກົດໝາຍທີ່ຢູ່ໃນຄວາມຮັບຜິດຊອບຂອງກຳມາທິການຕົນ ຍັງມີມາດຕາໃດຂອງກົດໝາຍໃດ ທີ່ຍັງບໍ່ທັນໄດ້ຈັດຕັ້ງຜັນຂະຫຍາຍເປັນນິຕິກຳໃຕ້ກົດໝາຍ.
(ຂ່າວ-ພາບ: ນາງ ຕາດໍາ ຫ່ານຟ້າ)